之前係BB展滿載而歸(1-2-2015：懷孕扎記28w1d．興奮買買買@BB春季購物節)，而我係個blog度post出嚟嘅東東其實仲未係全部㗎～仲有兩件大嘢要隔個幾星期至可以去門市取貨，我都好期待拎埋張BB床+床褥同埋搖床high chair返嚟呢～呢個星期五晚我哋去咗沙田連城廣場嘅荷花分店取貨，要睇下有幾大舊先知道搭的士定係call貨van呢～
就係呢兩大箱，上面再加埋我「一場去到沙田，不如睇下IKEA有咩賣」嘅BB床上用品，咁大舊，荷花嘅職員都建議我哋call貨van啦～
我心目中嘅貨van，第一個閃出係以前用過嘅雞記，我打1083問雞記電話號碼，接電話嘅人話咁夜收晒隊咯(當時接近晚上九點鐘)～冇雞記，諗番起近年好hit嘅GOGOVAN，即使電話得番廿幾%電，我都即時download個app嚟試試啦～
真係要激讚呢個app呢個服務﹗﹗
操作極簡單，只要用一隻手指篤篤篤，輸入出發同目的地嘅區域、時間、有冇人跟車、需要嘅車種、有冇咩特別request(例如貨物嘅大小等等)，馬上報價，一click確認，三兩分鐘之後被指派嘅司機就會電話聯絡你啦，你再同佢交代詳細嘅pick up地點，成交﹗非常方便快捷～格價就冇㗎啦，不過真係100個方便～司機好准時嚟到，當然貨van就梗係冇私家車坐得咁舒服啦，但呢個司機嘅駕駛仲穩過好多的士司機，坐得我都好安心(原本對於貨van有啲保留，因為聽講真係有好多年輕嘅貨van司機會high嘢開工，聽到都擔心⋯)～送到屋企樓下，快靚正﹗我諗下次如果再需要call貨van都好有機會再搵GOGOVAN幫手呢，雞記慘慘咯～
返到屋企都急不及待要打開嚟試一試過位，張搖床high chair好fit床邊個位置丫﹗諗住開頭BB夜奶食得比較密嘅日子可以瞓係我哋身邊，實踐產前講座教落嘅「母嬰同室」，到食少啲夜奶，就可以出番去瞓自己張床仔咯～張BB床我哋遲少少至砌，而家仲係紙箱入面，遲啲再介紹啦～