之前有打算過，day 2上午休養生息過後，下午就出動去參加直板板日落tour，因為有個買一送一優惠，要用兩個唔同Klook account先可以報到名，一直諗住等埋day係同一時間同一空間一齊book，點知後來就錯咗過book嘅時間~既然去唔成玩直立板睇日落，都可以就咁去欣賞呢個聲稱為全球十大日落美景嘅Tanjung Aru Beach嘅~
咁不如食個lunch，逛逛商場，差唔多時間先去沙灘啦~Google Map話，由酒店行過去附近比較大嘅Imago Shopping Mall只係27分鐘，ok丫，唔算好遠，順道逛逛亞庇市區啲街~點知行落就唔太對路了，後來問起啲本地人，原來本地人通常唔會點用雙腳去移動，一係自己駕車，一係call Grab，所以一方面行人路鋪得唔好，另一方面公共交通都非常唔發達~加上天氣勁熱勁曬，我就冇乜問題，但曉係非常唔耐熱嘅，9個月大第一次嚟馬來西亞時已經係咁，一出戶外就dur晒，一入室內就即刻生龍活虎，估唔到8年後都一模一樣~我哋唯有行到頂唔順就衝入去便利店涼一下冷氣，休息一陣再行過~我有提議過索性食經過嘅餐廳，比起冇冷氣嘅餐廳，佢哋寧願頂硬上行埋過去商場~
dur dur曉休息飲水中，我同領先詩休閒自拍~
見唔到行人嘅城市
商場聖誕裝飾
士的女王
話說為咗上次去墾丁嘅玩水假期，我專登淘咗兩個手機防水套，上次帶咗去結果冇乜機會用，點知今次唔記得執落行李度~咁難得會去浮潛，不如試下係度買一個啦~經過一個非常local嘅舊式商場，有大量手機鋪，入去感覺時光倒流到細個時嘅九十年代嘅感覺，又有少少去咗南豐中心咁，有個防水手機套—-賣RM 3﹗﹗﹗我實在接受唔到交托幾千蚊嘅電話俾一個3蚊嘅套(港幣$4.8)，後來靚靚Imago Shopping Mall有個賣RM 25我又嫌佢貴，究竟最後有冇買到呢？
好不容易，終於去到Imago，好在冇令人失望，冷氣夠凍，餐廳選擇夠多~
即使商場門口有民族表演，餓極攰極嘅我哋影一張相就衝去搵嘢食了~
見呢間泰國餐廳即刻有位，食物又好似ok就坐低咗~
呢度原來興用手寫點餐紙，後來即使有啲餐廳有得掃QR code睇電子餐牌都好，都係用紙仔落單，對於我哋外國人嚟講幾好丫，省卻咗溝通時間~
呢間餐廳最有趣嘅部份係泰國船麵，一碗RM2.7，當其他碟頭飯要RM15左右時，真係好好奇RM2.7嘅船麵係點嘅狀態~
見到人哋堆到山咁高嘅碗仔，有咁好食？
上菜時真係哭笑不得，我同day嘅口應該係一碗一啖，曉可能一碗三啖，難怪啲後生仔食十碗八碗~day好欣賞呢個安排，「咁咪可以早午晚下午茶都食囉﹗」例如早餐食5碗、晚餐食10碗之類，食多食少，好似迴轉壽司逐粒點咁有彈性，哈哈~
正常size嘅碟頭飯
船麵隔離坐咗韓國三母子，嚟到我哋都發現咗，沙巴有好多韓國人，原來韓國遊客多，嚟做生意、工作嘅韓國人都好多，後來同我哋浮潛tour同團就有對韓國情侶了~
食飽咗有番表情可以影相，原來餐廳叫做Mia Boat Noodle
商場紀念品店
食飽飽本來想行多一陣街，點知詩冇電了，要抱住瞓覺，我抱到冇力交俾day，後來見曉都攰就索性搭車走了~第一次call Grab，唔知順唔順利，雖然話距離Tanjung Aru Beach唔算遠，唔知道路況如何，睇日落錯過咗時機就冇啦，寧願早啲去到等個太陽落山吧~Grab好容易用，仲可以連香港支付寶俾錢添~我哋坐幾次Grab，遇到華人司機都會高興地同我哋傾下計，問下我哋嘅旅程，問下香港啲嘢咁~
曉同詩要趁呢程車好好叉叉電啦~
我哋去到Tanjung Aru Beach時間尚早，落車位置有啲食嘢嘅檔口，我哋食到飽飽連坐低飲嘢都冇乜興趣住，等佢哋清醒一下頭腦，逛逛沙灘先~
沙灘好大，即使人好多都各自有好足夠嘅空間
開心
Tanjung Aru Beach啲沙好細好幼滑，赤腳踩起嚟乾嘅濕嘅都好舒服，沙灘好大浪，踩下淺水嘅位置就ok，游水似乎就唔太適合了~
沙灘亦可以做小朋友嘅超大環保畫板
我哋沿住沙灘由一邊行到另一邊
爸爸影得咁好嘅
沙灘靚係靚，但太陽未落山實在非常熱﹗﹗﹗好在後來嘅日落好靚，又影咗好多靚相，值回票價，對於超怕熱嘅兩個小朋友嚟講都仍然係一個評分高嘅目的地~
熱到令人冇儀態嘅程度
行到咁上下見到啲參加直立板日落tour嘅人開始上堂、落水，真係好慶幸我哋book唔到個tour﹗原來要撐船撐到比較出嘅位置，雖然話著救生衣啫，但一人帶住一個，控制住一樣唔熟悉嘅工具，出去比較大浪嘅開放水域，逗留一段比較長嘅時間，再開始入黑時撐返上岸，都幾challenging，應該會好大心理壓力~後來個trip有機會俾我一嚐玩直立板嘅心願，所以冇失望呀~
行到沙灘嘅另一邊，太陽未有耐落山，個天都未開始變色，我哋決定要搵個地方坐低等日落~
嗰度沙灘旁邊有一片大草地，有啲樹又有幾個涼亭，好多一家大細本地人嚟玩，一邊野餐或BBQ，一邊唱K，佢哋會用車仔帶備重型卡拉ok機嚟唱歌，有的是空間，一個家庭製造幾多噪音都好，都唔影響到遠處另一個涼亭嘅其他人，正﹗
沙灘嘅另一邊有個大招牌
返過去一間景觀唔錯嘅餐廳，好啦，坐低鬆鬆，飲杯凍飲，等日落~
Imago Shopping Mall網站：
前往其他馬來西亞旅遊blog