24-12-2023：沙巴熱辣辣聖誕遊day 3(part 3)．神山一日遊(下)之神山公園植物導賞、一站式中菜大集匯@金糖

離開Desa Dairy Farm時，我哋都唔太肯定究竟個tour結束未，時間已經有啲晏，應該差不多夠鐘要回程，但印象中又好似話會去一去神山公園，正考慮問唔問之際，Jeff駛入咗去神山公園，停好車帶我哋去逛了~呢一刻嘅我比起以前任何一刻都fit，以前從未跑到過10公里而家跑到了，以前廿幾歲去遊輪時攀石，要人哋拉我上去敲嗰個鐘，最近同啲女去玩，自己快手快腳就爬上頂，講呢啲做乜？我想話，我相信我有生之年應該可以去爬神山嘅，不過唔係今次囉，啲細路咁細，今次去神山公園睇下啲花草樹木先啦~

花花草草好有趣，原本對於我哋外行人嚟講，每一種睇落都唔差得幾多，好難分辨邊種打邊種，但經過Jeff講解之後，居然之後就會認得佢講過嗰種植物~

小朋友們隆重介紹嘅係—-蘭花

蘭花有好多品種，但打blog嘅呢一刻隔咗一個半月，我都唔記得呢種蘭花有咩特別了~

可能係特別靚？或者特別高？

同我差唔多高，真係比香港平時見嘅蘭花高好多~

有咩特別？

為咗要記錄呢種植物，我哋專登影咗呢張相~

曉 -> 唔好；詩 -> 食；我 -> 如果唔係個嘴會痲痺；大家記住啦，唔好食啲花呀~

入嚟呢度除咗參觀花草樹木之外，另外一個重要目的，估計係去埋個廁所就搭長途車出番去市區了~

之前講過，原住民有好多天主教徒，我哋一路上就見到好多呢啲聖堂嘅路牌了~

呢日早出晚歸，朝早6:50集合出發，我而家睇番，晚餐第一張相嘅時間係19:05，保守估計我哋day tour時間都有10-11個鐘，究竟邊一程車有瞓覺邊一程車冇瞓覺我都唔太記得lu，冇瞓覺嘅，大概係傾下計，睇下預先download嘅Netflix真人show影集「恢復單身的人們4」，或者玩下手機遊戲Project Makeover之類啦~

返到酒店真係攰到唔想郁，冇理由食番先一晚同一間嘛，更加唔想食斜對面嘅KFC或者Burger King，因為平安夜，我哋酒店嘅餐廳已經full booking，唯有行遠少少搵食啦~

發現呢間「金糖」，裝修似靚仔版嘅港式茶餐廳，企企理理，就入去食啦~揭揭餐牌，好多嘢食喎，簡真係集眾家之大成，各種出現係唔同鋪頭嘅菜式都有得食，咁就可以好任性咁點菜啦~片皮鴨﹗海鮮﹗點心﹗竟然可以同枱上桌~

不太片皮嘅片皮鴨，大槪只有三份一係平時食嘅純皮片皮鴨，有三份一似以前去北京時食嘅半皮半肉鴨(請參閱：1-6-2014：三十登長城day 3(part 2)．北京必食大董烤鴨)，有三分一連骨嘅部份…似深井燒鵝~^^”

食食下一位講英文嘅侍應走過嚟，同我哋講唔知啲乜嘢「salt and pepper」，奇怪，點解點晒菜仲有嘢問我哋呢？

後來答案分曉，原來隻鴨有二食，個鴨架佢幫我哋椒鹽炒，早知問呢樣就要求滾個湯嚟飲啦~

同一餐有得食唔太搭調嘅可愛奶皇包~

蜆湯，我哋唔知叫片皮鴨會送兩個白飯，點咗一個碟頭飯，結果還番一個白飯俾餐廳了~

食碟菜添啦，雖然叫菜心，但口感同香港嘅唔係好同呢~

食完恢復少少體力，我好想返酒店之前買一樣嘢，記得嘛，我哋day 4會出海嘛，個防水手機套仲未有著落，我想作最後嘅掙扎，睇下可唔可以係最後關頭買到，附近會唔會有啲鋪頭未關門呢？

穿過一個個商場，八九成嘅鋪頭都關咗門，其他都陸續關門中，差不多要放棄之際，見到一間賣手袋背囊嘅鋪頭，我話：「防水手機套都係袋嘅一種丫，過去望下啦~」我探頭探腦咁望下有冇得賣手機用品之類嘅嘢，老闆係華人，用普通話問我：「找甚麼？」我講咗俾佢聽，居然…有得賣呀﹗﹗收埋係入面冇掛出嚟，實在太太太lucky了~而價錢更係合理嘅RM15~