解散之後，唔理得咁多名勝古跡，一定要先食飽個肚先繼續下一步，我哋就近係一間有得食粿條(河粉)、海鮮粥、蠔仔煎嘅鋪頭仔，間鋪頭有咩咁吸引？就係可以即刻坐低囉~爹哋嘅主意非常好，佢話就叫有圖片嗰六樣食物啦，唔駛諗，正，而且好豪氣，好似漫畫「為食神探」入面嘅高野偵探咁，叫嘢食係叫成個餐牌每樣嚟一份，鍾意食嘅再追加~
嚟咗第一樣食物，拿拿聲影張相就要開動了﹗
可能因為太肚餓，印象最深刻係覺得每一樣食物都好熱，冇得即刻食好大啖，另外就係餐廳只提供外賣餐具，用輕飄飄細細隻嘅外賣匙羹嚟食嘢唔太efficient~味道嘛，樣樣中規中矩啦，冇話特別出色，食飽飽總算唔再hangry~
好啦，我哋有心機去發掘其他嘢了~之前經過時，已經見到人哋拎住啲有個茶壺仔係隻杯上面嘅飲品，好有型，我哋都想試下~
揀嘢飲
未領取我哋嘅小茶壺，同大茶壺合照咗先啦~
我同爹哋分別揀咗兩款唔同茶底嘅珍珠奶茶，每一杯個頂都放一隻「噴煙」嘅茶壺仔做裝飾，隻隻茶壺仔都即場黐上去，再加乾冰係入面噴啲煙出嚟，營造氣氛，所以先稱得上為「打咭飲品」~飲完之後，我搣咗兩隻茶壺仔出嚟帶返香港，俾佢哋做玩具~
到手
係咪咁樣打咭？
開心一齊影(曉攝)
補多張一家四口
潮州古城另一樣「打咭名物」，係色彩繽紛嘅潮州古城形狀雪條，真係幾過癮，不過我哋就冇買嚟食了~話說疫情後嘅國內我今次係第二次過來，第一次係暑假時去深圳住咗兩晚，當時我已經見證到完全唔用現金嘅世界，當我發現我嘅香港支付寶係work嘅時候，變成「有錢人」嗰一刻真係非常興奮，嗰次主要出入商場周圍都用到電子支付一啲都唔出奇，但今次去潮州可能會買下啲街邊嘢，係咪一樣得？原來店家只要貼個QR code出嚟，即使商店只係一架手推車，商品只係幾條雪條，都一樣可以電子支付﹗所以嘛，可以唔帶錢出街，但電話唔可以冇電﹗如果唔係，乜都做唔到﹗亦即是話，要有個高效能嘅power bank，同埋坐長途車唔可以打機、煲劇到部電話油盡燈枯~
路過一口古井，你哋係咪講緊典故？弊啦，隔得太耐先打blog，媽媽唔記得咗係咩意思啦~
我哋高興地等奶茶時，媽咪話想試下個油甘子汁，呢度啲油甘子汁賣到成行成市，買油甘子汁仲容易過買水~開頭媽咪話係大人口味，細路仔未必鍾意，但我哋個個試過都覺得好清新，酸酸甜甜飲起嚟好順口，後來再口渴時我哋都買咗一樽嚟飲~
飲咗嘢滿足度即刻提升，我哋決定去參觀古城對出嘅廣濟橋﹗
古城裡面影出去
出到嚟影多次城樓
爸爸幫你影得咁靚嘅？
廣濟橋
廣濟橋係付費景點，導遊特別提醒我哋行到對岸時千祈唔好離開景點範圍，如果唔係返嚟潮州古城呢邊時又要再買飛了~
排隊買飛超長龍，仲要留神有冇人若無其事咁走過嚟插隊，我哋又難免俾兩旁啲小販吸引目光，好難兼顧~我哋幫襯咗買髮簪，十幾廿蚊嘅髮簪好精緻，買髮簪仲幫你盤埋頭髮~
我哋三母女一人揀咗一支，令人愛不釋手呢，不過只有曉係正式長頭髮，店家幫佢盤咗個髮髻，即刻變咗古典小美人，雖然同件T恤唔太襯，哈~曉除咗條橡筋落嚟，可以幫到我個少少長嘅短頭髮固定支髮簪上去一陣，靚一陣~唔鍾意束縛嘅詩詩一啲都唔想插支嘢上個頭度，佢用嚟觀賞把玩就滿足了~
我哋一行六人，兩老免費，小朋友1.2米以上要買小童票~
詩詩啱啱夠高要買飛，大個女了﹗開心~
張飛好靚，而且成人票、小童票設計唔一樣，影低留念先~
廣濟橋原來係中國四大古橋之一，最初宋朝時已經建成了，當然而家我哋行緊嘅橋係後來再修葺重建好多次架啦~廣濟橋最特別嘅地方，就係佢中間一段係可拆卸嘅浮橋，直至而家，每一日夜晚都會拆走中間連接嘅船部份架~不過行上去好穩陣，一啲都唔覺得搖~
中間部份可以拆卸
未上橋時可以見到一座座亭屋樓閣
每一座都有唔同嘅名字
行上橋，吹吹風，散散步，本來係好寫意嘅一件事，但條橋上面真係十—-分—-之—-多—-人﹗﹗﹗影張相都比較難避開其他人~行行下詩覺得眼瞓要抱住時我哋進退兩難，而後來急急想去對岸嘅廁所時想快都快唔嚟~講起去廁所，上次去深圳時詩都仲有得揀下去踎廁定座廁，今次去潮州真係「踎廁速成班」啦，唔去都唔得~
到咗中間部份
見唔見到我哋四個？公公幫我哋影架~
亭屋
摘星
呢隻牛守護住條橋架
我哋行到橋嘅對面，去一去個廁所，跟住就原路返轉頭，入番去古城參觀其他部份了~
前往其他中國旅遊blog