寫好postcard，執好行李，我同曉趕去參加騎馬活動，爸詩組就負責check out、寄存行李、搵concierge寄postcard，另外仲有一個重要任務呀，先一晚去Oceano食飯消費超過指定金額，我哋有一次抽獎機會，佢哋負責去抽獎~
馬圈係Ocean Wing嘅最遠端，我哋按地圖行過去都好一段路，點知去到先知原來要返去活動櫃位登記先，噢，佢叫我哋返過去Ocean Wing lobby，去到lobby又叫我哋去活動中心，哎吔，行來行去，去到活動中心先話有車送我哋去馬圈，anyway…
等緊車時，我同曉玩咗一陣棋，平時同day玩四連環，我玩親都輸，今次同曉玩兩鋪我都贏，好似變咗高手咁，曉，等你大個啲啦，期待你每樣嘢都超越我嘅日子~
去到馬圈，職員俾我哋每人一頂浴帽/手術室不織布帽，原來我哋要戴頭盔~
好快，有騎完馬返嚟嘅人，啲馬稍稍休息就載我哋出動了~騎馬活動10分鐘起，我哋參加咗半個鐘嘅體驗活動，因為要8歲以上，詩唔夠秤，唯有一個大人同曉去，一個大人陪住詩啦，爸嘅體重有時會超重有時唔超重，加上佢見我興緻勃勃，就讓俾我同曉去玩~詩好唔滿意佢點解冇得騎，冇辦法啦，度度規矩唔同，我即刻search屯門公眾騎術學校幾多歲可以參加，佢得喎，我應承佢返嚟香港想去可以同佢去，hey，而家咪又冇咗件事~
其實只係有馬伕拉住繩，帶住我哋兩人兩馬出去兜一個大圈，個圈都真係幾大架，出發時係resort嘅馬圈，跟住經過少少林間小徑，又有少少水窪路有啲啲刺激，只後出去另一邊一望無際、廣濶嘅沙灘，wow~
曉今個trip有好多突破同新體驗呢~
如果係情侶或夫婦，日落時一齊騎馬約會，真係好浪漫呢，我哋就，好溫馨囉﹗
出發前職員叫我哋唔好嚇親隻馬，即是唔好大叫，唔好郁來郁去，總之唔好刺激佢啦，開頭我唔係好敢講嘢添，後來個人放鬆少少，至覺得冇乜理由連講嘢都唔得，先同曉細細聲傾下計~我哋話，終於明白林克嘅感受(薩爾達傳說嗰個)，因為騎馬好緊張，隻馬慢慢行已經有啲驚，我哋話真係唔可以隨便按個A掣(加速)~
騎完馬，好好嘅體驗呢~好熱丫，我哋同爸詩組會合之前，去泳池側邊飲水機斟啲冰水飲~
Shangri-La Rasa Ria走環保路線，房間都冇膠樽樽裝水，泳池邊俾啲杯你自己斟，飲完放一邊等職員執，因為太冰涼，都見到爸詩組之後，曉都好誠意推介佢哋飲冰水丫﹗
Ocean Wing大堂對出噴水池
我同家姐去騎馬時，爸詩組做咗啲咩呢？
除咗正事之外，有時間剩，當然係玩多一次遊戲室啦~
原來詩詩代表大家抽獎抽到大堂cafe嘅蛋糕一件，幾好丫，可以趕得切走之前享用到，如果抽到大獎—-沙灘背部按摩一次，咁就唯有送俾唔識嘅人或者放棄啦~既然唔太餓，未想即刻食lunch，不如去大堂cafe食咗件蛋糕佢，飲啲嘢，之後出到機場先食個late lunch啦~
開心揀蛋糕
到手﹗yeah~
果然，送碟豉油俾你而鼓勵你買隻雞嘅策略非常成功，我哋叫咗三杯飲品，然後食咗一件免費cake，anyway，呢段休息嘅時間我哋都好enjoy嘅~小朋友叫咗杯好fancy嘅聖誕特飲，我哋兩個就一人一杯咖啡~
聖誕特飲杯邊有啲增添節日氣氛用嘅糖，兩個好冇儀態地舔~
大細都唔執輸~
話說我哋係大堂cafe前面時，有個香港人媽媽聽到我哋講廣東話就同我哋搭訕呢，原來佢同兩個teenager女啱啱到，問咗我哋好多有邊度好玩、推薦嘅行程，哈，不知不覺講咗好耐呢~
時間差不多，我哋返去Ocean Wing，拎番啲行李，call車去機場啦，去機場都要大半個鐘頭呀~
去到時間比較鬆動，好在可以check in寄行李，今次我哋搭嘅Air Asia屬於廉航，我哋出發前買定寄倉行李quota，今次都心知不妙，朝早游完水啲濕衫放咗入喼，返香港著啲冬天厚衫都塞埋晒入去，超重﹗﹗寧願補少少行李費啦，費事係機場亂糟糟咁執番啲出嚟手提啦~
小朋友們盛讚機場嘅廁所呀~
因為女廁分兩邊，一邊係方便本地人習慣嘅「洗pat pat區」，一邊係方便國際旅客嘅「乾爽地面區」，我哋終於可以唔駛濕晒腳咁去廁所，非常好~
我哋入到禁區先去食嘢，有一間食麵嘅鋪頭~
我哋嗌咗三碗麵，有辣有唔辣，適合不同需要，味道就正正常常啦，唔算太深刻，只係個辣嘅Laksa都真係幾辣~
入麵店時經過一排按摩椅，佢哋好想好想試，呢一刻諗番轉頭，婆婆屋企咪有按摩椅囉，點解對呢張要俾錢嘅特別好奇？食完嘢仲有時間，我哋話，可以試下，但按摩椅唔係for小朋友身高，未必舒服架，我哋俾最少嘅錢開動最短嘅時間，大家share嚟坐啦~兩隻嘢非常興奮地坐+計時，好抵玩~
你真係非常唔夠高囉~你睇，家姐幾肉緊睇住個時計~
認真俾評語中
影咗幾張都影到我超肥，爸爸就叫佢哋兩個攬住我對脾，遮住咪唔肥囉，笑死我~
好啦，搭埋三個鐘嘅飛機，我哋七日嘅沙巴假期就結束啦﹗
我一對手冇得free出嚟時，原來爸爸係飛機度影咗好多靚相呢~
一片片嘅雲
仲有日落
返到香港已經冇晒電，飯總要食嘅？我要食港式﹗我要食太興﹗
下一次幾時再去旅行？兩日後丫﹗因為我哋同公公婆婆join咗短線旅行團搭高鐵去潮汕呀，下一篇blog見~
前往其他馬來西亞旅遊blog