8-6-2019:世界夢號家族海上假期day 2(part 1).郵輪早晨、嬉水樂悠悠

今次郵輪trip,雖然係住兩晚,但真正玩既其實得day 2,事關day 1上船晚飯,day 3早餐後就離船,頭尾兩日都冇時間玩,要玩就要好好把握day 2啦~不過我哋帶住小朋友,行動力好明顯會好低,亦預見得到冇可能試到晒所有郵輪既設施,所以嘛,一定要做咗啲最想做既嘢先得~首先梗係玩水啦,有見先一晚好難彼此係船上保持聯絡,day 2我哋決定索性約定一個時間係游泳池等,早餐就分組行動吧~

yeah yeah yeah~我第一個醒﹗﹗

難得住咗露台房,我又第一個起身,梗係要享受下悠閒時光啦~

泡個茶,坐下,望下海,正﹗呢啲情況呢,通常呢種悠閒既感覺只會持續非常短既時間,冇錯,馬上就有個小朋友加入了~

呢張都仲有少少悠閒…加入既係曉都還好,仲有大約60%悠閒,可以安靜地同佢傾下計,詩起埋身就會變0%,哈哈~

兩母女既時光~

你都醒拿?詩詩起身就叫埋爸爸啦,我哋不如梳洗好就出動啦~

day 1晚上試咗自助餐,day 2早上我哋決定試下船上另一間免費餐廳,食中式早餐~其實都係指定餐單,你幾多個人入嚟佢就上幾多人份既食物~

食物就樣樣中規中矩啦,不過叫做比起食自助餐坐得舒服啲,鬆動啲,感覺冇咁趕,都好啲既~

但問題唔係餐廳身上,而係詩詩丫,諗住食完早餐就去游水,所以直接幫佢著咗泳衣同游水尿片,點知,未食完早餐就要換片丫,徙咗一條差唔多$10既游水片,仲要入廁所同佢剝光豬先換到~

食飽飽未夠鐘去游水~我哋周圍逛逛~

泳池係咁既~

旁邊有個舞台loop住有活動~

我哋唔夠高睇呀~

泳池對上既一層有非常多既sunbed,小朋友既使用方法係…咁既~

應該要好好攤下丫嘛~曉,你有少少僵硬呀,哈哈~

我哋去咗遊戲機中心逛一逛~

玩咗爸爸最愛既氣墊球~

又玩咗我童年最愛既碌波波,原來曉未夠力碌啲波呢,碌極都碌唔到過去,變相可以碌多幾次,仲抵,哈哈~

不過呢啲都係隨便玩一兩樣就算啦,因為太貴啦~去游泳池途中又經過VR區,睇嚟要佢哋大個啲先再試了~

未去游水,去舞台嗰邊跟人跳舞,我同婆婆都好投入,曉就少少尷尬咁~

集合

泳裝美少女

女孩子s,1歲至94歲~

曉係咁問,逸逸呢?我睇番姨媽個blog先知佢哋想瞓得晏啲,所以打算遲啲join~

去游水當然最興奮既係邱曉啦,佢學咗游水一個月左右,躍躍欲試,其實我都知道佢未有耐得,所以佢好期待既水袖同浮板帶咗,但後備既必需品水泡都幫佢帶咗~世界夢號甲板上既游泳池範圍都好大,除咗有個主池係中間之外,四周仲有按摩池、兩個兒童池、嬉水池,仲有刺激長長滑水梯添~其實曉係主池腳唔到地,佢已經驚驚唔敢就咁戴住水袖攬住浮板嚟游,好快就換番個水泡俾佢lu,唔緊要啦,下個夏天就好好多架啦~

反而我哋花最多時間係兒童池,啲小朋友可以有信心地自由活動嘛~我期待既嬉水池又冇乜停留,因為如果我入去要除眼鏡,乜都睇唔到,細膽曉又唔敢玩啲兒童滑水梯,well,最緊要大家輕鬆自在~滑水梯?睇住兩隻嘢我都係冇機會架啦,唔記得菊姨有冇代表大家去試呢?

好開心呀~

鍾意曬既可以曬下太陽,唔想曬住就匿埋入條邊度啦~

婆婆、大姨同爹爹冇落水,可以幫我哋影相,佢哋亦可以多多享用郵輪提供既飲品同小食~

我同詩詩好快都要加入佢哋了,因為詩詩頂唔順要小睡一陣啦~背後係一望無際既大海,前面係溫暖舒適既陽光,餵奶既我又舒服,歎奶瞓覺既詩詩又舒服~

睡寶寶好可愛

仲有94歲既睡寶寶

呢段時間我可以休息一下,篤下電話打下機,唯一唔好既係啲音樂嘈咗啲,嘈到唔係好同到旁邊既人傾計,後來我哋要商量午餐既事時都因為周圍環境太嘈好困擾~

當大小朋友都玩到盡興,我哋就集合商量午餐事宜啦,約好時間地點就各自返房休息咯~

解散之前大家話要嚟參觀下我哋間露台房喎,曉小主人就周圍介紹下啦~

待續

前往其他遊輪旅遊blog

Comments

comments

在《8-6-2019:世界夢號家族海上假期day 2(part 1).郵輪早晨、嬉水樂悠悠》中有 2 則留言

  1. 不時看看一望無際的大海、遼閣的天空,在碧海藍天之中,在遊輪的甲板上行行逛逛,看著小朋友在嬉戲,就是一種閒適的享受。

發表迴響

你的電子郵件位址並不會被公開。 必要欄位標記為 *