食完好飽好飽嘅午餐之後，我哋會搭今個trip最長途嘅一程車，入住山入面嘅清泉谷溫泉度假酒店，呢程車上面我終於有瞓覺了~話說我哋今個旅行團嘅當地導遊非常盡責，每程車一上車就開始講解直到落車，相信呢個係佢職責所在，不得不講，但有啲車程都長長地，因為太嘈，三父女瞓到覺我都瞓唔著，可能係咁所以返到香港終於捱病咗…之前去沙巴一個星期好地地，今次去三日就打敗仗~
瞓咗唔知幾耐，我哋停低係一個休息站，可以落車伸伸筋骨，去下廁所，雖然有便利店、小食店，但午餐食得太飽，冇乜興趣買嘢食~休息站其中有間鋪頭有啲奇怪，本來都唔奇怪，但放係休息站就有啲奇怪，有得賣啲沙煲冷撐，即係平時街市旁邊賣不锈鋼廚房用品嗰類，好難想像有人坐緊長途車會突然間想買個不鏽鋼兜…^^”
坐多一陣就到今晚入住嘅清泉谷溫泉度假酒店了﹗架車轉入去時，見到有溫泉別墅發售，呢度太偏僻啦，靚都唔關我哋事~
而家入住國內酒店，check in原來都要影相，旅行團嘅壞處係一入住就幾十人，我哋仲要兩團孖住上，排隊影相都有排搞，好在佢俾我哋稍後再落嚟影，唔駛所有人一次過堆埋一齊~先一晚upgrade唔到家庭房，今晚導遊特地靜靜雞安排咗家庭套房俾我哋呀，實在太太太感動了~~~~~
我哋間房有一廳一房兩廁，同其他客房一樣，有大露台，溫泉池係露台度，如果唔係去完沙巴返嚟住過Shangri-la Rasa Ria啲Ocean Wing Junior Suite(請參閱：26-12-2023：沙巴熱辣辣聖誕遊day 5(part 2)．悠閒歎resort@ Shangri La’s Rasa Ria Resort)，一定會好驚訝wee wee wa wa~今次停留嘅時間比較耐，我哋都算有好好善用空間同設施~
詩詩可以一字馬坐梳化
講起呢張床就搞笑咯，一張雙人床一張單人床，原本我同兩隻嘢瞓雙人床，爸爸自己瞓單人床，即是3+1，瞓到半夜爸爸叫我過去，變成2+2，詩發現我唔見咗，又走過嚟，變成1+3，爸爸覺得好逼，走過去另一邊，變成2+2，曉發現旁邊唔係我，又過埋嚟，變成1+3，完美地交換床﹗﹗
仲有啲氹小朋友開心嘅設施
戶外溫泉池
我哋同公公婆婆佢哋約好，晚餐前一齊去出面溫泉區逛逛，下晝仲有啲時間我哋好好歎個房間，我泡咗啲茶(不過酒店提供茶葉但冇提供茶壺，想隔走茶葉的話只用杯有少少狼狽)，然後一家人係客廳度玩UNO，好悠閒~
酒店溫泉區以童話綠野仙蹤做主題…
入去時要經過一條彩虹隊道，我哋就會縮細啦，點解知道，因為啲磨菇變得好大﹗﹗
有啲蘑菇係裝飾，但有啲蘑菇裡面係溫泉池嚟架~
我哋周圍參觀
又扮下嘢
溫泉區唔算非常大，比起以前去過珠海嘅御溫泉同海泉灣都細，冇咩唔同味道嘅溫泉，應該有8個溫泉池左右吧，有唔同溫度，唔同大細，不過，因為間間客房都有私人溫泉池，會走落嚟浸嘅人唔算多，第二朝我哋落嚟浸，都好少同唔識嘅人逼埋同一個池，大家都寧願分散啲，輪住浸唔同池~呢度都有提供巾同埋茶飲，服務算唔錯~
有卡通圖壁畫嘅溫泉池，呢個池我哋第二朝算停留得最耐，因為池溫冇咁熱，小朋友鍾意多啲~
夜晚浸幾好氣氛
最吸引小朋友嘅，一定係個兒童遊樂場，究竟應該著住泳衣玩定著波鞋玩呢？
晚餐係酒店食，係跟番一圍圍枱食嘅客家菜，每圍本來應該10個人，因為我哋嗰圍有11個人，原來會額外加多一個餸架，仲正﹗﹗呢餐其實感覺係好正常嘅廣東菜，樣樣都好味，打blog呢一刻已經係三月底，即接近三個月後，我仲記得有個砂鍋炆菇好好味，我食咗好多，仲有個蜆肉蒸蛋好滑，小朋友們不停encore，湯我都飲咗好多碗~
話說之前小朋友對於只限成人嘅按摩/spa同埋健身室都好好奇，按摩椅終於係沙巴機場試坐咗(請參閱：28-12-2023：沙巴熱辣辣聖誕遊day 7(part 2)．溫馨騎馬之旅、中獎tea一tea、返香港lu)，但健身室嘛，上年去台灣墾丁、秋天時去住過半島酒店、聖誕去沙巴，所有健身室都要12歲或16歲以上先准入，今次呢間酒店冇話唔俾小朋友入，佢哋兩個蠢蠢欲動，好想試下，一直問幾時去幾時去~好啦，食完飯我哋去睇下啦~
雖然我做gym年資講緊有接近廿年，但認真做重量訓練其實都係近呢一兩年嘅事，以前去gym主要上堂，瑜伽班、aerobics、跳舞等各種運動班，或者踩下機之類，以前都唔太識啲器械，但近呢一兩年跟教練做gym，對於啲機點用，注意事項，安全等了解多咗好多~
好奇嘅唔係得兩個小朋友，兩個老人家都興緻勃勃，媽咪之前試過係跑步機度跌過，佢想再試試克服陰影，我又幫佢較下部機，兩個小朋友就乜都想試，佢哋兩個其實攰到有啲跳掣，day其實都想早啲帶佢哋返房，但一場嚟到嘛~
要設計一個健身室真係唔容易，尤其空間有限之下，究竟要擺邊幾部機係度呢？而家對重訓有啲認識，去到酒店啲gym room就會覺得啲機嘅種類有時唔太平衡呢，如果有barbell同各種啞鈴，大家訓練嘅選擇就多好多了~
返到房仲有重頭戲呀，係呀，要浸溫泉﹗個池都幾大，我哋四個人入晒去都唔逼~今次如果唔著泳衣就真係一定要落窗簾，因為同其他露台都幾近呢~沖涼時有人放煙花呀，我即刻打開隻窗叫詩詩睇下，但好近嘅砰砰聲佢話好驚呢，係要咁先似過年嘛~
個個沖完涼乾乾淨淨，雖然估到我哋唔會夜瞓到倒數跨年，但我哋都睇咗某個國內嘅跨年晚會節目，好多節目都好勁呢，近鏡影嘅歌手可能好紅好出名(雖然我哋唔識)，但以歌曲做背景，表演各樣雜技、舞蹈、演奏樂器嘅演出者都好勁呢，印象好深刻嘅一幕，係一班女子嘅中樂團，演奏一首好澎湃激昂嘅歌曲，唔單止佢哋嘅音色激昂，連表情都好配合，難怪細個時跳中國舞老師成日提我哋表演時要笑，嗰陣都唔明點解無啦啦要笑，專登笑好似好奇怪咁，到後來睇Produce 101就明，原來有埋表情嘅演出係會吸引力大增﹗﹗
睇到咁上下打算瞓覺，曉話要睇「中年好聲音」^^”，明明都冇追開，只係去婆婆屋企時電視打開，佢聽到個節目嘅宣傳片段，覺得「顏米羔」個名好有趣先一直留意之嘛(聽講最後得季軍)，我哋陪佢睇咗一陣，wow，水準真係好參差…有少少似同啲friend去唱K咁，有啲friend係唱得幾好，但未至於係歌手咁好囉，有啲friend就…errrr，大家都要有機會唱丫嘛…嘅狀況囉~不如瞓覺吧~哈哈~
我哋約咗公公婆婆第二朝一齊食完早餐，之後仲有活動，都唔可以太夜瞓啦~
前往其他中國旅遊blog