都好耐冇同埋爺嫲一齊出外旅行了，佢o地年紀大了，體力冇以前咁好，兩日一夜o既行程可以應付到o既﹗所以今日我o地一家六口一齊去深圳蛇口o既青青世界(evergreen resort)渡假，青青世界同深圳灣口岸好近，所以我o地搭經西部通道o既巴士去過關就最o岩了﹗

由屯門市中心開出o既城巴B3X只需要15分鐘就去到深圳邊境了﹗經過西部通道真係好爽呢，又快又舒服﹗過關仲好少人添~零排隊﹗

青青世界要午後先可以check-in，我o地朝早先去「海上世界」行一行~

海上世界係一個充滿住美味餐廳同埋酒吧o既區，最矚目o既，莫過於呢間以一隻遊輪作造型o既酒店了﹗

周圍逛逛之後，我o地食埋個lunch就入去青青世界啦~

選o左呢間「亞馬遜巴西燒烤餐廳」，RMB$48 o既自助燒烤﹗湯、沙律、水果、甜品自助，而燒烤部份呢就由waiter們拎住一支支o既長棒棒，穿住各式各樣o既燒烤食物走過來serve我o地~

餐廳環境都幾靚靚o架，又抵食，味道都唔錯﹗唯一唔好就係個廁所唔夠乾淨唔夠靚o羅~敗筆呀敗筆﹗

坐車入去青青世界，先上酒店房休息一陣先再出發~

我o地o既係山景酒店房，除o左有酒店之外，仲有樹屋、木屋同埋豪華別墅﹗我o地有老人家同行嘛，要住係山入面o既樹屋同木屋就唔係好適合了~hee，我正在悠閒地休息~

青青世界係一個以環保大自然做主題o既主題遊覽區，好適合一家大細去渡假，有參觀o既地方、有玩o既地方、亦有睇表演o既地方﹗

夠鐘欣賞表演lu，呢個就係佢o地好出名o既「破銅爛鐵打著玩」，利用唔同o既舊家居用品o黎演出敲擊樂，都幾有氣氛，小朋友同我o地都好投入~

外面有D童年古老玩意俾大家回味回味，我係度試踩高蹺，原來好難平衡o架~點解我面目咁猙獰？因為正由高蹺上面跌緊落o黎﹗

後來去o左攀繩網遊樂場，但因為我o地太努力玩了，冇影相添﹗

又有一個小水池，小朋友可以赤腳走入去抓泥鰍﹗可能香港o既父母會覺得D水污糟，唔俾D小朋友入去，但我覺得小朋友係應該活潑D啊﹗唔好成日都坐定定打機啦~

有一個以太極做主題o既石卵浸腳池，浸完之後可以吹吹腳﹗

有幾個森林教室，其中一個講蝴蝶o架，睇完展覽就可以入去睇蝴蝶了﹗D蝴蝶好懶呢，好多隻都坐係D樹上面唔郁﹗咁就好適合我o地影相了﹗

釣魚池塘~夜色漸濃，池塘表面見到o既倒影真係同實物完全一樣呢~

酒店住客可以享用埋游泳池同埋gym，但因為天氣涼，游泳池冇開放，但我o地就去o左個gym玩o左一陣~有趣有趣﹗

晚飯食中式小菜，其中又叫o左呢個包包，送上o黎時真係哇一聲﹗因為係圖入面由高處影落o黎，見唔到個厚度，唔知道咁大？﹗所以食唔晒要打包呀~部長好識sell o野，因為佢，我o地又叫o左一jar木瓜牛奶，不過始終及唔上我爸整o個D呢~

夜晚都冇乜特別節目lu，番到房，睇下電視就瞓啦~第二朝再繼續﹗

前往其他中國旅遊blog

Comments

comments