打算要出海浮潛嘅人跟住Nelson再次踏上嗰隻「驚驚船」，曉嚟嘅時候雖然好驚，但佢好勇敢咁自願再搭一次，應該因為佢都好想去浮潛吧~今次佢心情放鬆好多，而且船程只係幾分鐘，好快就到達浮潛嘅目的地~
心情輕鬆曉+後面的Nelson導遊
過往浮潛嘅經驗都係就咁落水游，只係戴住浮潛goggles+/-蛙鞋，Fiji係海中心浮潛嗰次有手握住浮條，但後來去Beqa Island時都冇其他助浮嘅物品了，但今次全人類落水都著埋件救生衣，以今次嘅狀況嚟講的確係件好事嘅，因為呢度真係超級大浪﹗﹗﹗
曉詩浮潛初體驗
我同day決定一人顧一個，佢捉住隻詩，我就顧泳術叻啲但細膽啲嘅曉，好在船家拉咗條掛住一個個水泡嘅長繩係海面上，叫做劃咗一個範圍俾大家「自由活動」，因為太大浪，我都唔敢離開條繩，總之一隻手keep住握住條繩，另外我點都要有身體一部份同曉連埋一齊~大浪嘅程度係，只要你乜都唔做，就會隨住海浪飄走，所以要捉住繩，或者不停游~太努力去控制身體同埋唔好離隻船太遠，其實我都冇乜心情睇海入面啲魚，感覺今次水比較深，所以冇話珊瑚或者魚群好密集咁~魚嘅種類都多嘅，只係見唔到Mo仔，曉話啲珊瑚好醜樣喎…^^”
沿繩前進
游游下好似見唔到爸詩組係附近，有啲心慌慌，我同曉決定返去船上面，由高處搵搵佢哋，要掙扎返船都花一番功夫同體力，好在，原來爸詩組早過我哋上番船，原來詩詩嗌凍，係嘅，今日天陰陰，上番船之後仲有少少雨添，總算順利完成咗浮潛呢個行程~
有水泡+浮繩劃一個範圍俾大家活動
返到美人魚島，未夠鐘食飯，可以享用各種設施，我最高興嘅係，原來可以免費任玩SUP (stand up paddling = 直立板)同埋獨木舟﹗﹗﹗本來想係墾丁時玩SUP，點知打風冇得玩，本來想係Tanjung Aru Beach參加日落SUP tour，點知太遲book book唔到，雖然話之後第二間酒店都有得付費玩，但就唔俾咁細個嘅小朋友玩，所以今次係冇預期之下居然有得玩，仲要不限時任玩真係好surprised﹗點解我對SUP咁執著呢？睇番啲舊blog，先知原來係2014年去夏威夷旅行時被吸引嘅~(請參閱：29-7-2014：加州婚禮+夏威夷day 4(part 2)．充滿活力的威基基海灘)沙灘有浮波波圍住，仲安全又放心~美人魚島呢邊雖然話俾你任玩，但都有安全措施要做足，就係一定要著好救生衣先准借工具~兩樣都想玩，玩邊樣先好？我哋分兩組，每組一樣啦﹗﹗
爸曉獨木舟二人組，曉曉掌舵~
我同詩就玩SUP先~
到我哋試獨木舟啦，俾詩詩撐都唔驚，因為點都仲係個範圍入面，最多去到咁上下我修正一下路線便ok了~
爸爸平衡到喎~
曉話…
…我都企到呀~
呢個人都好威水喎~
仲有我﹗
兩種都試晒，如果好似今次咁嘅平靜海面，我鍾意SUP多啲，可以坐又得、跪又得、企又得，既考你方向感、控制技巧，更重要係要平衡，一個唔留心可能會跌落水添~如果要長時間係海面，可能獨木舟會安心啲吧，雖然划起嚟費力啲，但冇咁容易反艇，稍稍轉換一下姿勢都未至於會即時跌落水~後來我哋又交換道具，又交換partner，食完飯後又再玩多次添，正呀~
午餐係自助形式，食物品種、味道都唔錯呀，炸雞太好味，食完第一轉再想拎已經冇晒了~
好多款式~
我兩個女都真係好乖，呢啲東南亞口味餐連續食咁多餐真係唔太慣，但佢哋唔特別鍾意食都乖乖食，冇話食少少之後嗌肚餓扭食其他嘢，抵帶你哋周圍去旅行~
午餐後除咗encore SUP同獨木舟，當然要周圍影下相添啦~
如果冇咁多雲，個海啲色應該仲靚~
嘆~
用呢款手機套要留意，有冇水滴黐係鏡頭前面，如果唔係就會變成咁~
曉你唔怕高咩？
不太同步~
媽媽我推你丫~
blu blu blu~
招牌
到時間差不多，今日稍後行程唔會再落水，我哋去淋個浴，換番乾淨衫褲就準備離開個島啦~
前往其他馬來西亞旅遊blog