我哋房休息一陣，主要係兩個小朋友去遊戲室用晒啲電，要靜態少少回一回氣，跟住先再出動，佢哋兩個卡通片台放題，我摺埋啲衫，day出咗去歎露台~
百看不厭嘅露台海景~
起碼都六點後先食晚餐吧，我哋早少少出去行下黃昏嘅沙灘啦~
有靚景當然要換番套靚衫影下相啦~
踩落去好舒服嘅無盡沙灘~
爸爸影嘅靚相
開始日落
沙灘之中有啲有水嘅部份
心心x3
我哋係RRR~
我叫佢哋帶我去兒童俱樂部見識下，哇，個繩網好玩喎，我都試下先~
著拖鞋好唔方便，赤腳仲好﹗
兩隻識途老馬好熱烈咁帶我試玩唔同設施呢~
cute cute詩
個天空嘅顏色一直變化，變得好橙、好靚呢~我哋再出去影下相啦﹗
我叫兩個擺pose，好好展示手上嘅henna圖案，我記得以前睇America’s Next Top Model時，啲model都會放隻手係臉龐展示珠寶，但點解佢哋好似牙痛多啲呢？果然model都係一種專業，唔係隨便可以做~
都係自然啲啦
捧住個大陽
blu blu blu~
時間差唔多，我哋慢慢行番去位於Ocean Wing嘅Oceano Modern Grill食晚餐~
幫三父女揀咗兩杯無酒精飲品，我自己就叫咗杯cocktail，當時嘅我覺得我打blog時實會仲記得叫咗杯咩，所以冇刻意記低，但呢一刻返咗嚟兩個幾月，專登打開酒店網頁去搵搵個beverage menu去睇，依然一啲印象都冇~根據我嘅習性，我應該會揀有當地特色嘅名嘅特飲為先，另外就係揀口味…
umum…根據呢兩個條件+飲品嘅顏色，呢兩杯會唔會係Borneo Cooler(strawberry syrup, raspberry syrup, cherry syrup, sprite)同埋Funky Monkey(banana puree, orange juice, coconut cream)呢？
我嗰杯，或者係Rasa Ria Sling(Gin, Triple Sec, Cherry Brandy, Angostura Bitter, pineapple juice, orange juice, lime juice, grenadine, soda water)？
食物未送來，先嚟麵包拼盤，麵包愛好者曉即刻非常興奮~確實，我食咗今個trip最好味嘅麵包，仔細睇，四個餐包係屬於兩款唔同麵包嚟架，外貌上係有少少差異，兩個個面「令」啲，係軟餐包，另外啞色啲嘅係硬餐包，脆啲~個暖暖嘅軟餐包加上牛油，真係好好味~我哋火速食晒成籃包﹗
小朋友叫我一定要影低呢舊有餐廳名係上面嘅牛油~
主菜方面，我哋叫咗兩人份嘅grilled meat platter，另加一份squid ink risotto，份量應該差不多了~
曉見到個「漢堡包」，當然比起肉吸引啦，食食下原來漢堡包嘅內餡係鵝肝，「點解啲味咁怪嘅？」哈，真係唔食識貨~我本來都唔識貨，係冇耐之前同診所醫生們出去食飯時，食到人生第一次覺得好味嘅鵝肝，我先對呢樣食物改觀，因為以前對鵝肝嘅印象，都係同豬潤或其他內臟冇乜分別，但嗰次去黃金海岸間法國餐廳食過，外面煎到脆卜卜好甘香，裡面柔軟半溶化又香濃，非常好味，我就開始對鵝肝改觀~今次呢個foie gras slider雖然冇上次個鵝肝咁好味，但都ok可以食下嘅~
小朋友見我唔食羊，佢哋毫無原因之下又跟我唔食，唔知點解唔跟爸爸食呢？結果爸爸食晒份羊架，我哋三個食多啲牛肉啦~食物其他部份印象唔算好深刻，味道算係中規中矩吧，加上環境，都係食得舒服嘅一餐~
就係呢間Oceano了~
食飽飽佢哋好期待返房嘅下一項節目，就係浸戶外浴缸啦﹗
我哋研究應該著泳衣浸定光脫脫浸，結論係著泳衣浸~因為我哋睇人哋啲露台好清楚，人哋睇我哋都好清楚，要人哋睇我哋唔清楚，就要熄晒自己露台同房啲燈先得，黑麻麻好似唔太好，另外可以落戶外浴缸嘅窗簾都得，但睇唔到壯闊嘅海景嚟浸又浪費咗佢戶外嘅特性，好啦，著泳衣啦~
酒店提供咗蚊香，其實都唔係好覺有蚊，但爸爸都為戶外浸浴而點咗蚊香，當時都未意識到sandflies患係有幾大問題，總之，我哋嘅浸浴好安穩地進行咗~
唔知點解曉衣著咁保守，上次去墾丁之前，我專登買咗啲bikini泳衣俾兩個，可以同我一齊著，點知曉而家大個唔鍾意啲「咁露」嘅泳衣，連游泳教練要佢唔准再著防曬泳衣，要買競速泳衣，佢都想揀啲唔露背嘅款(但冇喎，最保守嘅最多俾你唔露大腿啦，著何詩蓓嗰啲款啦)，細個時明明冇問題架(請參閱：19-1-2016：曉出國之檳城假期&吉隆坡婚禮day 2(part 5)．曉曉泳裝下水禮、2-7-2019：曼谷華欣暑假快人一步親子遊day 4(part 1)．游游游、池畔午餐)~今次係自己露台個浴缸浸，佢先終於肯著套bikini~
好啦，我唔post你張相啦，詩就no problem~
浸完浴，瞓一覺好嘅，迎來day 7，亦係最後一日嘅行程~
前往其他馬來西亞旅遊blog