自從開始跑步同埋參加過DISNEY RUN同SNOOPY RUN之後，一直都有留意不同的跑步活動，才發覺原來香港有超級多不同類型不同主題的跑步比賽。長跑最怕悶，所以對於選擇比賽路線係好重要，最怕就係重覆路線的倉鼠跑，所以下一個報名的比賽係因為恆仔同逸逸喜歡佢既主題而參加的TRANSFORMER RUN，我情願跑3KM都唔要挑戰倉鼠跑8KM。
直至茶記為食跑HUNGER RUN的出現，終於激發起我要挑戰跑10KM的決心。
因為10KM的路線係跑將軍澳跨灣大橋，將軍澳跨灣大橋是2022年尾才正式啟用，它是全港首條三合一海上高架橋，同時具備行車道、單車徑和行人路，我一直都好想去行下不過一直未去過，反而爸爸媽媽在我的推薦下反而特地走了一趟。
跑步活動以香港特色的茶餐廳為主題，主辦機構膳動衡FOOD SPORT將香港茶餐廳的美食和文化糅合跑步及慈善，鼓勵港人跑得開心，捐得開心，食得更開心，同時為受惠機構 「J Life 啓愛共融社區中心」籌集食糧，向深水埗區内的基層家庭提供食物支援及關懷。
穿上跑手TEE個個都係伙記，仲要揹埋個經典外賣紙杯真係好有特色。
同阿妹講起想參加茶記為食跑，佢又話有興趣，於是兩姐妹一齊參加蘿油十公里，仲興緻勃勃話三個小朋友可以參加奶茶一公里，最後恆仔為了儲齊一套獎牌所以決定粉墨登場參加炸脾3公里。
報咗名就要練習，除了係屋企原地跑10KM作鍛鍊之外，仲出街跑了4次10KM，感受到自己的進步；恆仔雖然只係參加3KM，不過係屋企跑同出街跑真係好唔同，所以都有努力練習；逸逸上次SNOOPY RUN 1KM障礙跑一開始當100M咁衝好快無力唔願跑，今次就主要係做心理調整，練習控制腳步。
10KM賽大約9點開跑，所以我決定駕車接埋妹妹過去然後泊LOHAS的停車場，睇過消費滿$500有三個鐘頭FREE PARKING，我地成大棚人吃一頓午飯一定夠。真係要讚一讚THE LOHAS個商場，除了在地鐵站口放了指示牌之外，仲安排了保安幫忙指示，當然大會的電郵也介紹得非常詳細，值得一讚。
我們大約8:30AM到達會場 – 將軍澳賽馬會香港足球總會足球訓練中心，大會活動已經開始，主持人已經係度帶領大家做熱身。
影下特色BACKDROP茶記水吧 – 為食而跑真係好有意思，食得多咗跑返步消耗返咪得囉~
主題BACKDROP
嘩~阿妹影到我咁瘦同雙腳咁長，自己都覺得自己的背影好陌生。 (小腿瘀咗係玩空中瑜伽的印記)
開始上線了，阿妹係青年B組，我係壯年A組，佢比我早5分鐘出發。
9:10AM起跑，我預人好喇~
因為起步前又拍VIDEO又影相，結果原來自己無預備好，結果帶咗耳機但係聽唔到音樂，又跑咗兩分鐘先記得開跑步App，記錄唔晒成個賽事。
今日狀態同速度控制都唔錯，一開步不斷被人爬頭都堅持住自己的步伐，慢慢開始追返上前面的人，9:24AM就見到將軍澳跨灣大橋了。
上橋喇~
自拍返張試証照先
9:37AM追到早我分鐘出發的妹妹
今次全程有三個水站，我每次都有飲，不過會特登揀杯唔好咁滿的，否則成肚水跑得唔舒服。每次飲完水都真係成個人醒一醒咁即刻狀態回勇。
不過最辛苦係尾段返到將軍澳賽馬會香港足球總會足球訓練中心的最後2KM，首先有個大斜坡，再加一大段大暗斜，真係無晒力，加上義工們不停話就快到但係又跑極都未到，一邊跑不斷問自己跑得咁辛苦為乜？又懊惱仲報咗渣打馬拉松10km…..
總之最後2KM係跑下行下，真係無辦法做到跑足全程，去到最後衝線聽到附近跑手鼓勵的聲音：最後喇跑埋佢喇﹗最後一鼓作氣跑住抵達終點。
我地終於成功喇~今日又曬又熱，而且賽道超多斜坡，絕對比之前練習的10KM辛苦，不過完賽後休息一下又變返一條好漢！
雖然依個唔係完整的記錄，但係睇返PACE每公里跑6:46真係好滿意~
睇到大會成績公佈，男子組冠軍10KM跑36:06真係好恐怖~
第二梯隊大約11:00AM都來到會場
六個伙記
大合照
11:35AM輪到恆仔跑3km，我們在旁邊幫恆仔加油，原來觀戰都好精彩，3KM短途更加能拉開專業跑手同埋普通人的距離，參加10KM的普通人一般都會嚴陣以待，但係3KM就好容易覺得唔係好遠可能無練過就來，結果恆仔個組剛剛才全部出發，11:30AM已經對頭跑緊返嚟。
有幾個小朋友真係跑得超級快，我地都忍唔住為佢地歡呼，後來普通人陸續抵達終點，我都會鼓勵行緊既跑手跑埋佢，好多聽到鼓勵都重新起跑，不過有一個話你地越叫我越唔想跑……
恆仔加油
順利完成，而且跑得比平日練習更快呢~
我地行返出去THE LOHAS食午餐，詩詩已經開始眼瞓點算？
我地人多又適逢星期日，商場周圍都係人，所以只係隨便入咗一間唔駛等位又容納到我地7個人的陳勤記鹵鵝飯店，食物味道都唔錯，後來仲發現原來係2023年米芝蓮必比登美食推介餐廳嚟架~
食完午餐飲埋啡我地又返嚟會場，連安檢姨姨都認得我地了~
小朋友們特別係逸逸非常熱愛瞓草地
影相定做熱身？
2:17PM輪到幼童組1KM的賽事，我同Day做陪跑員。
出發喇~因為幼童組年齡介乎3至9歲，跑步能力相差好遠，所以起步時都有啲混亂驚撞到小朋友。
同上次Snoopy Run相比，今次逸逸簡直脫胎換骨，果然有練習係唔同啲。
同上次Snoopy Run相比，今次逸逸簡直脫胎換骨，果然有練習係唔同啲。
全程都keep住跑無停落嚟，真係做得好好，最後仲可以加速衝線添~
詩詩就快衝線喇~大家一齊幫佢加油﹗
三個小朋友都做得好好呀~除了比賽盡力跑之外，其實會場離THE LOHAS都要行15分鐘，今日來來回回總共行咗4次，無投訴無扭計無叫過累，最多用下CANDY BOOST，真係做得好好﹗
一家三口集齊茶餐廳三寶
大合照
參賽者一齊為食跑~
跑完步仲可以換禮物，每人有菠蘿包一個、奶茶一盒以及爆谷一盒，滿載而歸。加埋拎選手包時派發的石榴汁、蘋果汁以及真空袋裝豆豉鯪魚，真係果然貼合為食跑的主題。
跑完返商場食返杯雪糕先返屋企。
返到屋企整返個菠蘿油+凍奶茶做下午茶
