旅程剩低嘅兩日時間，我哋會全程留係Shangri La Rasa Ria，除咗已經book咗嘅活動之外，我覺得必去嘅一定係好好享用酒店泳池，又有滑水梯，又有好多好多沙灘椅，要好好歎下~加上，啱時間嘅話仲可以參加各種活動添~Garden Wing嘅泳池先有滑水梯，咁我哋今日先去Garden Wing食自助早餐，之後嗰日先留Ocean Wing食半自助早餐啦，小朋友，換埋裙仔泳衣過去咯~

個露台永遠都咁受歡迎~

完美天氣

雖然同先一晚嘅自助餐係同一個地點，但早餐超級多人，見到啲侍應做唔切，我份餐具甚至出現兩把刀嘅蝦碌場面~食物係冇問題嘅，不過唔夠人執枱帶位囉~呢邊早餐內容唔太深刻，諗得起再加上去啦，我記得早、晚嘅自助餐都有小朋友corner，不過我兩個小朋友口味成熟，都冇話兩眼發光嘅樣子，都係按自己口味揀啲嚟食~

食飽飽，我哋去泳池邊搵個靚位坐低，影下相先啦~

曉最近好鍾意自拍，特別係好多人嘅group photo，但呢張效果有啲搞笑囉~

爸爸影呢張好sweet~佢仲用咗嚟做電話個wallpaper添呢~

哇，有活動呀，有強勁節拍嘅音樂，稍後有水上排球，而家係熱身時間，大家係水中跟住節目主持人/教練做健體操，好熱鬧，好在個泳池有唔同水深嘅位置，大家可以按身高企唔同位~

曉真係大個女，佢竟然都想同啲陌生人一齊打水上排球，佢好勇敢地俾主持人分組，主持人都係按大人細路、男人女人比例咁去分啦~嗶——-開始，哎喲，曉唔夠高丫，雖然佢而家游水游得唔錯，但要踩住水嚟接波、打波、拋波，似乎好難呢，堅持咗一陣，我哋決定離隊，自己去玩了~

兩條滑水梯，一長一短，兩個小朋友不停sir，兩個去sir，拉住我一齊去sir，拉住爸爸一齊去sir，無限loop~

sir下長嘅

又sir下短嘅

我哋見佢哋對個環境好熟悉，我同爸爸就搵個陰少少嘅位置望住佢哋，幫佢哋影相~好在嗰次買到個防水手機套咋，大派用場~

佢哋走咗去忙，我哋終於有少少二人世界~

迅間變番熱鬧~

玩到咁上下我都要睇住時間，因為下晝我約咗做spa，所以要係出發做spa之前食完lunch，我哋發覺，嗌room service有個好處，價錢同去餐廳一樣之餘，仲可以一次過嗌晒幾間餐廳嘅menu都得，最重要嘅係可以沖住身嚟等，同埋佢哋食得慢，但我快啲食完，都可以出門口先，唔駛話丟低佢哋係餐廳咁~但有個壞處，就係以沙巴嘅悠閒速度，唔知order咗幾耐可以送到房間，大半個鐘應該得啩？

我哋預好時間，離開泳池，按計劃去沙灘行行，影下相~

沙好幼，但好似Tanjung Aru嗰啲沙踩得再舒服多少少，太陽非常曬又非常熱，差不多要曬燶了…

壯闊嘅沙灘

度假嘅好心情

小朋友話要堆沙，我腳步快，先返房落room service嘅order，然後沖身先，佢哋玩多一陣再返來，食物應該差不多到了~

我返房路上，佢哋繼續玩多一陣~

望海

堆咗Mari Mari文化村嗰條鱷魚呀﹗不過係迷你版~

一望無際

回程

我返到去當然係第一時間落order叫食物先啦，仲唔係太餓，叫得唔好咁heavy~

小朋友未返來，我靜靜雞自己歎下個露台~

正當小朋友換衫之際，叮噹，食物到啦，大家迅速躲避呀，因為成架餐車推入嚟，你哋一隻二隻光脫脫快啲匿埋~

原來架餐車好勁﹗凍嘅沙律、凍飲放上面，熱嘅其他食物係下面個暖櫃度熱住，所以唔即刻食都保持食物水準，個湯粉啲湯仲要分開上，食嘅時候先自己加~

登登﹗

因為房間本身有啲餐具，我哋share嚟食好方便~天氣咁舒服，我提議出露台食，umum…好似冇張適合嘅枱同椅囉~

anyway，兩個小朋友坐戶外我serve佢哋，我就同day坐番餐枱，食得舒服又自在~

食物樣樣都有水準，自助早餐食得飽，呢個午餐叫得light啲正好~

食飽飽我出發先啦，媽媽自己去歎spa啦，你哋去兒童遊戲室玩得開心啲啦~

前往其他馬來西亞旅遊blog

Comments

comments