我哋離開墓園時已經越來越大雨啦，正係度考慮一下之後o既行程，之前plan呢個清明拜山之旅時，打算除咗正事之外，想去長隆同埋去百萬葵園，我對於去百萬葵園都非常期待，因為聽講啲花花開得好靚，好似呢個時間仲有櫻花添，但好似話啲交通都好唔方便，要去就要又更多時間至ok，好啦，退而求其次，媽咪提議話重遊蓮花山，我雖然不太興致勃勃，但都接受啦，但而家大雨到咁，唔知仲去唔去得成…
搵個地方食飯先啦，可能食完嘢細雨少少去邊度都得啦~不過原來係石崗附近都唔係太多食肆，我哋都行咗唔少路(可能因為大雨，所以覺得行咗好耐…)先搵到呢間企理少少o既菜館~
呢間湖南大碗菜館總算光猛啲，睇落乾淨企理少少~ 閱讀全文
離開野生動物園，我哋移動至馬戲大劇院，但離場時人太多，搭shuttle可能要等幾班車，我哋決定行路啦﹗其實行咗大半日腳板底已經痛痛地，事關今次著咗新布鞋仔嚟，舒服就舒服，好似冇著咁，但承托唔夠好，所以就好似赤腳行咗好多路咁累，唉，都唔係第一次係咁，次次話去旅行要著air底波鞋，結果成日都貪襯衫…>_<“
到咗lu~好大o既帳幕呀~不過我哋要開餐先~ 閱讀全文
其實去番禺長隆度假區都幾方便，因為廣州地鐵可以直達呀﹗上一次返鄉下番禺時，番禺都仲未納入廣州範圍之中，所以交通出入都係靠大巴、車仔嗰啲，感覺係點對點交通，要自助遊就唔方便，但而家有咗地鐵，出廣州市中心、去其他周邊城鎮都方便咗好多，可能因為咁，番禺發展都好咗好多吧﹗
去到長隆站，出口已經有好多同度假區相關o既裝飾lu~我哋一人揀一個嚟影張相先~雖然我揀咗熊貓，但結果我哋都冇機會睇到熊貓添~因為時間太少，太多嘢睇丫﹗ 閱讀全文
繼去完西班牙之後一直未有得去旅行，我已經心癢難搔，同事朋友知我要成日去下旅行至得，問我下個trip幾時去、去邊度，我好desperate咁話「下次？清明返鄉下拜山囉~」…實在太飢渴了﹗雖然話係清明掃墓之旅，但呢個兩日一夜o既短trip，我哋一家人都好好安排一下去遊玩下，係繁忙工作之中放鬆一下﹗話晒我下一個真trip要到五月底喎，呢個都可以止一止渴先~
我哋胡氏鄉下係廣東番禺石崗西村，所以由屯門出發，搭中旅o既直通巴士經深圳灣口岸過關就好方便喇~其實朝早出發時都怕成唔到行呀，唔知係咪早兩日食滯咗，出發早上勁胃痛，痛到卷起個身，心裡面盤算究竟去屯門醫院好定係去西鐵站好，做醫生o既我心裡面已經有好幾個令人怕怕o既診斷，死啦，痛到咁會唔會胃潰瘍or胰臟發炎？要做手術就弊了…好在吞咗粒胃藥之後情況慢慢紓緩，出發去西鐵站係正確o既，我到中午時已經變番生龍活虎啦~ 閱讀全文
其實今年都去咗好多次旅行，呢排返工又唔太辛苦，其實呢一刻對於去旅行放鬆心情o既渴求都並非太大，但點解無情情會去咗中山玩呢？而且上年年底至去過一次之嘛~話說我有訂閱travelzoo呢個旅行網站o既newsletter，得知中山最近新開咗「長江水世界」，哇，好想去玩水上樂園呀﹗而且仲要係新開喎，係大陸嘛，啲嘢開得耐咗就會日久失修…:p，所以都係趁新鮮時去下好~
於是早一兩個星期講之嘛，訂車票，訂酒店，馬上成行﹗又咁啱呢個weekend星期六日我同day都off，唔駛專登請假喎，真好~
我哋搭中旅社o既中山快線，可以直接由屯門栢麗廣場上車，十幾分鐘就去到深圳灣口岸，去到中山都係三個鐘頭左右，係車上呼呼大睡，馬上就到﹗好過專登出市區坐船啦，而且坐船應該貴少少，而家我哋來回直通巴士都係$160，係咪好平就唔太sure，但就真係好方便~
話說搭車中間有段小插曲…其實都去到中山市啦，因為臨時封路，咁司機平時淨係駕呢條路線之嘛，要改路線佢唔熟家嘛，就忽然大叫：「有冇係中山人o架？我轉左定轉右好？」我哋都呆咗，唯有靜觀其變，我哋都唔識o架，好在後來都好快入番去正確嗰條路~但我哋旁邊嘛，坐咗一對夫婦，兩個都係咁係度嘈，話個司機做乜唔識路，聽到我火都嚟埋﹗心諗，果然要好好揀老公，聽佢講十分鐘都爆炸，如果對成世點算？﹗
我哋去到京華酒店落車，都十二點幾lu，而且我哋o既酒店比較近郊，所以應該唔多食肆，所以我哋都決定食埋嘢先過去check-in~上次嚟中山就係嗰間「大長今韓國餐廳」食，其實都好好味，再食都無妨，不過呢個商場咁大，都可以試下其他o既…
我哋就去咗四樓o既食街喇﹗呢度開咗張咭之後，大家就出去唔同o既攤檔揀喜歡o既食物，選擇都好多呢，全國各地o既特產都有，連其他東南亞國家o既食品都有~ 閱讀全文