6-3-2011:澳門戒指團第二部day 2.璀璨澳門+水舞間

話明係度假嘛,所以旅程o既第二日都要晏啲出動,要盡情咁瞓丫﹗呵呵~所以定o既limit係…自助早餐o既最後時間﹗去到餐廳,啲食物賣相認真麻麻地,而且啲品種好「鄉村」,例如會有就咁蒸熟o既一堆蕃薯同埋南瓜之類…但諗法係,都食啦~唔夠飽再去小湯鎮搵嘢食,點知食落嘛,味道樣樣都ok喎,真係唔好睇小佢﹗

我哋訂咗搭十一點幾o既shuttle出番去拱北,因為我哋今日要過去澳門了~重點項目呀~

過關時已經肚餓得不得了,正係度商量去邊度食好,開頭都諗住直接過到關就搭免費shuttle過去新濠天地威尼斯人嗰邊,但出去時見到MGM Grand o既shuttle喎,諗起Las Vegas o既超豪華MGM Grand,都好好奇究竟澳門呢一間比唔比得上佢,不如先搭shuttle去MGM睇一睇再算啦,可能嗰邊都有嘢食呢~

雖然冇Las Vegas o既MGM咁華麗,但呢個室內庭園都好優雅好靚啊~

賭場入面冇養真獅子,但都養咗真雀仔﹗cute~

好似啲fairy tale o既場景呢~花花花~ 🙂

係MGM Grand入面啲餐廳都好貴丫﹗有個brunch buffet望落好吸引呀﹗要$3xx,睇落都物有所值o既,因為見到啲龍蝦同埋長腳蟹都任食呢,連啲麵包餅點都好吸引﹗不如我哋結婚周年嚟食啦~食得起o既有一間港式餐廳,但更唔抵囉,食啲好普通o既嘢反而要$7x-8x﹗我哋都係決定出番去街外面搵嘢食,先前shuttle經過都見到有幾間~

我哋揀咗呢間叫做「公雞」o既葡國餐廳嚟食~

裝修好colourful,坐得都舒服鬆動﹗好多鬼幫襯呀,莫非真係咁正宗?我哋得兩個人,所以叫咗兩個main course啫,上面嗰個係排骨同埋蕃茄薯蓉,下面嗰個係魚肉餡o既蛋煎餅,兩樣都好好味~因為對於葡國菜冇乜概念呢,所以都唔知咩係特色食物,不過呢兩道菜對我哋嚟講口味都幾新鮮﹗

MGM梗係要影下隻獅子啦,本來想比較下呢隻同埋Las Vegas嗰隻邊隻大,但係搵番啲相,發覺我哋係LV冇影「人+獅子」喎,冇得直接比較,不過嗰隻恐怕係大到影唔晒所以先冇影囉~

因為MGM同埋新濠天地係同一集團,所以有免費shuttle貫穿兩間酒店丫﹗good~所以我哋直至而家為止,交通費都係$0﹗yeah~MGM果然好豪﹗連短短車程o既shuttle bus都有個人電視仔,講o既係佢哋間酒店+shopping+美食+賭,好吸引呢,達到目的了﹗

我哋去到新濠天地首先換咗水舞間o既入場票先,之後就直奔過去威尼斯人拎戒指了,好期待啊~

好鍾意丫﹗呢個就係我哋一早揀咗o既款式,係訂購之前我都不知去咗個網站度幾多次,好陶醉咁望住呢一對戒指﹗佢哋係The Kiss Anniversary呢條line o既人氣no.1款式嚟o架~(http://www.thekiss.co.jp)香港大部份結婚戒指都係白金(18k white gold),所以價錢平啲,但The Kiss出品o既,一條line叫The Kiss Couple,賣o既係情侶戒指仔,都係用銀嚟做,另一條line叫The Kiss Anniversary,賣o既係結婚戒指,全部都係鉑金(platinum),所以貴少少囉~anyway,既然咁鍾意,而且戴成世喎,貴少少都ok o既~ 🙂

拎完戒指,行李又重,又攰攰地,與其勉強逛街,不如買杯嘢飲坐下啦~我哋係威尼斯人food court o既呢間果汁smoothie店買咗杯citrus類o既冰沙,好fresh呢~感覺有少少似康熊貓幾年前係美國帶過我去飲o既Jamba Juice o既feel~

路過威尼斯人賭場嗰邊,有美女子樂團現場演奏喎,係好時尚o既弦樂四重奏﹗仲要著住性感晚裝裙呢~讚﹗

平時去旅行,食咗啲咩都想post出嚟俾大家睇下,但我哋食咗o既晚餐真係不堪入目,所以我用文字簡單講下好了~因為見呢個trip都花唔少錢,之前又食咗好嘢咯,所以就決定dinner節儉少少,去咗威尼斯人o既food court解決﹗叫咗一個雲吞雞餐,但唔知點解個雲吞雞o既湯底係人蔘雞味,而且超級超級油﹗另外嗰個韓式炒粉絲都ok o既,但相對香港嚟講就好貴囉,food court咋喎~大家記住,唔好見佢個價錢就諗住會有相當o既水準,係冇關係o架﹗如果有得選擇,我會recommend大家唔好去威尼斯人o既food court食嘢…

好啦好啦,另一個重頭項目﹗就係去睇水舞間~

話說本身係十二月嗰次去睇水舞間o架,但嗰次臨時機件故障取消咗演出,為咗補償大家,去到時居然每人除咗有張半年內再睇番相同票值o既換票券之外,仲有一張港幣$1000係個信封入面,真係嚇死人了﹗哇~太興奮了~所以我哋上次個trip其他使費幾乎係$0囉,夾埋嗰$2000都cover咗啲船票、酒店、交通…了﹗所以今次咪去補番睇囉~但我哋預約番座位時都好full呢,個服務員話係最後四張飛了~都擔心個位好唔好…

坐低咗就發現完全冇問題了﹗舞台大致上係圓形,最主要演出o既位置就係中間o既水池部份,而貴飛同平飛o既最大分別,就係貴飛可以睇到出嚟中間水池o既水道,同埋後面個大screen,但我睇呢個分別似乎俾多嗰兩三倍o既價錢就唔係太值了~我哋呢張$380 o既飛都夠晒好啦,唔值得俾到$1280﹗

開show了~都幾大方,俾人影相,只係唔准用閃光燈啫~

以水做主題o既show,梗係唔少得跳水項目啦~

呢度有個疊羅漢~

呢度都好impressive丫﹗一個個小噴泉+燈光,好浪漫呢~

最近先睇完Las Vegas o既「O」,都係用水做主題,本來都有啲擔心「水舞間」比唔比得上佢,但嚟到發現大家都有啲唔同o既點子呢~呢個巨型噴泉「O」就冇喇﹗

呢個鞦韆就係「O」度睇過~不過依然精彩﹗

係咪唔知我影乜呢,呵呵,因為速度太快了~係電單車特技丫﹗雖然同水舞間個故事九唔搭八,但大家都睇得好刺激呢~記起好多好多年前同day係香港去睇過花式單車同埋花式電單車,嗰時第一次接觸都覺得好新奇呢,其實唔會俾錢去睇呢啲show o架,但唔記得點解有免費飛,所以去咗睇,大開眼界囉~

軟骨功﹗勁﹗

水舞間整體都好好睇呀,而且故事性比起「O」強,好值得睇,大家趁機會去睇咯,而家好似cityline有得網上買飛呢,咁就方便好多了,另一個option係,中旅社都有啲水舞間package o架~otherwise自己係佢官方網買飛o既話,啲飛好少o架~

做完個show都好夜啦﹗搭番shuttle出去碼頭,要趕10:30pm o既船返香港丫﹗好趕好趕好趕~落車之後跑跑跑跑跑,好在趕得上了…呢個relax o既trip結果係疲倦之中結束﹗:p

Comments

comments

在《6-3-2011:澳門戒指團第二部day 2.璀璨澳門+水舞間》中有 4 則留言

  1. 公雞好好食呀,下次多D人去便好了~ 可以食多D 野!! 水池有d閃閃真的很靚!仲有project 在水簾的影像真的很華麗!
    [版主回覆04/11/2011 11:55:00]replied

  2. Re day:
    好食丫﹗都值得推介大家去食下~不過真係可惜得兩個人,試o既款式太少~
    是啊﹗好浪漫呢~ 🙂

  3. Re Fion: 歡迎你到訪我個blog﹗ 如果係佢個官方網度買好似真係得好少飛放出嚟,不過如果你諗住係澳門住一晚,可以考慮去中旅社買啲package,應該啲飛會多啲?我都唔知呀~不過定到日子,早啲book應該都ok o既~

發表迴響

你的電子郵件位址並不會被公開。 必要欄位標記為 *