由廣濟橋回程時，詩詩已經要抱住瞓咗覺，距離集合仲有少少時間，而集合地點旁邊就係潮州古城三大景點其中之一嘅開元寺~
開元寺到此一遊
我哋對於逛寺廟唔太大興趣，我同曉只係入去望咗一望就出番嚟了，反而想去導遊介紹嘅老店買零食，我哋買咗佢推薦嘅花生糖，曉話想食啲話梅朋友，我哋揀咗一樽情人梅~花生糖真係唔錯，粒粒花生好完整味道好濃又香脆，會不停食~食下食下有啲口渴，又買一樽油甘子汁嚟飲，好清新~
瞓醒就食花生糖
同團友們集合之後，我哋跟住導遊經過一個又一個嘅牌坊，原來呢度都出咗好多人才呢~
經過一個又一個嘅牌坊
牌坊多到數唔晒，點都同「狀元」牌坊影一影相，沾一沾啲光，小朋友們要乖乖學習，學有所成~
古城遊客區都係比較商業化，鋪頭賣嘅嘢都大同小異，好多重覆嘅商品，吸引我目光好多次嘅南乳雞翅，結果到最後一日都冇機會食到呢，不如搵下食譜返去自己整啦~
唔係好明白點解要有下午茶環節，但導遊帶我哋入去一間兩層樓嘅屋，少少簡陋嘅陳設，叫我哋自由坐低~
原來個團一早講咗話有提供嘅下午茶就係嚟呢度食個糖水~
糖水入面有啲雪耳呀、紅棗呀咁，浸住兩粒湯丸，我哋呢啲湯丸愛好者嘛，即使好飽都要食嘅~另外仲派咗一人一份…咩嚟嘅呢？而家唔記得咗添，好似係啲炸炸地乾身嘅嘢，總之嗰一刻我哋冇人食得落，諗住帶走咗先算，但最後都係冇機會食到~
匆匆忙忙食完個下午茶，我哋差唔多上番車了~下一個行程…又係食﹗﹗係呢個團嘅其中一個主打項目—-任食牛肉火鍋~雖然食完冇耐下一個行程又係食，但慶幸兩個地方有啲距離，總算有啲時間俾啲食物消化下，落下隔~
等電頩車時再影一影另一個城樓
牛肉火鍋係一人一鍋，小朋友都唔例外，開頭兩個都戰戰兢兢，後來習慣咗都夠膽自己淥嘢食了，不過都係見啲湯滾啲就即刻較細個火囉，非常小心~各個部份嘅牛肉切片、牛丸、蔬菜、粿條、炒飯都係任食，食完可以再order，飲品就要自己買，打邊爐點都要飲下啤酒汽水啦~不過實在唔太熟悉牛嘅部份，所以都唔係好識嗌，只能夠話「要加啲肉」，我哋旅行團呢三日同另一家人坐一圍枱食嘢，佢哋嗰位「姑媽」非常熱心，我哋都未出聲時佢已經迅速辦妥，所以唔怕冇嘢食~打邊爐嘅食物冇香港平時食開嘅咁多花款，但食到咁多唔同部位嘅鮮牛肉真係好難得，所以都好盡力食多啲~
相機食先
跟住就好忙碌了，又要煮又要食，又要顧住兩個細嘅~
我哋就係坐呢種枱，一人一個電磁爐都可以坐大圓枱呀，同啲唔識嘅人打邊爐都係一人一鍋方便啲~
蔡溪記
呢排興啲咁浮誇嘅pose
牛嘅唔同部位
哞~
食飽飽就返酒店啦，可能真係好多人習慣返大陸玩時要唱K宵夜直落，去到每一間酒店之前導遊都會略略介紹一下附近有咩娛樂場所/餐廳，我都唔係好明，我已經攰到不得了，好想即刻瞓覺，點解大家仲有精力去唱K，同埋點解個肚皮仲有位放更多嘅食物落去呢？
之前有同導遊提及過想自費upgrade家庭房或者加床之類嘅安排，第一晚住嘅汕頭裕通國際大酒店未有幫我哋upgrade房間，我哋就話入到房睇下張床夠唔夠大再算~
終於抵達酒店了，攰到爆炸
上到去張床其實都大嘅，如果加多一張單人床俾曉瞓應該可以瞓得更鬆動舒服，但實在太太太太太累了，只想即刻沖涼，唔想再等職員出出入入搬床了，算啦，逼埋一堆瞓啦~酒店沖涼啲水夠熱夠水壓，沖得係幾舒服，但唔知點解沖涼時啲水係企缸浴屏底部一直流出嚟，結果我哋沖完涼要用毛巾嚟鋪番條「路」，先可以出入去廁所同刷牙~住得一晚算數啦，唔好換房呀甚麼了~
因為心情攰到有啲煩躁，所以老公特地叫咗個「room service」，房間枱面有個QR code，可以幫襯酒店買啲飲品零食日用品之類，然後機械人就會送到你房門口~飲完個橙汁之後，心情暢快好多了，可以安心沖涼瞓覺~
Goodnight，聽日見~
前往其他中國旅遊blog