26-5-2013:釜山麗水day 2(part 1).梧桐島

瞓醒一覺終於似番個人了,第一日搭凌晨機嚟真係唔係好頂得順,之前嗰日成日都好眼瞓、迷迷糊糊咁,加上low back pain,行一陣就要休息下,真係成個阿婆咁,第二日瞓醒覺,食定Panadol,希望狀態好少少啦~之前咪話我哋間酒店見到梧桐島,同埋附近o既MVL Hotel o既,我有冇講過呢,本身都有諗住book MVL Hotel o架?不過見MVL Hotel貴過我哋book o既HS Tourist Hotel又冇早餐食,結果就揀咗呢間了,另一個候選旅館就係梧桐寨,呢間係韓屋嚟o架,之前都好想住一次,位置其實就係我哋第一晚行完expo o既EDG同埋KTX火車站之後走咗上去嗰個住宅區附近,當時上網睇相見到好傳統o既韓屋o既感覺,好想住下,不過見我哋weekend入住係平時價錢差唔多double,一晚要差唔多$1500,又冇早餐食,我就打咗退堂鼓,不過都好在咋,因為嗰個位置係少少山坡上面,距離大路遠啲,都冇我哋HS Tourist Hotel咁方便~睇下有咩早餐食先,原來雖然呢間酒店o既餐廳呢,一個識講英文o既人都冇,但佢哋o既早餐都有韓式同埋西式,我哋第一日決定食咗韓式先,唔怪得之lunch o既配菜咁豪爽啦,原來早餐時已經整咗樣樣都好大盤﹗都有好多唔辣o既選擇呀,啱晒我呢啲唔食得辣o既人~因為有白飯食,我哋充滿體力了~yeah~其實對於第二日o既行程我哋都冇好concrete o既idea要點行,總之早上去咗梧桐島至算啦,睇下行到幾點,下晝再睇下去邊咁啦~

梧桐島一來係麗水o既must,二來都係我哋睇running man時被吸引o既地方,所以一定要去o既~

都話我哋酒店已經望到梧桐島,所以行咗幾分鐘已經去到個大招牌了~雖然時間尚早,但已經有好多大叔大嬸遊客嚟到了~

入口處附近有好多攤子,唔講其實都有啲似係大陸咁,有經典o既旅遊景點小食—-一碌碌o既烚粟米,又有啲卜卜脆小食,仲有見到都怕怕o既蟲蟲﹗﹗﹗又有啲賣海產乾貨o既攤子,好似去咗大澳or長洲咁,但全部包裝都勁大,我哋都唔敢買番去,唔知點食咁多~ :p咦,入去連接去梧桐島o既長堤之前,有條樓梯上個觀景亭喎,我哋上咗去望下先啦~唉,運動太少,體能太差,我哋爬上去嗰幾十級大樓梯都幾辛苦丫~

上到去有個亭,地下o既cafe已經荒廢了,但二樓o既觀景亭就有開放,可惜天陰陰,能見度底,望去梧桐島都矇查查,叫做到此一遊啦~梧桐島o既入口有個tourist information booth,我哋即管入去睇下有咩資料拎下,等我哋prep下下晝可以去邊啦,我哋拎咗一張中文一張英文,睇下又傾下時,忽然有蚊滋咁o既聲音用普通話同我哋講:「你需要甚麼?」原來個當地information小姐同我哋搭話丫,見佢發音都好標準,我哋就放膽用中文同佢溝通,佢都俾咗好多有用o既意見我哋呀,原來搭巴士遊麗水市內都唔困難~而家對下晝o既行程有少少眉目了~都話o架啦,有好多人問我哋,去韓國又唔識講又唔識睇點算,確實,英文唔係好通,但中文都真係有唔少人,特別係旅遊從業人士,都講得好好~行梧桐島o既長堤有好多方法,我哋就行路入去,其實仲可以搭小火車or踩單車~入口嗰度仲有人兜搭快艇添~

搭小火車請在此排隊~

寛闊o既長堤,寛闊o既海~~~~~可惜天氣麻麻地,如果唔係就應該靚到不得了~

長堤用咗好多麗水o既名物作裝飾,當然唔少得水族館嗰條肥嘢啦~

到登山入口了,running man們就係呢個位上山啦~認唔認得?

梧桐島o既路基本上係完整一圈,而路就有好多分叉連接海岸o既景點,多數都係原路來回,一般都唔會迷路~啲路鋪得好靚、好乾淨,我就話喇,如果住係附近,日日嚟晨運就好健康了,反正又唔駛入場費喎~

處處都有藍藍o既海,空氣好清新~

呢度叫龍洞,running man呢集成員們要係限時之內完成島上o既任務,而任務就係要同島上好多liu lung位置o既裁判玩估單雙遊戲,其中一個裁判o既位置就係呢度了~

有對識歎o既夫婦係呢度食sashimi呢,正~

又係另一個落去海邊o既景點,我都搞唔清楚邊個打邊個了~

行行下見到有座類似燈塔o既東西,咩嚟o既呢?入去平房,有個笑咪咪,著住制服o既老伯招呼我哋,原來有得影紀念照呀~

揀個鍾意o既相框,望住鏡頭「kimchi~」,就可以係個大mon度見到,仲可以send埋番去俾自己e-mail添~老伯幫我哋揀咗梧桐花背景,仲有一張係海洋背景~

就係呢個老伯了﹗除咗有得影紀念照,仲可以玩模擬駕船遊戲,要由漢陽駕番去麗水,有導航o架,如果撞咗落啲礁石度係會game over的,所以要好認真~點解要駕船?係個game入面指導你的,好似就係麗水呢個地方o既大英雄李舜臣將軍~

係麗水市四處都會見到李舜臣將軍同埋龜船,原來係1592年起朝鮮被倭寇侵略(原來啲倭寇除咗鍾意侵略中華民族,都鍾意周圍搞事…),就係全靠水軍o既統領李舜臣先至搞得掂~嗰個類似燈塔o既地方可以搭lift上去觀景,上面有少少展覽,但係全韓文,我哋就睇唔明了~

出番去有間小賣部,我哋唔餓,食物飲品吸引唔到我哋,但吸引我目光o既就係呢啲梧桐花o既相片喇,如果季節啱的話,應該成個山頭都會開滿梧桐花呢~

Running Man o既fans們,有冇覺得呢個位置有少少熟口面呢?呢度就係兩個嘉賓埋伏,係度捉住智孝搵佢做spy o既地方了~我哋一眼就認出了~

對於running man迷以外o既人,呢個地方就有無敵180度大海景了~

呢棵樹似咩?俾啲想像力…:p

有好多生氣勃勃o既毛毛蟲呀~

另一running man景點,嘉賓原本話要係竹林埋伏的,但其中一個話,唔得啦,好明顯呀~咁又係,啲竹其實都幾幼~

有長長的石卵路離開竹林,好快就落番去嗰個大o既open area了,有商店,有餐廳,有個音樂噴泉,有租單車o既地方~

如果要搭番小火車出去,就係呢度上車了~

音樂噴泉唔算好宏偉,肯定唔能夠同我見過最印象深刻o既音樂噴泉比較了~(請參閱4-2-2011:USA trip day 3(part 2).華麗酒店群@the strip, Las Vegas)


我講o既龜船就係左邊呢隻,呢啲係十六世紀o既戰船嚟o架啦,龜船o既優點係,佢係密頂,士兵係下層撐船,而上層o既就偷偷注視敵人瞄準,可以發炮,因為傳統o既戰船呢,上層o既士兵外露,佢哋都會直接被敵人攻擊~

完成梧桐島o既行程,我哋直接係出口個巴士站度搭巴士出市區了~

待續

前往其他韓國旅遊blog

Comments

comments

在《26-5-2013:釜山麗水day 2(part 1).梧桐島》中有 3 則留言

  1. 那棵樹,下面有個像人頭的大大物體,旁邊則似此「大頭仔」的手臂,他走累了,就舉高手貼著牆,頭則靠在手臂上休息。

  2. 去旅行真的可以食得特別多,平時早餐都唔會想食飯!
    梧桐島很適合郊遊! 有得運動+ 靚海景!

    • 可惜天氣不夠好,有藍天白雲應該更漂亮〜我們是不是年年都要去一次,直到碰到好天氣?上年又是糟糕的天氣…

發表迴響

你的電子郵件位址並不會被公開。 必要欄位標記為 *