21-3-2015:懷孕扎記35w0d.乖乖穩步生長

嚟到懷胎十月接近尾聲,呢段時間會檢查得密啲了~隔咗兩個星期冇見,BB呱你最近長成點呀?我今次最關注兩樣嘢,頭仔向下未?size ok嘛?

嚟到35週,我第一次覺得自己腳有水腫了,之前去按摩啲按摩師不嬲都話我腫(即使未陀baby佢哋都係咁講^^”,我不嬲都話係肥~),但我唔覺,西醫嘅水腫係指按落去骨嘅位置上面形成個小凹痕至算,所以直至34w6d我先第一次衷心地覺得有腫~好在係返工嘅日子,拿拿林量一量血壓同驗一驗有冇尿蛋白,兩樣都正常咁都放心啲~所以腳腫嚟講主要係舒唔舒服嘅問題了,好在鞋都著得落,不過腳感覺重少少囉~

今日檢查時再量血壓同驗小便都正常,體重嘅增長我都有少少擔心,BB又大隻,我又有水腫,會唔會重得好恐怖?﹗好在依然未破70大關,今日--69.5kg﹗咦,對比番兩星期前原來冇重到喎(請參閱:7-3-2015:懷孕扎記33w0d.我們的長腿厚嘴唇性感美女?﹗),呢段時間肥B唔肥媽都好成功﹗似乎啲惱人嘅胃酸倒流都幫到我唔少,幫我控制唔好咁大食~

我哋睇下BB呱啦:螢幕快照 2015-03-21 下午4.23.04

頭仔﹗想像下頭仔直徑8.68cm其實都幾大了,如果萬一呢個週數生出嚟都唔會太細粒了~照頭仔嘅好消息係,頭仔向下啦﹗向下啦﹗S醫生話嚟到呢個週數如果胎水正常的話都甚少再調轉番上去了,我哋可以安心等作動啦~yeah~期望順產成功咗一小半啦~螢幕快照 2015-03-21 下午4.23.09

肚仔﹗今日BB呱唔太乖,一直冇吞胎水,所以做唔到完美嘅胃bubble,S醫生不太滿意個plane添,不過佢都話呢個週數度肚仔會相對比較大誤差,媽媽個肚皮面圓圓,所以啲超聲波係左右兩邊唔係penetrate得咁好,變成畫圓嘅線條可能有少少要估,而肚圍係計算胎兒體重嘅formula嘅比重亦比較大,所以個估計體重唔可以盡信囉~螢幕快照 2015-03-21 下午4.23.07

繼續長腿嘅6.62cm﹗

螢幕快照 2015-03-21 下午4.22.52

plot落graph就更加一目了然了~各方面都穩步成長中﹗繼續係莫名奇妙嘅長腿囉~:p用今日嘅parameters嚟計,現時呢一刻嘅估計體重係2.7kg﹗75-90 percentile之間~如果按呢個趨勢生長,足月的話肯定超過7磅啦~講起呢樣,原來之前同奶奶傾開先知道佢好擔心BB長得唔大,佢成日都覺得我個肚唔係好大個,所以之前我都show過growth chart嗰啲俾佢睇希望佢放心,但結果令佢放心嘅居然唔係呢啲客觀數據而係我個「裸肚」,睇過我哋啲maternity photo佢就好安樂啦(請參閱:14-3-2015:懷孕扎記34w0d.maternity photography@SENS Studio之成品篇),原來個肚都幾大~:p

其實我自己見一直係75 percentile我就唔怕佢細只怕佢大,好多人都話BB大隻雖然生出嚟好湊,但會生得好辛苦,甚至生唔出要開刀~雖然,究竟幾時BB會出世都係上天註定,但我都(無謂地)係度左諗右諗佢幾時出世係最好,首先一定要足月啦,唔怕煩講多一次,BB滿37週就叫足月了,比起預產期早兩至三星期出世都唔算早得滯㗎﹗但如果足月後越遲出世又怕佢太大粒,但早的話又容易啲會黃疸,萬一要照燈的話餵人奶又會困難啲,另一方面,陪月姨姨同我預留嘅時間係「預產前一後一」以後嘅一個月時間,如果37至38週出世的話返到屋企可能未有陪月姨姨嚟幫手喎,好矛盾好矛盾,而家心目中理想地希望38週半至39週出世就好了,出世後係醫院住多兩三日返到屋企啱啱好~我要唔要滿咗38週後拼命去散步?﹗不過都唔到我哋諗得咁多吧?﹗

去到呢啲時刻仲會講起我哋自己BB時嘅出生狀況,我特別關心BB識唔識頭仔向下,係因為我自己本身係unstable lie,點解特別關心會唔會太大隻,係因為我出世都有7磅半﹗問番媽咪,原來我係38週左右出世已經有7磅半了,而且38週出世係催生,主要因為我嘅unstable lie--我打橫嚟瞓﹗我係ECV BB嚟㗎,ECV(external cephalic version)嘅意思係指胎位唔正時,醫生係媽媽肚皮外面推番BB個頭向下,以促進自然陰道生產~但我ECV咗一次之後,好快又打番橫,今時今日應該唔會做二次ECV,但30年前確實如此,第二次ECV之後醫生決定要催生俾我早少少出世了~螢幕快照 2015-03-21 下午4.23.01

除咗size之外,我哋仲check check臍帶血流嘅情況,都係正常範圍之內,good﹗螢幕快照 2015-03-21 下午4.22.56

最後有可愛嘅腳板底同大家say goodbye~下次見~

前往其他懷孕扎記blog

Comments

comments

2 關於 “21-3-2015:懷孕扎記35w0d.乖乖穩步生長” 的評論

發表迴響

你的電子郵件位址並不會被公開。 必要欄位標記為 *