游完水各自返到自己既艙房休息、梳洗,但距離約定既午餐時間只有一個鐘頭多啲啲,曉要瞓一覺又好似太少,所以我哋索性冇瞓覺lu~哇,原來有得點播電影呀﹗我哋揀咗之前去戲院睇過既卡通片「Sing」,講既係一班平凡小動物變成舞台歌舞巨星既故事,入面好多好聽既歌,精彩豐富既畫面,搞笑既場面~不過印象中好似冇粵語配音,所以要不停解釋俾曉聽劇情講緊乜,但到唱歌跳舞時就冇晒語言障礙,人人都可以投入喇~一家人窩係張梳化上面一齊睇戲其實都好幸福丫~
夠鐘我哋就去約定既星夢餐廳集合,點知…話成個午市已經full晒﹗﹗吓?等位既機會都唔俾呀?因為缺少船上彼此既聯絡方法,所以唯有派部份人去其他餐廳張羅,部份人留係原位等未到既人,去咗其他餐廳搵位既人有咩消息又要靠一對腳去番原本既地方,搭郵輪搭成咁真係慘~記得之前去海洋神話號嗰次,基本上去到免費餐廳都一定有得食,晚餐分開兩個時段,仲一定會留咗位俾你添~今次想食個飯都有啲狼狽~後來知道原來下一層既星夢餐廳仲有位(點解唔同層既餐廳要改同一個名咁混亂),但都要等一陣,原先我哋打算去既上面星夢餐廳食中式套餐,而下面星夢餐廳就食自助餐,乜都好啦,有得食就好啦(點解坐郵輪食餐飯都咁可憐?)~

原來食個飯都要睇notice,要避開peak hours先有得食~慘~ 閱讀全文 →