26-12-2023：沙巴熱辣辣聖誕遊day 5(part 2)．悠閒歎resort@ Shangri La’s Rasa Ria Resort

今次沙巴之旅嚟七日六夜，我揀咗住四晚city，住兩晚偏遠少少嘅resort，一來resort比較貴唔好住咁多晚啦，參加tour時早出晚歸享用唔到啲設施住咁靚都係浪費，二來參加各種tour都係住city pick up比較方便，我哋不停外出去玩咗幾日，day 5我哋搬去遠離城市嘅Shangri La’s Rasa Ria Resort，好好享受一下海邊同度假設施~正正最尾一日就直接離開呢度去機場，所以入住前都係買好晒啲手信先比較好~

離開Mari Mari文化村時，我個心掛住啲手信，但day個心就掛住啲洗咗嘅衫，咁好啦，我哋去洗衣店拎番啲衫先再出去買嘢啦~最近幾次去旅行，除咗帶喼裝我哋嘅行裝之外，仲會放定兩個摺疊式旅行袋，我哋稱之為「竹篙灣袋」，因為上次爸爸去竹篙灣隔離時就係用呢個旅行袋了~我哋冇時間摺埋啲衫啦，塞晒啲乾淨衫入個竹篙灣袋，去到嗰邊酒店先慢慢摺啦~

我哋酒店附近有個大商場，應該可以係超市買晒啲手信啦~

好繽紛嘅商場聖誕裝飾

仲有聖誕老人派糖果~

我記得商場仲有一間炸薯專門店，賣炸薯條、炸薯堡、炸薯角、炸薯格格脆等等，好專門﹗另外我哋又逛咗一間露營用品店，入面啲嘢好多都好靚，我哋少去露營就無謂啦，但家姐佢哋好似乜都有，都唔知買咩俾佢哋先啱~商場入面有個超大遊戲室，睇落都好玩，但唔好分心，唔好分心﹗我哋唔應該俾呢啲冇計劃過、周圍都有嘅遊戲室耽誤咗入住resort嘅時間，好在兩個小朋友從來冇察覺過我嘅內心曾經有所動搖啫~我哋有逛過少少玩具店，因為返香港之後冇耐就到詩詩六歲生日，我哋話如果有揀得啱嘅生日禮物都可以買，當然條件係香港未見過嗰啲啦，但啲玩具睇落同香港賣嘅差不多，咁就算數了~

去到超級市場，我當然兩眼發光啦，通常都會唔小心越買越多，樣樣都想試~day嘛，成日買咗手信，結果有送出去嘅，都只係放完假之後嗰日返工俾同事嗰啲有帶去，我想話，打blog呢一刻已經三月，但佢話帶返教會請細路食嗰啲仲係屋企呀﹗﹗﹗係呢個超市買嘅榛子口味白咖啡我而家係屋企都仲飲緊，不過我嫌佢太甜，飲咖啡根本唔落糖嘅day就更加唔會飲，所以我同時有韓國Kanu出嘅Latte，早餐食得少啲時我就飲呢個甜甜沙巴白咖啡，其他時候就飲Kanu，day飲過濾式咖啡時我就飲佢嗰包再沖第二次貪佢淡啲，好多選擇~

滿載而歸

買完好多嘢，又重又攰，我哋要快啲返去Hyatt Regency拎番啲行李，上車抖抖，出發去Shangri La Rasa Ria啦~我哋call架Grab過去，今次裝滿兩隻喼+兩個竹篙灣袋，坐得逼逼地，平時我成日影佢哋坐車瞓晒覺我都冇手影，要攬住個旅行袋~

原來爸爸係路上影到彩虹呢~

Shangri La Rasa Ria好大，有分Garden Wing同Ocean Wing，其實較多設施位於Garden Wing，但我偏偏要book Ocean Wing嘅房，點解？陣間會話俾大家知~司機放低我哋，要叫醒兩隻嘢，到啦，起身啦，呢度好靚呀~

Resort獨有嘅半戶外lobby，就感受到自己去度假~

有酒店職員接收咗我哋嘅行李，但未有counter可以check in喎，佢叫我哋坐低等等，為我哋送上毛巾同凍飲，但佢冇問我咩名，又冇俾號碼牌我喎，個lobby咁大，會唔會轉頭被遺忘，又俾其他新嚟嘅人捷足先登去辦check in呢？香港人都係太心急、大匆忙啦，我坐得冇幾耐(我真係覺得好耐丫嘛)又走去「露下面」，等到兩個細路都dur晒，爸爸叫兩個去數下棵聖誕樹由幾多個盆栽砌成，咁又消磨少少時間~

兩個俾人老點去數嘢…^^”

我趁等緊嘅時間研究一下嚟緊三日兩夜嘅食嘢同活動嘅安排，有興趣嘅活動就到時間參加就參加啦，盡量食下唔同嘅餐廳啦~好難得曉居然肯唔黐住我哋，夠膽去小朋友登山探索大自然活動，我當然好想成全啦，點知full咗了…最後，活動方面，book咗旅程day 6我下晝去做spa，day 7一早我去上SUP瑜伽班，中午我同曉去騎馬~食嘢嘛，先決定第一晚去食自助餐先啦，其他之後再算啦~

好嘢，終於可以check in上房﹗﹗真係好遠，我哋由Ocean Wing嘅lobby行上房都花唔少時間呢，就係咁遠，先有咁寛闊嘅空間嘛~

要行好長嘅走廊先返到房~

我今次點解要book Ocean Wing，因為好鍾意呢間junior suite嘅超大陽台，同埋陽台上嘅超大浴缸(可能叫浴池比較適當)同埋超大sun bed﹗﹗﹗但始終係雙人套房，即使係King size bed，對於四個人逼晒上去瞓嚟講，都會即刻變得唔舒適，所以都係決定加張床俾曉，而家大個女，寧願自己瞓張加嘅單人床，詩仲係要黏住我，我好好享受埋呢三兩年啦(或者更短)~

呢張影得有啲傻，不過可以透過大玻璃睇到少少個戶外浴池~

歎~

陽台望出去嘅超闊沙灘~

同埋度假村全貌

同老公露台自拍

舊年十月我哋好有幸可以免費住咗香港半島酒店嘅勁勁套房，大鄉里們對於衣帽間、大廁所浴室或其他設施唔會太驚訝，因為半島仲勁好多倍，除咗個超大陽台係半島冇嘅之外，佢哋覺得最有趣嘅，居然係座廁旁邊擺放咗一疊memo紙同埋一支筆，相信本來係俾啲好忙碌嘅貴人臨時記得要事，或者辦大事時聽個電話有啲咩要非即刻記低不可，但曉詩就理解為，放係廁所即係俾你記錄大小二便啦，跟住兩個就呢三日兩夜內每次到訪呢個廁所都會清楚記錄自己放低咗啲乜，真係又核突又搞笑囉~

行出去食晚餐，日落了~

自助餐唔錯，有咩好深刻我唔係太記得，職員提議我入Shangri La個會，因為免費登記可以食自助餐即時有優惠﹗另外記得最尾嗰日遇到個香港女人，佢啱啱第一日到，搭訕問下我哋呢幾日玩成點，有咩推薦咁，我同佢講個自助餐都似香港$600幾蚊嗰啲質素，其實我嘅reference係覺得似黃金海岸酒店嗰類水準囉(我哋就地理之便，人生之中去得最多嘅自助餐非黃金海岸莫屬)~