坐番45分鐘船程返去，今次曉唔再怕呢隻船了，玩到攰極嘅所有人仲係拋下拋下嘅大浪之中瞓著晒添~
充一充電，我哋上番麵包車，導遊Nelson話我哋先去食下午茶，咦，乜有呢個行程嘅咩？
我哋嚟到一個海邊休息區，有個小小嘅半露天座位區，serve咖啡同埋少少小食，休息區仲有好多吊床同埋秋千，沙灘好大浪，似乎唔適合落水玩~
點解咁多咁長、咁大浪嘅沙灘都冇人滑浪嘅呢？究竟係唔流行丫？定係水裡面有好多大石頭會危險呢？
秋千任玩唔駛排隊~
我都唔執輸~
歎~
話說係吊床同秋千之間移動時，我忽然覺得腳趾痛一痛，仲維持咗好一陣子，望望腳趾、望望沙地，似乎我俾螞蟻咬丫﹗我就諗起，平時幫啲小朋友友打針，啲陪同嘅大人總會話「好似俾蟻咬咁痛架咋」，事實上我一直都冇俾蟻咬過嘅記憶，今次俾蟻咬，我覺得打針冇咁痛又冇咁驚囉，起碼支針係冇菌嘅死物，唔需要擔心感染、或者對昆蟲汁液過敏嘅問題，而且俾蟻咬完都痛得幾耐丫，之後我唔敢赤腳係呢個沙灘度行啦~
仲有啲打咭影相位~
曉攝影師，但都要爸爸做導演~
到咗集合時間，我哋上番我哋架麵包車，去到一個河邊嘅碼頭，原來係去坐船，乜唔係睇螢火蟲咩？個天仲咁光，點睇？莫非坐好耐，由天光坐到天黑？原來我哋去睇動物，好彩嘅話，可以睇到特別沙巴獨有嘅長鼻猴~
出發認證照
開心出發
船開出，Nelson話，河嘅一邊有人居住，另一邊係保護區，唔准發展，所以應該係保護區嗰邊更大機會搵到動物~
即使冇動物睇，坐下船遊河都好舒暢嘅~
大家專心落力搵﹗
第一隻馬騮係我spot到架﹗﹗﹗我視力冇爸曉兩父女咁敏銳，但今次俾我威番次，不過唔係長鼻猴呢，只係普通猴子~因為搵到第一隻，之後就變得好神經質咁樣，呢樣又懷疑，嗰樣又懷疑係咪動物~有一段好長時間完全乜動物都見唔到，大家就講笑話，因為係聖誕節，所以啲動物去晒開party呢~
有啦有啦﹗你睇嗰隻興奮嘅手指~
大家見到幾多隻？
仲有呢度…
同埋呢度﹗
結果成程船見到最多都係普通猴子同埋各種雀鳥，見唔到長鼻猴~路上有另一隻船停低，唔知係度觀察啲乜，嗰邊導遊話見到有水獺，但我哋去到時乜都見唔到了~
坐完船我哋再次搭車返去之前個沙灘休息站，而家恍然大悟了，原來嗰度係我哋嘅晚餐地點，之前因為有空檔時間，所以過去坐一陣~
我哋食小小的自助餐~
我要求唔係太高，覺得啲雞、炒菜、煎蛋、西瓜、白飯咁樣簡簡單單已經好好味，今餐仲有蝦片，同埋炸蕃薯添~
小朋友唔係話太唔鍾意食，但無奈佢哋嘅正常速度，特別係詩，係真係好慢，到Nelson話要再出發時，仲未食完，我要幫佢加速先得~
我哋再次去同一個碼頭，哦，原來睇螢火蟲都係同一條河、同一個碼頭上船，今次唔駛搭太耐，好快就去到戲肉﹗
睇螢火蟲有幾精彩？讀小三嘅曉長假期通常要寫隨筆，老師話寫幾長都得，佢之前都係寫一段，一般四五行左右，有啲同學甚至只寫一句~今次去沙巴咁多咁精彩嘅事，曉唔單止揀咗睇螢火蟲嚟寫，仲寫咗一頁半﹗﹗﹗因為寫得太長，佢寫得太攰，攰到寫唔到多幾樣內容，最後只揀咗兩個主題，一個係螢火蟲，另一個究竟係咩呢？不如大家估下~
船開咗冇幾耐就熄咗引擎慢咗落嚟，周圍黑麻麻一片，Nelson話要變戲法俾我哋睇，佢數one-two-three拍一下手，一講Merry Christmas，周圍就好似亮燈儀式咁，一下子著晒燈，細細的一點點光係遠處嘅樹上，好震憾、好靚、好浪漫、好迷人~真係同蟲唔同命，平時啲蚊呀、烏蠅呀、曱甴呀，我哋whee嘩鬼叫不特止，仲係咁趕佢哋走，但螢火蟲就好可愛好迷人~係咪練習過？應該冇咁聰明吧，而且原來雄性螢火蟲只有四個星期壽命，雌性螢火蟲要生b需要多啲時間，可以生存到六星期，但都好短暫呢，邊有時間練習俾你啲人類睇喎~
我哋上船前Nelson叫我哋洗定手，點解呢？先前講過嘅「亮燈儀式」後，船家揮動一盞燈，啲螢火蟲就好似卡通片或者韓劇咁(啱啱煲完宋江嘅「與惡魔有約」，就有呢一幕)，慢慢飛過來我哋身邊，所以大家可以近距離輕輕捉住佢哋嚟許願，手我哋有洗，但我哋四個都唔敢捉呀，怕會錯手打死佢哋~雖然冇主動去捉，但有隻螢火蟲停係曉嘅手上面唔走呢，開頭覺得好可愛，仔細觀察下佢，原來佢瘦瘦小小，屁股真係發光呢~後來想送佢返屋企佢唔走呀，fing呀、吹呀都唔走，咁我接走佢先啦，點知螢火蟲去咗我大脾之後又唔肯走，到我哋差不多返回碼頭先離我哋而去，真係好特別嘅體驗呢~
今個trip嚟到呢度真係結束啦，真係由朝玩到黑，坐完船已經晚上七點幾，已經玩咗一個對了，搭番車出去市區嘅酒店仲要搭多個幾兩個鐘呢，全部人都攰到變晒喪屍啦，好在day 5終於可以唔駛咁早起身了~
返到酒店，發現酒店送俾我哋嘅聖誕曲奇，但睇落太甜，到打blog呢一日事隔兩個月，我哋仲未食呢~
前往其他馬來西亞旅遊blog