今日上晝我哋去Mari Mari原住民文化村玩，個tour 10點開始，我哋終於唔駛咁早起身啦﹗下晝就搬酒店了~食早餐之前，梳洗好嘅爸曉組先出門，去邊？

做去旅行好重要嘅事﹗﹗出去洗衫﹗爸爸好鍾意笑我去旅行鍾意洗衫，成日都影我呢啲相，今次變成影曉~(請參閱：26-12-2022：首爾江原道冬日滑雪行day 5(part 4)．平昌鳳凰度假村、我愛暖暖地熱房、yummy韓式炸雞)

本來7日嘅熱帶地區旅行都可以旅途上唔洗衫嘅，但洗咗衫可以隨便啲換乾淨衫，而且返到香港唔駛洗咁多日先洗晒啲衫，當時都唔知仲有額外多一個好處，就係呢間洗衣店啲洗衣液非常香，返到香港好耐，偶爾拎一件沙巴洗過又之後未著過嘅衫出嚟著時，聞一聞即刻心曠神怡，隔咗一個月都仲可以繼續享受呢度而嚟嘅香味~

洗衫達人﹗可以繼承媽媽衣缽~

之前咪講過，曉將兩件事寫咗落去交俾老師嘅隨筆度嘅，一樣係非常精彩嘅螢火蟲之旅，另一樣居然係去洗衫呀，可想而知呢件事對佢嚟講都好特別~最特別嘅應該係用紙幣嚟換啲coins去洗衫，原來啲coins唔係馬幣，而係洗衣店代幣，為咗唔想浪費啲coins，佢哋好似揀咗個勁啲嘅洗衣程序，不過最後都有剩coins，唯有帶咗返嚟做紀念品，或者唔知幾多年後可以再帶去馬來西亞洗衫啦~

搞掂就可以返嚟嘆早餐啦~Hyatt Regency呢幾晚book咗有club access嘅房間，一直都冇乜好好享用過lounge service，我哋決定最後一個早餐去lounge度食~

食物種類應該係冇樓下大餐廳選擇咁多，但環境一定完勝，有無敵大海景，而且比較光猛，寧靜舒適~雖然話選擇冇咁多，但基本嘅西式、馬拉式早餐都好齊全嘅~

終於可以悠閒少少，影下相~

食飽飽兵分兩路，我同詩返房執行李，預備check out，爸曉組出去自助洗衣店將啲衫轉過去乾衣機~

Mari Mari文化村嘅套票冇包交通，我哋要自己call Grab去，車程都係半個鐘左右啫~

去到先做登記

我哋遲咗少少，但原來都要等齊一組，分批出發~今日人都好多，基本上一組跟住一組咁出發~

坐係度等出發

行入去啲部落有條吊橋，上次又搖又高加上同時落雨，曉都克服咗咯，今次梗係冇問題啦~

文化村有五個原住民嘅部落嘅介紹，每一個部落有唔同嘅示範同體驗行程，但所謂文化嘛，都係八九不離食﹗﹗﹗感覺成個早上不停食食食、飲飲飲，有得試就梗係體驗下嘛~

第一站居然係飲酒先~導遊講解點樣用米同埋其他材料釀酒~

到手﹗

其中一度食竹筒飯，導遊講笑話係monkey meat，嚇到啲細路個個唔敢攞嚟食，佢見玩大咗，先改口安慰大家，係chicken啦，chicken~

仲食咗啲咩呢？食咗pancake、炸脆脆、蜜糖，飲咗斑蘭汁、另一款酒、咖啡…

蜜糖

真係好多嗡嗡嗡蜜蜂圍住，serve我哋試蜜糖嘅工作都唔易做呢~

炸脆脆嘢

好似得我覺得好食~^^”

煎pancake

又有酒飲，yeah~

cheers~

我打緊呢篇blog時，詩詩係旁邊話「呢個地方好驚」，好驚？我問佢係咪獵頭族嗰部份好驚，佢唔係好講得出邊度驚，大概係成個氣氛太exotic，講唔出都感受得到同平時好唔一樣~獵頭族嗰部份，我估如果係我細個時去，我都會好驚~

話說呢位大哥係獵頭族，佢示範點用樹皮嚟織佢哋件戰鬥衣，導遊講到佢哋好得人驚咁，但講解完之後嘅合照部分佢非常友善呢~

食以外嘅體驗，其中一個好有趣嘅係屋入面嘅「傳統彈床」，話說啲原住民有慶典時會將啲禮物掛係屋頂，然後大家努力彈上去拎禮物，掛啲咩禮物？導遊話iphone嗰啲囉，講笑啫~今次體驗冇禮物攞，大家純粹開心跳下，首先係小朋友組，啲本來睇落有少少可怕啲原住民同大家一齊唱ABC一邊跳，好大反差~之後到女士組，最後係男士組，好熱鬧~

爸爸同其他唔識嘅佬一齊跳彈床~

另外仲有吹毒箭體驗，導遊邀請啲男士去學做原住民戰士，我就冇去試了~睇落，射支箭出去唔難，要瞄準都真係要練習呢~

吹毒箭體驗(而家應該唔會蘸毒啦~)

差啲中箭take 1﹗我同day係咪太浮誇？曉索性唔扮嘢~詩就扭扭擰擰唔知點扮~

仲有參觀結婚新房~

你哋兩個係咪嚟鬧新房？

究竟係舊定係新？

發現呢條用泥土同石頭堆嘅鱷魚，後來曉同詩都係沙灘照辦煮碗，堆咗一條鱷魚呢~

路上有啲好陡嘅樓梯，所以另外都有暢通易達路線~

逛完五個部落之後，我哋去一個表演場地就座，成個上午嘅遊客都齊集係度睇表演，睇完歌舞表演就去開餐了~有啲tour早啲完成嘅人，可以排隊畫henna係手，我哋都好羨慕呀，但表演就快開始，再唔搵個靚位坐低就可能要分開坐了~

表演中規中矩，熱熱鬧鬧咁啦，有趣嘅係，原來台上表演嘅男男女女，正正就係之前各個部落同我哋做各種demonstration嘅族人﹗包括煎pancake、斟酒、食人族之類嘅各位，果然要全方位樣樣掂先可以做呢份工作﹗

睇完show我哋移動過去餐廳就坐，早坐低可以早啲開始出去拎嘢食，樣樣都攞到~

食咗好多餐差不多嘅團餐，兩個小朋友都不太興奮~但我覺得，正正係因為食好多餐呢啲比較簡單嘅團餐，今個trip先至重得1kg返嚟，我過個農曆年都肥2kg呀~

我哋額外買咗兩個椰青，雖然好平，但唔凍之餘唔算特別甜呢，少少可惜~我食飽飽，但詩未食完，其實已經有少少俾職員催話要走啦，可能佢哋準備迎接下晝嘅客人吧~我同曉把握時間，去旁邊嘅紀念品店買咗少少手信~

好好彩，出番去正門，有啲Grab啱啱送下晝嘅客人嚟到，我哋隨即call番佢可以搭番出去市區啦~

前往其他馬來西亞旅遊blog

Comments

comments