今次去沙巴，其中一個重點必去項目一定係island hopping，記得以前去浮羅交怡都有去唔同嘅小島，去到邊游到邊真係好正，後來分別係Cebu同Fiji去過浮潛，本來上次去墾丁都打算帶小朋友體驗下浮潛，結果因為打風去唔成，今次都好想享受下靚靚沙灘同浮潛~Klook入面好多出海浮潛tour，眼花瞭亂，最近嘅有度叫做東姑阿都拉曼公園(Tunku Abdul Rahman Marine Park)，因為方便、船程近，應該最多人去，好似話我哋酒店房可以望到嗰兩座島添，另外又有甚麼甚麼Mamutik、Semporna島等等…我哋結果揀咗呢個Mantanani群島浮潛&卡哇卡哇河遊船tour，點解？一方面話，越遠越偏遠嘅島越保育得好，啲另一方面，或者更重要嘅係，呢個tour嘅介紹寫得好，啲相影得特別靚啩~
Klook訂咗day tour之後，旅行社send咗reminder嚟，仲開咗個whatsapp group聯絡，原來我哋嗰團有三組人，除咗我哋一家四口之外，仲有一group馬來西亞三人組同埋韓國二人組，韓國二人組用Kaokao talk所以唔係個whatsapp group入面~見到有韓國人我就心思思，究竟會唔會有機會俾我大展拳腳呢？
去美人魚島集合時間比神山晏少少，7:10酒店lobby等，我哋照一樣時間起身呀，希望可以食早餐食得輕鬆少少啦~
今次坐麵包車，比起去神山坐嘅私家車舒適度真係差得太多，係啲路況唔太好嘅路上簡直拋到瞓唔到覺~我哋上車時，馬來西亞組已經係車上了，坐最前排，原來係嚟自吉隆坡嘅馬來西亞華人，媽媽帶住一對teenage仔女嚟沙巴玩~
跟住我哋去接埋韓國情侶就正式出發了﹗我識唔識韓文原來係完全冇意義嘅，因為對情侶一直頭貼住頭喁喁細語，基本上冇同其他團友交流啦~反而我聽得最多嘅韓文係導遊Nelson講嘅，佢同我哋幾伙人講嘢會不停轉channel，雖然佢係馬來西亞華人，但佢會不停轉廣東話、普通話、英文、韓文去配合大家嘅需要，yeah，我係唔識聽馬拉話咋，其他都識呀~馬拉話主要係「業務用」啫，我唔識聽都冇損失~
估唔到嘅係，原來去美人魚島真係好遠﹗
坐咁耐車當然係瞓覺﹗三父女好快就瞓晒，我又幾精神喎~
流住屯門人嘅血，車上面瞓得好定~
我哋要坐一大輪車，先去到上船嘅碼頭，遠到中途要停休息站俾大家去廁所，睇番啲相嘅時間，原來我哋去到休息站時大約搭咗一個半鐘車，去到碼頭又搭多45分鐘左右~
休息站廁所都要收費，今次冇咁驚訝了，而且曉對於呢個廁所讚譽有加，之前嗰個又要收錢又冇廁紙，仲要地下好濕，今次就唔同呢，乾淨企理得多，俾錢俾得心甘命抵啲~休息站仲有間商店，馬來西亞媽媽好似有幫襯到~呢個時候有啲落雨，好在後來出海天氣還算幾好~
終於落車了，好興奮~
去到碼頭，入去一個大廳，Nelson安排我哋係其中一張圓枱度坐低，嗰度要填少少個人資料~
等多一陣就開始上船了~
我一心以為坐船出海去小島浮潛，會好似去Fiji時咁坐啲比較大嘅船(請參閱：10-11-2011：斐濟蜜月day 4(part 1)．超讚的Oolala day cruise)，好似遊船河咁，可以enjoy個海，又可以係船上走動走動~原來今次坐嘅係扁身、速度好快嘅船~
甚至要著定救生衣，有咁危險咩？呢個時候曉仲笑容滿面…
坐乜船我都冇乜所謂，於對於膽小曉嚟講，原來呢隻船對佢嚟講係極恐怖、極大挑戰~day 3先係吊橋上面嚇完，今次又再一大驚嚇，隻船經過大浪時拋一拋，pat pat離一離開張櫈，大家興奮地尖叫時，曉變成慘叫，一直驚到大喊，跟住開始鬧人，最後變成默不出聲強忍不安，我一直攬住佢都愛莫能助，但求嗰45分鐘船程可以盡快結束~
這邊廂驚到騰騰震，那邊廂居然瞓著咗，仲有後面唔識嗰個人都瞓著咗…(詩詩旁邊係我緊緊攬住曉)
我哋終於抵達美人魚島Mantanani Island了，可以腳踏實地啦，恭喜你呀，曉，你又克服一大難關了，但我開始擔心，返去時都要再搭多一次，到時點算？
去到美人魚島，我哋可以先settle down，需要換衫嘅人可以換衫，同埋可以「霸地盤」，將自己啲隨身物品放係稍後食午餐嘅枱上面，Nelson太太會留守大本營，幫大家看住啲嘢~
我哋見到有各種設施當然好興奮啦，小朋友們即刻跳上啲吊床度試下~
曉開心番了~雖然之前搭船好驚，但恢復都好快，叻叻~
可以好好享受呢個環境同各種設施~
我就心急想搵啱小朋友size嘅浮潛goggles，好想俾佢哋正式出海浮潛之前熟習一下器材~其實上次去墾丁之前我專登係迪卡儂買咗一幅，想俾佢哋係樓下泳池練習，結果冇咗件事~話說詩詩好快就掌握點樣用口經個mouthpiece呼吸，佢話因為佢平時成日鼻塞，所以訓練有素喎~
沙灘淺水位置水係幾清嘅，不過冇乜嘢睇，純粹可以俾佢哋自在咁練習一下，好在有事先練習，如果唔係之後出到去波濤洶湧嘅海中心，真係乜都做唔到呀~
前往其他馬來西亞旅遊blog