去完旅行返嚟一個星期有多，仲可以每日早午晚三次細細回味旅程，由朝到黑貼身感受，係好正好抵玩呢？因為感受太深，連正式旅行blog都未開始打，我要先打咗呢一篇「後記」先~我講緊嘅係sand flies咬過嘅粒粒呀，好痕呀~~~~~~~~~~~~~~~~
旅程最後一日，我報名參加咗resort嘅直立板瑜伽班，day同兩個小朋友都專登晨咁早落埋泳池玩，幫我影相~個瑜伽班有幾好玩，之後我會打旅遊blog時詳細講，但話說落堂返房沖身換衫時，我驚嚇地發現背脊有幾十粒小紅點，都唔知幾時俾嘢咬咗咁多粒﹗
其實啱啱開始上堂時，有啲飛飛係我身邊撲下撲下，教練話係sand flies，俾咗支驅蟲劑我噴，我乖乖噴咗手同腳，但忘記自己著住大露背，跟住就開始上堂~真係出發前冇預習，聽到個名叫flies，以為只係撲下撲下騷擾下你咁嘅烏蠅flies咁上下，估唔到俾佢哋咬完會痕咁耐，而且好似仲要痕多一排添~
發現小紅點嗰陣其實唔覺得點樣痕，反而係沙巴返嚟，返工一日，再去潮汕三日嘅回程嗰日先開始覺得痕，唔知係咪浸完溫泉，皮膚血液循環，谷到大粒番(純粹亂估，唔係代表醫生身份嘅發言)？接住幾日好似越嚟越痕，痕到我要上網睇下關於sand flies嘅資料，平時蚊咬忍得半個鐘唔抓，基本上就唔會再痕番，跟住半日一日就會退，但今次痕咗幾日都未見退嘅跡象真係令人擔心~上網睇，原來描述sand fly bites嘅痕癢度係mosquito bites嘅幾倍，而且可能要痕兩星期或以上，oh no~咁我都有啲心理準備~所以所有網上資料都係不停講預防預防預防，ok，我(太遲)知道了~
可能我生性樂觀，即使咬到好慘(有幾多粒？逐粒數可能會數到好亂好易數錯，我諗起以前係咪地理科教，用格仔嚟劃一個個固定範圍，數咗數目再乘番土地面積？咁樣數可能會快啲~總之多到見到會起雞皮打冷震啦，詩形容為「媽媽啲驚驚」)，我依然有啲好正面嘅感受^^”：
- 我可能做瑜伽做得好出色，即使係直立板上面都平衡得好好，動作好穩定，所以啲sand flies可以好安穩咁企係我身上面慢慢咬慢慢吸
- 今次咁痕要經常搽無比膏(都算有效嘅，不過要大範圍搽，搽到個人成陣味)，好幸福咁有老公同兩個女，唔厭惡我啲好肉酸嘅粒粒，輪住一日三餐幫我搽，兩隻嘢仲要搽到好高興，搵次要錄下佢哋啲對話，笑死你
最後，我都係要奉勸各位準備去熱帶地區旅行嘅朋友們，要了解下當地有冇sand flies，記得要好好預防，因為真係好痕呀~~~~~~~
澄清啟示：我哋去沙巴其實只係去咗7日咋
前往其他馬來西亞旅遊blog