之前去嘅樹頂吊橋，其實係位於波令溫泉範圍內，溫泉？熱帶地區嘅溫泉？之前睇啲人嘅comment，都話係熱辣辣嘅環境浸溫泉有另一番體驗，所以知道有呢個行程，我哋都帶定泳衣、毛巾、替換衫，諗住好好體驗一下~但Jeff聽到我哋話想浸，佢就有啲猶豫，然後勸告我哋唔太好，只建議我哋浸腳~吓，好似有少少失望咁…
去到果然發現同我哋想像中嘅唔太一樣…
我哋諗住溫泉，梗係好似日本嗰啲咁，好寧靜舒適relaxing，又或者好似大陸嗰啲似個主題樂園有得浸有得食咁~原來波令溫泉人好多，鬧哄哄，甚至可能唔太乾淨添~浸腳就好丫﹗爸爸居然怕麻煩唔除鞋，得我哋三母女浸，反正都成身濕晒啦，唔爭在啦~
足湯有三種溫度，我哋由冇咁熱嘅開始浸，但浸過最熱嗰個之後就唔想返轉頭了，行完山嘅雙腳，係溫泉水入面relax過之後真係消除疲勞，成個人煥然一新啦~
咦，大家都有望鏡頭喎~
舒服
兩對美腿
我唔要咁熱~
大家揀自己鍾意嘅溫度~
呢度都有啲「家族風呂」，但唔係日本咁一個個獨立房間，只係一個個有得開水喉嘅小浴池，室內室外都有，好密集、鬧哄哄的，係就係冇乜氣氛，但我諗溫泉水功效唔會因為冇乜氣氛而減少嘅，雖然心情可能冇提升得咁多~
浸完腳我哋去洗手間換件乾淨衫就去食飯啦，今次係第一餐「團餐」，曉居然食得非常滿意喎~Jeff話呢間係穆斯林餐廳，但材料、烹調方法、口味居然同我哋廣東菜差不多，四餸一湯，菜多肉少，有少少入camp feel，我都覺得唔錯喎~
我哋四個食清光﹗記憶中個椰菜係炒得特別好食，平時椰菜總會好頹咁出現係啲學生餐度，因為唔駛點洗菜嘛，放得耐又唔會焗到黃晒，但香港嘅飯堂飯商總係唔太尊重棵椰菜，好似求其煮熟咗就算，但今次呢碟椰菜可能放咗啲我哋唔熟悉嘅香料吧，惹味啲，好味好多~
好味認證~
下一個目的地去Desa奶牛牧場~
都要坐好一段路先到，而且路上非常多車，入去牧場車要排好耐隊先入到去，仲只能夠停係路邊，好似啲人過年時泊晒啲車係街邊咁~雖然開放俾遊客參觀，但原來Desa Dairy Farm係正正式式運作中嘅商業農場嚟架，識咗佢之後，我哋係超市見到有得賣Desa出產嘅牛奶，感覺份外親切~
見到綠油油嘅牧場了，牛呢？
Desa Dairy Farm
影下個招牌先，門口有民族音樂表演~
重點項目，Jeff直接帶我哋去買雪糕，正式嚟講係frozen yogurt，有原味同朱古力味，可以揀唔同toppings，我哋之中係詩揀咗Oreo toppings，我就想試下原味~
yummy~
買好雪糕就去睇牛牛了，大家都係一邊食雪糕或者飲牛奶，一邊觀看擠牛奶(表演？)，其實都唔算係表演，因為工人真係只係工作中，帶住一批又一批嘅乳牛入嚟，接駁擠奶裝置，擠奶，拆除，跟住又到下一批~
睇過關於北海道農業學校嘅漫畫「白銀之匙」，又睇過一本書，講一對美國夫婦歸園田居立志過100年前嘅生活，佢哋養咗隻羊要每日擠羊奶，加上自己都做過「乳牛」兩次，就知道，其實乳牛們(同母乳媽媽們)真係好需要定時放奶，谷住冇得出就好易塞奶甚至乳腺炎，見到啲乳牛漲卜卜咁行入嚟，輕輕鬆鬆咁行番出去都好治癒^^”~
我要影相，媽媽幫我拎住先啦~
媽媽導賞員
Desa牛奶與朱古力奶，我哋食緊雪糕時，見到有人拎住一盒1L嘅嚟飲，真係好支持﹗
睇完擠牛奶，Jeff帶我哋去睇小牛，嗰度可以餵小牛架，可以買青草或者牛奶嚟餵，上次去大棠有機生態園時詩對於餵小動物不太雀躍，估唔今次佢好有興趣餵喎~
可愛的小牛
我又餵~
就係佢啦﹗有隻小牛好有趣，淨係肯食草，唔肯飲奶，好似同我哋講：「我大個啦，唔飲奶奶啦，我食草就得啦~」知道啦知道啦，咁我哋餵奶奶俾其他弟弟妹妹啦~
cute cute牛和cute cute曉
出去花園可以見到壯闊嘅景色呢~
moo moo合唱團，佢哋真係moo moo聲咁唱架~
有架大拖拉機，個個小朋友都爭住要坐上去影相﹗
四周圍逛完、影完相之後，其實三母女心掛掛一件事，我哋要去帶呼呼返屋企呀﹗咩嚟？話說我哋落車去洗手間時經過一間冇乜嘢賣嘅紀念品店，見到有得賣乳牛毛公仔呀~平時係屋企玩煮飯仔，曉有隻透明乳手叫做呼呼，當佢要煮啲菜式需要用牛奶、芝士等各種奶製品時，就會叫呼呼過嚟，即擠即用，好新鮮~但呼呼一直只有靈魂，而冇一個軀殼，我哋終於係呢度帶到佢嘅身體返香港啦﹗所以呢隻公仔好特別，未俾錢就已經改好名了~
上返車，當然就係不停幫呼呼擠牛奶，同埋不停試飲牛奶咁去下一個目的地啦~
前往其他馬來西亞旅遊blog