book咗七點半嘅SUP瑜伽，如果要上堂之前食早餐，就要超早起身同埋食得好趕，所以決定只食少少嘢落肚就去上堂先，落堂至正式食早餐~之前係亞庇間酒店樓下間超市買嘅牛油夾心餅乾可以大派用場了~我叫爸爸要幫我上堂時影相，所以三父女都唔可以太遲起身呀~

適合玩SUP yoga嘅好天氣+good morning

今次SUP瑜伽班係Ocean Wing嘅泳池進行，我早少少去報到，去到時早到泳池未有其他住客游水，有個女士主動過嚟同我講嘢，原來佢就係教練了，佢話今日嗰堂有兩個人報名，我哋等夠鐘就開始~

始終都係有大動作嘅運動，比起bikini，似乎速乾運動bra top同運動短褲比較合適~

結果另外嗰個人最終冇嚟到，雖然冇咁熱鬧，但變成單對單嘅私人課堂，似乎仲著數~

我第一次認識SUP yoga，其實就係睇Netflix播嘅韓國真人show「恢復單身的人們4」，講其中幾個參加者去一次group dating就係去海邊做SUP yoga，其中Jimmy可能身體太重、柔軟度又唔夠，係SUP上面連坐定定都搞唔掂，莫講話做各種動作，係咁跌落水，睇到人好尷尬，點算，點係心儀女子面前展現魅力？﹗

係得搖下搖下嘅SUP做瑜伽，我預咗會跌落水，只差係幾時跌、跌幾多次、會唔會好驚嚇啫~教練話我哋先做一啲坐嘅動作，之後先做啲跪嘅動作，最後先做企嘅動作，一步一步嚟~啱啱開始時，我已經覺得有啲蟲仔係周圍飛下飛下，我隨手撥開，著長衫長褲泳衣嘅教練俾咗支驅蟲劑我噴，話係sandflies，我當時都不以為意，我乖乖噴咗露出嚟嘅手手腳腳，跟住就俾番支嘢教練，估唔到後來件事變得咁嚴重，嚴重到我專登為佢打咗一篇blog(請參閱：5-1-2024：沙巴熱辣辣聖誕遊day 15(?!)．好抵玩之sand flies親吻一星期零一天紀念日)﹗所以呢篇唔好掃興了，只講SUP瑜伽嗰部份啦~

上次去美人魚島玩過SUP，簡單坐係度、跪係度、企係度短暫平衡都冇乜問題，但真係未試過不停係上面郁住做各種動作~地面yoga近年雖然少練習，但十幾廿年前讀U嗰陣我都成日上堂嘅，對於最common嘅瑜伽動作都好熟悉，近年冇乜做yoga，但我係做gym嘅人嘛，而且近呢幾個月要跑步跑山，我嘅健身教練都好著力幫我操對腳，所以對於腿嘅力量同平衡都有信心~

開始上堂

我呢邊開始上堂，day間中幫我影下相，又同曉詩係泳池嘅另一邊玩~

發現豆豆浮床

玩水開心

cute~

鏡頭睇番我呢邊~

少少熱身之後，我哋嘅身體開始「離開塊板」~

warrior 1

跟住瑜伽教練係SUP板上面做各種動作，總算有板有眼，去到企起身嘅動作都一直跟到，直至…warrior 2嘅第二邊時，splash，我終於跌咗落水了﹗雖然少少狼狽，但對於識游水嘅我嚟講又唔會太驚嚇嘅，係上番塊板覺得有啲怕醜囉，失禮晒~後來教練先同番我講，見我一直做得咁好先俾我做啲比較難嘅動作，佢話好少上呢啲堂時會做到warrior 2，咁我都安慰啲~後來叫做夠鐘落堂，教練仲問我有冇咩動作想做，佢鼓勵我試tree pose，哇，單腳？﹗我發現day同曉詩返咗嚟，個鏡頭對於我，我好緊張呀，專心、專心﹗做到少少啦~

我之後決定唔繼續挑戰啦，都係同佢哋去食嘢重要啲，返房簡單換套衫，我哋去先一晚食晚餐嘅Oceano食早餐，見門口要排隊，以為要等下，點知好快可以入座，可能係其他人想坐戶外座位吧~

Oceano同Garden Wing嗰邊唔同，呢邊食半自助早餐，出面都好多嘢食拎，但可以另外係a la carte餐牌度叫嘢食同埋飲品，我哋order咗兩份熱盤，打算其他出去拎，免得份量太多，而且小朋友們好肚餓，佢哋已經等唔切廚房整了~飲品方面，大人們好似平時咁揀咖啡奶茶，小朋友可以揀鮮榨果汁呀，正﹗

不太喜歡麵包嘅中國人詩，好多時去食自助早餐有得揀都會食粥，今次冇粥，佢居然想食湯麵，幫你去淥一碗啦~

食麵詩

食食下，呢兩份餐都到啦~幾靚喎~

食完早餐，我哋返房先，騎完馬趕唔似返嚟執行李，所以要執好行李先~同埋仲有啲時間，如果啲postcard趕得切寫好，就可以搵酒店concierge幫我哋寄番香港~

有咗兩個小朋友之後，之前寫postcard都係俾曉寫字，我哋其他人畫畫，而家連詩都K.3，可以寫好多字啦，我哋將重任—-其中兩張postcard嘅地址，交俾詩詩寫﹗﹗內容方面，詩都心懷大志，除咗畫畫之外，仲寫咗啲文字旁述，希望爺爺嫲嫲公公婆婆睇得開心啦~

家姐監督詩詩啲地址寫得啱唔啱，要確保郵差睇得明丫~

K.3有大量字唔識寫非常正常，呢個app正呀~

完成﹗

至於寄番嚟自己屋企嗰張，我哋各人畫咗旅程中嘅其中一啲一片段，爸爸畫咗我玩SUP瑜伽，新鮮熱辣，我畫咗自己去做spa，俾你哋啲冇係現場嘅人知道下發生咩事，曉畫咗酒店泳池嘅滑水梯，應該真係好好玩吧，詩就畫咗佢手腕上嘅henna蝴蝶，佢應該好鍾意~

我哋旅程最後一日寄，之後又有元旦假期，估計都冇咁快寄到香港，大槪…過新年後一個星期？或者十日？係咪會到？結果…差唔多一個月後，終於到咗﹗我哋中間質疑過無數次我哋張postcard係咪仲係酒店，仲有，佢哋係咪一年先清一次幫客人寄嘅信，umum，再一次證明，係香港人心急啫，人哋最終都會做嘅~

我忙到一頭煙教緊佢哋寫postcard時，原來有個人又歎緊個露台，哈，啱嘅，享受到最後一刻~

前往其他馬來西亞旅遊blog

Comments

comments