由17至18週左右開始感覺到第一次胎動(請參閱：27-11-2014：懷孕扎記18w5d．奇妙時刻第一次胎動)，留意BB呱嘅作息活動就成為我每日生活重要嘅一部份，郁得好猛烈時我自然就笑咪咪囉，郁得少咗啲又會憂心忡忡，又會想像下究竟佢做緊啲咩呢？瞓緊覺？玩緊臍帶？做緊伸展體操？
每個星期我同老公都會一齊睇「What to Expect」app嘅video，講嗰個星期BB呱嘅development，到佢可以聽到嘢嘅週數時，我哋就更加落力同佢傾計啦，當然佢唔識回應啦，所以就變成媽媽同佢講嘢時，爸爸就會「鍊」高把聲扮BB聲﹗:p vice versa～不過我哋都會將胎動變成「yes」嘅答覆，呵呵，有時買BB呱嘅嘢、幫佢改名，我哋都會「問佢意見」㗎～A嘅呢邊兩下，B嘅嗰邊兩下丫唔該－－結果都係唔睬我哋囉﹗
去到廿幾週大家都會講到聽音樂胎教呢個課題，我哋都係度摸索緊BB呱嘅音樂品味～呢晚佢好忙喇，要聽下爸爸俾佢聽嘅音樂同埋媽媽俾佢聽嘅音樂，我哋就係度觀察佢嘅反應﹗﹗似乎BB呱都係鍾意聽啲輕柔啲、旋律優美嘅音樂，樂器方面好似係鋼琴、弦樂嗰啲比較得佢心，而歌手方面都鍾意甜美嘅女聲多啲～(我哋嘅判斷純粹based on佢胎動嘅強度﹗可能佢唔係開心到手舞足蹈，而係發脾氣話夠喇夠喇都未定～:p)所以我嘅conclusion佢都鍾意人人稱頌啱胎教用途嘅莫扎特嘅古典音樂，另外迪士尼鋼琴音樂佢都鍾意(youtube有個音樂人叫做AJ Rafael，彈得好好聽～)，流行歌手方面，陳綺貞、K-Pop Star 3嘅權珍雅佢都好喜歡～但媽咪鍾意嘅CNBLUE同埋五月天BB呱就好似興趣不大了～
時時一齊聽音樂、一齊傾計，我感覺我哋越來越愛呢個未曾見過面嘅小人兒咯～期待同你見面呢～不過唔准心急，媽媽講過10萬次，四月至可以見面﹗﹗
前往其他懷孕扎記blog