雖然先一晚好攰，但小朋友們叉過電後，精力充沛，好早起咗身，用酒店嘅紙筆嚟畫畫~
識字嘅三年級曉平時明明唔特別鍾意寫字，可能見啲簡體字有趣吧，居然冇人叫之下抄咗酒店名+地址+電話~全靠佢，我先咁容易搵得番間酒店叫咩名~
詩詩嘅畫好可愛，佢畫咗仲瞓緊覺嘅我哋三個，佢自己起咗身畫畫~cute cute~
出發之前係酒店食自助餐，選擇都多，味道都ok，但啱啱去完沙巴返嚟，住完國際性嘅五星級酒店，難免會比較一下，國內嘅地區酒店始終裝飾、食物等各方面上精緻度不足少少啦~最好味係各種潮州最出名嘅丸﹗詩就好滿意，因為可以青瓜放題，夾完食晒又夾﹗
酒店大堂嘅長樓梯，變咗小朋友嘅遊樂場~
見唔見到兩隻嘢？
邊個最歎？
我哋今次參加大航假期嘅團~
今日上晝只有一個景點，我哋會去一個叫做「小公園」嘅地方，我一定一定要事先prime定兩個小朋友，此「公園」不同彼「公園」，佢哋對於公園嘅定義好狹窄，一定要有兒童遊樂場嗰啲先算公園，即使有好多花草樹木涼亭長椅但冇滑梯秋千搖搖馬，都唔算公園~呢個小公園，其實係一個街區，有好多舊西式房屋，係購物掃街食嘢嘅步行街~
一排西式騎樓房嘅街道
懷舊建築物，令我諗起當年去上海影pre-wedding呢(請參閱：26-4-2011：上海pre-wedding+杭州day 2．婚紗相by Picasso Wedding)~睇番啲13年前嘅舊相，我而家就嚟40，身材fit過廿幾歲嘅我呀，shhhhhh~
導遊帶我哋去到小公園嘅icon—-中山紀念亭解散之後，就係自由活動時間了~
出動﹗
中山紀念亭
到我哋兩個影
中山紀念亭運用中國傳統建築技術榫卯工藝去建成，曉之前常識科有學過魯班、榫卯技術，所以特別興奮~等我哋影下啲榫卯接合位置先~
其實要點樣逛都冇乜idea，餓又唔算特別好餓，理性上都要節制一下，唔好食咁多嘢，因為已經預告之後中午去食大餐，未食就飽咗就好唔抵了~
食方面，我忍唔住買咗一包蝦片，六個人一邊行街一邊食食食，小意思小意思~
今個trip最精彩嘅食物，雖然有啲對牛肉火鍋同潮式打冷唔住，但印象最深刻、最令人陶醉、最好味嘅，一定係呢個鴨屎香手打檸檬茶﹗﹗﹗
買嘅時候都未知咁正，只見到職員起勢咁篤啲冰同檸檬~
茶味好香濃，香水檸檬嘅香味好獨特，加埋令人容易入口嘅甜度，真係完美嘅配搭﹗﹗完美到返香港見到「手打檸檬茶」都想買嚟試(都係及唔上嗰個味道呢)，係超市見到香水檸檬都想買返屋企自己試下整(雖然結果冇買+冇整)~
個信箱cute啲定曉cute啲？一定係曉﹗
逛方面，我哋誤打誤撞睇咗個藝術作品展覽，展覽係一楝大樓嘅二樓，個地下唔太顯眼，條樓梯好陡，但我哋老老嫰嫰都上咗去參觀~
上到去豁然開朗，好光猛，有座位坐下欣賞作品，有唯妙唯肖嘅畫作同各種造型場景嘅瓷娃娃，睇起嚟幾有趣味~
曉搞乜鬼？
詩，錯腳呀~
而家zoom埋張相度睇，先喚起記憶，呀，個藝術家叫做陳政明~
距離集合仲有少少時間，影下相先~
叫曉幫我哋影舊街道，點解個人咁大啲景咁少嘅？
爸爸話，係咁~
明白了﹗
導遊幫我哋影多張全家大合照~
我哋睇住時間返去集合，齊人就上車去食午餐啦~
午餐嘅地點叫做庄氏祥記家常食府，食潮州打冷，呢度都係任點任食，旅行團揀咗每人一個「主菜」(我哋係基本款嘅一種湯羮，見餐牌仲有其他貴價啲嘅「主菜」)，此外其他餐牌上嘅嘢都可以任order無限次﹗因為我哋係旅行團吧，所以已經事先幫我哋定咗十幾廿款菜式上一次先，之後仲有咩特別想試或者想encore嘅可以再嗌~
印象最深刻嘅一定係「生醃」，即是用調味料直接醃生嘅海鮮嚟食嘅菜式，有少少似韓式醬油蝦醬油蟹咁，同枱嗰家人嘅「姑媽」非常鍾意生醃蝦，除咗開頭嗰碟之外，佢後來有再encore，佢見我都有食，就係咁鼓勵我再食多啲，我應該係我哋嗰圍枱第二食得多嘅人~
其他樣樣都幾好味，弊傢伙，因為冇俾相機食先，而家打blog事隔咗三個幾月，對於其他有咩食有啲模糊了，我記得有碟凍魚，入面有幾款魚，都幾鮮美，我主要夾少骨嘅俾小朋友食，但鍾意食魚嘅詩詩不停叫我夾俾佢食~個主菜話係鯊魚皮羮，媽+我+兩個女聽到就唔太敢食了，唔理佢好味定唔好味~開頭有啲燒味同白切雞，因為初初好肚餓，所以好重要~
導遊俾咗好多時間我哋食呢餐，多到有少少「駛唔駛咁耐呀」嘅程度，所以食到好飽之後，我哋出去散散步~
可能我哋食嗰啲魚就係呢啲了~
話說我+詩有去過一趟廁所，婆+曉又有去過一趟廁所，大家講番個廁時各堅持己見，話對方記錯咗，我同詩話一邊係踎廁一邊係座廁，曉話唔係呀全部都係踎廁，雖然未至於不歡而散，但都有少少激動，後來先知，因為餐廳太大，我哋去嘅係唔同嘅廁所，真係傻豬豬~
餐廳有個平台，有一個個玻璃屋包廂，一個包廂一張大圓枱，令我記起上次去韓國時嘅雪地包廂烤肉呢(請參閱：28-12-2022：首爾江原道冬日滑雪行day 7(part 3)．溫馨滿分公仔麵午餐、氣氛包廂韓牛烤肉、笑到碌地保齡球大賽)~
有個龍年賀年backdrop，我哋都提前影定「拜年相」~
逛完平台仲有時間，我哋落去商場其他樓層睇下，原來下面嗰層好似沙田Home Square咁，全層都係關於家具裝修嘅呢，可能呢度啲屋企大吧，啲示範單位都好寛敞舒服，香港人羨慕唔到咁多啦~
下一程車最長途了，因為我哋要入住山入面嘅溫泉酒店啦，要好好休息relax一下了~
詩詩枕住家姐隻脾嚟瞓著咗，家姐好自豪呢~
前往其他中國旅遊blog