30-12-2022:首爾江原道冬日滑雪行day 9(part 1).韓服美女與最強侍從遊景福宮

之前見啲朋友著韓服影靚相好羨慕,所以今次去韓國好早就plan咗要著韓服遊景福宮,因為家姐對呢個行程都好有興趣,所以就放喺後段佢哋join咗之後一齊去~不過我哋剛剛到韓國頭嗰幾日天氣好凍,都有諗過可能要取消,因為著住薄薄嘅韓服戶外活動可能唔太work,後來暖咗少少,叫做日間有啲正數嘅度數,例如零度、一度之類,應該頂得住,所以先一晚先落實租韓服嘅店家~

因為大家住唔同嘅酒店,所以約好家姐佢哋直接喺韓服出租店嗰度會合,我哋先去食早餐先~

我哋住嘅仁寺洞Nine Tree同景福宮係步行距離,可以慢慢輕鬆出門~

仁寺洞本來最多啲古玩呀、傳統文化嘢,我哋都冇乜時間逛街,不過見到呢支超大毛筆都要合照先,大家有所不知,要影呢張相都有少少唔容易,因為地面有啲結冰,而且上去毛筆度有個小小啲斜台,要行上去都好驚會掉親~

睇地圖見到步行去韓服店會經過Starbucks,即係最起碼點都有嘢食,不過好好彩…

我哋見到呢間香港冇啲Dutch and Bean Coffee,可以試多一間韓國coffee shop~

熱食選擇唔算多,詩詩即刻揀咗香腸卷,曉即刻揀咗芝士火腿多士,我同day?當然兩款都叫然後share啦,我哋咁多年來都會做呢件最美好嘅事,樣樣都想食?冇問題,share囉~

等開餐~

yeah~食物睇落都唔錯丫﹗因為喺韓國冇得飲好味嘅奶茶,所以比平時飲多咗咖啡,最近返到嚟香港咖啡因飲品都飲多咗~

睇住地圖行,好容易就搵到呢間3355韓服店,本來都search定邊度租韓服,知道Klook同kkday都有好多呢類package,冇話特別屬意邊一間,先一晚先落實要租,最後揀咗3355韓服,可以book定適合我哋嘅時間之餘,租用時間又比較有彈性,價錢亦唔貴,最後服務仲好滿意添,我放咗kkday條link喺最底,大家有興趣可以睇睇~

逸逸都嚟咗,三表姊妹聚首梗係開心啦~

男人們話唔著,所以我哋買咗2大3小嘅套票,大人嘅韓服有三款價錢,叫做傳統韓服、主題韓服同埋高級韓服,我揀咗中間嘅價位,其實都唔知有咩分別,去到覺得選擇都算多,而且啲衫都幾新淨~點解我話呢間幾好呢,因為啲尺碼好多選擇,店員問我有幾高,佢教我揀適合我身高嘅裙嘅尺碼,我自己揀咗顏色,然後再可以自由配搭上身衫,所以咁多裙又咁多上衣,可以襯出好多唔同嘅款式,而且因為裙比較啱身,我哋行到出去見到有好多女仔啲裙短chit chit咁露咗對鞋出嚟,唔知係咪有其他店家怕佢哋行出行入容易kur地整殘啲衫所以專登俾短啲,我哋啲裙就落到腳,出入係麻煩啲,但影出嚟真係靚啲架~小朋友就得一種價錢,款式相對少啲,所以最重要喺啱size,好在三個女孩子都襯到靚靚嘅韓服丫~

我裡面繼續著住長褲,上身就留低Uniqlo件超極暖底衫,出去時再黐多幾個暖包喺身,除咗件羽絨後點都唔可以叫夠暖架啦,但總算頂到一陣啦~裡面先著有藤圈+好多層紗嘅底裙,然後套上下身嘅長裙,之後再著上衣,店員再揀咗個掛飾掛喺上衣裡面等佢ding出嚟,好認真架~頭箍已經包括喺package內,如果要頭髮造型,就另加5000 won,我哋啲頭髮咁短都費事加錢整啦,只有逸逸有set頭~

小朋友就俾佢哋著埋面衫喺入面,而小朋友條底裙就冇藤圈,因為好多層,所以出嚟效果都好挺~

好可愛~

輪到曉了~

完成﹗鋪頭入面仲有個佈景可以俾大家影下相,呢張影得好好呀~我知,我知我個眼鏡唔趁古裝,但我好多年冇戴con啦,由得我少少奇怪啦~其實佢哋兩個短髮都有少少奇怪,不過依然好可愛~

我哋全部圍住睇逸逸梳頭,都好講究架,配搭嘅飾物又多,如果有長頭髮都值得試下~

原本店員話可以免費借小手袋同埋背心外套,我自己唔太鍾意件背心外套所以冇要了,手袋就唔駛啦,唔需要拎嘅物品可以寄存喺鋪頭,要拎住嘅有我哋嘅最強爸爸們嘛~

出動﹗

原來著住韓服去景福宮可以免費入場,我哋五個美女子就免費,但兩個爸爸就要買3000 won嘅入場券了,話說部自動售票機有啲問題,read唔到我哋啲信用咭,跟住景福宮個職員問我哋有冇T-money,有呀有呀,原來可以直接嘟入場,但我哋咁多個人嘅T-money咭之中,得一張夠錢嘟入去,咁點算呢?莫非要去正門窗口買飛?定喺返去3355著件韓服更方便?﹗哈,原來可以用信用卡直接嘟入場,唔早講?搞咗咁耐,時間事小,但已經凍到震啦~

終於入到場﹗當然係除衫啦~愛靚唔愛命,4歲至40+歲都做得到﹗

曉,呢類yeah嘅pose好似唔係好襯套韓服喎,不如試下…

含羞答答﹗take 1成功﹗

呢張可能係我今個trip最鍾意嘅其中一張相,好可愛~

呢張係詩詩幫我影嘅,好在低抄都未至於太勁雙下巴~

兩個韓服美少女,曉對鞋有少少穿崩添~

好自然~

曉真性情係咁,扮都唔扮得幾耐囉~

康寧殿呀,韓劇好似有見過呀~

玩下猜樓梯,即刻醒神晒~

好凍點算好?暖包係你嘅好朋友~

我哋入景福宮純粹為「取景」,路線基本上係冇,只係亂咁行,確保唔好行得太遠,免得夠鐘要還衫時搵唔切路會遲到,另外就係喺陰涼嘅地方行到凍凍地,就要搵番啲曬太陽位~

現代爸與古裝媽

好啦好啦,好凍呀好凍呀,太家著番羽絨,我哋返去還衫啦~本來就打算唔租咁耐,最主要係冇可能俾佢哋著住套韓服去食午餐,食飯有90%機會會滴污糟件衫,所以兩個鐘就差不多啦~

講起租韓服,我估入場參觀景福宮嘅遊客之中可能都有70%以上有著韓服,著韓服免費入景福宮呢一點應該都好夠叫座力,而且見到人哋著都會想著,啲租借店又開到成行成市,其實walk in任可一間都應該即刻有得租,梗係著啦~覺得搞鬼嘅係,女士多數都係著我哋呢啲叫做古代貴族嘅韓服,男士嘛,景福宮入面有好多個王,又有好多個王世子喺度行嚟行去真係好搞笑~另外,我哋又見到有一班後生仔,佢哋有一部份仔係男扮女裝囉,果然係年輕﹗正~

返到去鋪頭換番衫我哋就去食午餐啦,今日行程豐富呀﹗

3355韓服店kkday方案:

https://www.kkday.com/zh-hk/product/11709-traditional-hanbok-dress-experience-in-gyeongbok-gung-south-korea?cid=4904&ud1=detail-share&ud2=app-ios

前往其他韓國旅遊blog

Comments

comments

發表迴響

你的電子郵件位址並不會被公開。 必要欄位標記為 *