長輩們瞓醒晏覺，我哋就再出發去家族掃墓嘅下集了﹗上集去咗我奶奶家姐嘅墓地，下集就去我奶奶爸爸媽媽嘅墓地，即係我老公嘅外公外婆喎，雖然我一次都未見過，但都算好親啦~講起掃墓，其實都係我童年美好嘅回憶之一，細個時年年清明重陽都會同我爸嗰邊啲親戚去掃墓，仲要去幾度地方，所以可以同啲表兄弟姊妹一齊搭住巴士一齊玩、一齊鬥快行上山、落山之後一齊去士多揀飲品同一齊開大餐，勞動完之後食嗰啲凍凍地嘅叉燒同燒肉總係特別好味~福建嘅親戚們somehow覺得去掃墓花咗太多時間，令我哋去玩嘅時間減少咗，唔會呀，我好enjoy呀，同埋今次真係大開眼界﹗上晝已經開咗眼界，居然下晝都仲有得「進一步開眼界」~
我哋今次搭車搭冇咁遠，落車之後要上一個小山坡去外公外婆嘅墓地，原來個墓舊年修葺過，所以而家新簇簇的，亦預備好將來大舅父、二舅父兩對夫婦嘅位置係同一個墓地度~因為地方好大，所以上晝做過嘅事下晝再做都變成大型version﹗清潔要用大掃把去掃，掃走啲落葉、灰塵~
裝飾用嘅花數目亦多好多，部份紙花要綁係大樹嘅枝條上面，部份就要用嚟圍住整個墓地，有人負責執小石頭，我哋將啲紙花綁係小石頭上面，等啲風唔會吹走，有啲就綁成長長嘅一串去裝飾~
綁綁綁
幾靚~
穿膠花？唔係，係綁紙花~大家同心合力一齊做一件事嘅感覺好好呢~
裝飾得靚靚嘅墓碑
今次冇放花炮，直接撒紙碎，由調皮嘅大舅公開始撒，到孫輩們，玩得高高興興~
另一邊廂，有親戚係度生火，原來會現烤蕃薯，果然去到邊都有得食﹗
蕃薯jap jap jap~
仲有水果部
墓地位於山坡上面，景觀好開揚，自家墓地嘅範圍又好大，自成一角，加上近日落嘅時間天氣好舒服，真係一個家族聚會嘅好地方呢﹗
清潔好，裝飾好，大伙兒一齊圍住圈唱聖詩、祈禱，大舅父又同子子孫孫們講講兩位在世時嘅事蹟，俾大家好好懷念佢哋，認識佢哋~內容間中係普通話，間中係福建話，我聽得明與唔明之間，福建話嘛，知道context的話其實都估到大半嘅~
回程時大家當然唔希望帶番啲蕃薯落山啦，解決方法？食晒佢囉﹗
其實真係有啲飽，小朋友更誠實，食唔落咪塞埋俾我，所以短短嘅路程，我手上嘅蕃薯由一條變成有三條﹗哈哈~
落山後，墓地個廁所唔知係冇開門定太不堪，總之要趕返去二舅父屋企解決，曉詩同穎妍三個居然肯坐上二舅父其中一個女，佢哋嘅表姑姐(定係表姑媽？)架車，連詩都冇話「媽咪」，真係好神奇，一定要記低~其實我哋架13座遲多幾分鐘都開車了，講到去廁所，去二舅父屋企梗係好過去外面啲廁所啦~
我見個天暗暗地，以為下一站會直接去晚飯嘅地方，原來仲有一個快閃行程呀﹗
雖然叫石獅軍事公園，其實係沙灘嚟嘅~呢個行程都係小分隊活動，香港成員有我哋四個同家姐三個，福建成員有幾位老公嘅老表，同佢哋嘅小朋友，即係曉詩嘅老表~對於小朋友嚟講，開元寺、西街呢啲都唔算「玩」，沙灘就算，仲有福建嘅表姐表妹一齊去添(雖然大家唔係好熟，冇乜話一齊玩)~
動作，快﹗影相，快﹗因為要去玩呀~
邊個pose好啲？
即使係快閃，大人們都準備咗玩沙嘅工具俾佢哋~
天氣都涼涼地，我就冇除鞋，唔打算濕腳了，小朋友們即使著住長褲，當然都義無反顧啦~
好落力﹗有冇咩收獲？
去沙灘，大人們話要掘螃蟹，啱啱訪問番曉，佢話嗰啲唔熟嘅小朋友有掘到螃蟹呀(嗰啲係你表姐表妹呀)，佢就掘唔到~諗起細個時去屋企附近嘅加多里灣，都真係可以捉到好多蟹仔架~
小朋友好高興咁去掘沙，我同老公又可以偽二人世界影下沙灘，睇下未落得晒嘅日落~
幾浪漫，幾寧靜(其實一啲都唔寧靚，睇落去你就知其實有咩background music…哈哈哈)~
沙灘好大，沙好幼，水好清，感覺可以起個度假村，好浪漫咁，但照片係睇唔到聲音架，呢度一直播住啲非常熱鬧嘅音樂，仲有廣東歌添，係財神到呀﹗真係估佢唔到~
開始日落了
唔放過機會玩到最後一刻﹗
始終要join番大伙兒食晚飯，我哋停留沙灘停留得唔耐，話要走都有啲唔捨得~仲要洗腳嘛，真係要預多少少時間~
咁難得咁多表姊妹一齊出去玩，梗係要影張大合照啦，下次再見面唔知幾多年後lu~睇番2019年嗰次嚟福建時啲相，大家都長大咗好多呢(請參閱：27-12-2019：熱鬧非凡福建探親觀光團day 1(part 2)．祖屋探秘、三代同堂家族聚餐)~
其實我都有呢張like like相﹗
放得係度，一定要影啦，唔係唔影呀嘛？
話說臨走之前我哋去沙灘個廁所，入到去好暗，我哋居然係一個公眾廁所度搞啲燈掣，但點撳都咁暗，可能根本本來就係咁吧~
好啦，去食飯啦~
前往其他中國旅遊blog