30-12-2023：潮汕公公生日美食溫泉鴨仔團day 1(part 1)．高鐵初體驗、潮州古城食食食get set go

今個聖誕假期家姐一家去澳洲旅行，我見爹哋生日嘅一月一日家姐佢哋都未返到香港，反正會遲啲先食生日飯，我就約爹媽一齊去個短線旅行~爹之前講過想去潮汕一帶，而我就話未坐過高鐵，於是我哋就參加咗大航假期嘅潮汕三日兩夜高鐵團~

高鐵雖然早上九點幾先開車，但旅行團約我哋七點幾就要係西九龍站集合了，為咗用最少嘅時間一齊出到去，我哋提早預約咗架Uber XL係樓下等，可以載晒我哋一行六個人~

出車時仲係黑麻麻

慢慢日出了

去到領隊度點名之後，我哋就去食早餐，美心MX只有外賣，我哋要坐高鐵站啲櫈嚟食嘢~

有少少狼狽添~

高鐵站有啲節日裝飾，但我哋人太多，遮晒Peter Rabbit添~

高鐵要用實名買飛，你嘅旅遊證件就係門票，所以張回鄉證要出場幾次，入禁區檢票要用，過關要用，到真係「搣飛」入閘時再出示多一次~入到去候車大堂人頭湧湧，詩詩已經想瞓覺爸爸抱住，我同曉同婆婆就坐另一邊，等夠鐘上車~

入閘後人好多，落到月台想影張相都唔容易，而且感覺好趕急，都係快快上車穩陣啲~

到月台

準備上車

我哋好快搵到我哋嘅座位，原本想轉一轉啲座椅嘅方向，我哋六個可以對住坐，但唔知咩原因，我哋個團個領隊阻止咗我哋咁做~

咁暫時三三咁坐啦，我教曉做功課，day坐我旁邊，瞓醒覺嘅詩就去後面同公婆玩~

曉去完沙巴返嚟要寫隨筆，佢開頭要我教佢寫，但寫寫下嫌我煩索性話自己識寫，仲好啦，你叫我教你寫好容易變成我寫，你自己寫反而完完全全係出於你自己嘅idea~

做完功課去後面同婆婆坐

估唔到上車發生一段小插曲，我哋個團竟然有兩個團友冇上到高鐵﹗﹗﹗佢哋一行四人join個團，其中兩人竟然跟甩咗唔知去咗邊，呢件事真係好神奇~開車前領隊好努力問佢哋位置係邊，想教佢哋快快上車，但直至開車都搞唔掂，以上唔到車嘅行動力嚟計，恐怕要佢自己買飛搭下一班，或者採取其他路線join番個團都唔太容易，結果呢兩位團友都係冇重新加入了~

抵達潮汕站了﹗原來高鐵潮汕站位於潮州市、汕頭市同揭陽市嘅中間位置，揭陽市雖然未去過，但個名感覺好熟悉，好似唔少淘寶都係揭陽市發貨咁~我哋呢個tour會去晒潮州、汕頭、汕尾，所以搭嘅車都唔少~

話說呢三日兩夜，同我哋相同行程嘅大航假期旅行團仲有另一團，所以去到邊度都會見到另一團，架旅遊巴仲要一樣係金色，好緊要唔好上錯旅遊巴~

我哋坐咗三日嘅金色旅遊巴~

平時啲導遊領隊講旅遊巴車牌我都唔多點記住，今次真係要記一記，仲要帶住細路，估唔到打blog時已經隔咗兩個半月，我都仲記得我哋旅遊巴個車牌係32160，點解咁記得？因為我哋配咗個車牌落首歌度囉，係詩詩學校首「我們一同拍手哈哈哈」，變成「32160啦啦啦啦」，每次上車都唱一唱，唔會搞錯~講起架旅遊巴，你係唔可以唔扣安全帶架，你一坐低，就咇到你扣為止，好盡責﹗