PIXAR PALS 5K DISNEY RUN 2023

這是我人生的第一個長跑比賽。

本來第一次長跑比賽應該是去年2月的百變小櫻 Clear 咭路跑 2022 香港站的2KM家庭組,連T-SHIRT同號碼布都已經拎咗,結果因為疫情關係無聲無色咁無咗。今年見到迪士尼樂園闊別三年終於再次舉辦「香港迪士尼樂園10K WEEKEND 2023」,正好有我近月經常在家作原地跑訓練的5KM賽事,雖然報名費要$620真係幾貴,都決定湊湊熱鬧報名參加。

比賽7AM開始,6AM要到達會場,所以今朝5AM就要起床了,昨晚還因為OT晚上9時多才回到家,又因為緊張而睡不好,不過竟然是非常意想不到的精神翼翼,身體也很輕盈。

起身梳洗後簡簡單單食個麵包飲杯咖啡就出門。

天都未光就已經來到迪士尼,幸好迪士尼停車場提早至5AM開放,直接駕車過來輕鬆不少,行裝也可以放在車上,不用寄存就可以輕輕鬆鬆開跑。

園方已經SET好了賽道,好興奮呀﹗

依度就係今明兩日賽事的起點和終點的位置

經過簡單的安檢就入到去放滿影相位的會場。

各式各樣的影相位,周圍都係排隊影相的人龍。

不過,排得最長的就係依個BACKDROP。

就係今日我們參加的賽事 – 彼思好友5公里跑 PIXAR PALS 5K的影相位,我排咗接近半個鐘頭先影到相呀﹗

排隊期間正好欣賞主舞台的節目 – 由DONALD DUCK陪大家一齊做熱身運動。

影完相仲有時間,在會場周圍參觀一下。

這邊是米奇與好友兒童跑的賽道,賽事距離約200米,小跑手完賽後可於兒童遊樂區玩,可惜參加者年齡必須為5歲或以下,逸逸已經超齡了。

會場內設有小食區和紀念品區

物品寄存處 – 派發跑手包時還派了一個大膠袋,一定要用那個膠袋才可以寄存物品。

飲水區提供用完可以洗乾淨再用的膠杯,值得一讚。

有興趣也可以參加拉筋班

周圍都是迪士尼朋友跑手的圖畫

胡迪同翠詩主持開步禮

出發喇~

PIXAR PALS 5K的路線,如果3K就唔會跑去海邊的香港迪士尼樂園酒店,10K就會先跑去迪欣湖再繞過三間酒店先入樂園。

始終係歡樂跑,所以速度差距都非常大。我平日都有跑開5KM,所以都跑得好輕鬆,不斷爬頭。

我的啦啦隊入咗樂園為我打氣,佢地今朝都要6AM就起身喇,然後再坐的士入嚟,聽恆仔講逸逸完全無賴床,叻叻﹗奇妙處處通白金咭或金咭持有人可以免費進入園內位於美國小鎮大街的打氣區打氣,其他人也可以購買親友同行打氣票,打完氣待迪士尼開園可以再去玩。

依張相係我的啦啦隊幫我影的

今次賽道其中一個亮點就係首次穿越「奇妙夢想城堡」的拱廊~

我跑5KM一向中途都唔駛飲水,不過人一世物一世,經過水站點都試下飲返杯水。

入到樂園沿路超級多迪士尼朋友同大家打氣,影相影唔停。

繞工作人員通道出返嚟時不停咁同恆仔和逸逸揮手,可惜佢地睇唔到我。

好快就到終點喇~

終點有穿著「奇妙一百年」主題服飾的CHIPS & DALES迎接大家。

今次係我跑過最開心的5km,氣氛一流,一邊跑一直好忙碌咁周圍望同影相,完全無覺得跑咗好耐跑咗好遠,果然同自己一個原地跑或者跑街好唔同。

我完成了第一個真正的5K RUN

靚靚獎牌

今日狀態真係唔錯,之前我最快跑街5K的時間係33:05,今日多次停低影相都有35:42,女子名次153/1216,已經好滿意了。

仲有張完賽CERTIFICATE,好開心﹗

下年希望可以同逸逸一齊跑3KM。

——————————————————————————————————————-

我一向都唔太鍾意跑步,中學時最怕就係一年一度圍住屯門公園的人工湖跑兩個圈,至於運動會的齊跑2000,只是湊湊熱鬧,似行多過跑。大學YEAR 1下學期在無得揀之下PE堂被迫上體能鍛鍊,每次熱身要跑800米,我以為當時已經係我體能最FIT的時期。2008年有一日無端端走咗去運動場跑步,當時跑咗2000米,下一次再去運動場跑圈已經係2021年11月,帶埋逸逸去跑……

結果竟然因為開始上空中瑜伽而決定的起心肝減肥,其中一個對自己的要求就是每日堅持10000步。疫情期間全日留守屋企要做到每日堅持10000步真係唔容易,最好的方法就係一邊睇電視一邊原地跑,我的第一個原地跑5KM就係發生係2022年2月4日,當時一邊跑一邊睇《功夫》。

我的5KM完全未受過外面的世界所考驗,為了預備今次賽事,今年2月18日才是我第一次到戶外跑真正的5KM呢﹗

Comments

comments

發表迴響

你的電子郵件位址並不會被公開。 必要欄位標記為 *