先一晚太夜瞓了，所以決定day 2一定要悠閒mode，儲番啲精力，上晝就先歎下酒店泳池，下晝再算啦~
我哋較嘅鬧鐘，係最後可以食到酒店自助早餐嘅「最後通牒」鬧鐘，瞓到咪瞓晏啲囉，雖然帶住小朋友去旅行通常都會早醒過個鬧鐘~
天光終於望到個海啦﹗
關於酒店自助早餐，除咗我哋比較習慣食嘅西式早餐之外，亦有唔少本地傳統食物，特別少少嘅我都試咗好似粽嘅葉包飯，不過裡面冇餡嘅，主要吸引我嘅都係食慣嘅食物多啲~
比較有趣嘅係有個可以自己收割沙律菜嘅corner，有把較剪係度，你可以直接由好多棵生菜之中，揀你心儀嘅嗰片生菜葉剪落你隻碟度~新鮮度100%，不過我覺得今次沙巴trip啲生菜味道比較澀，唔太啱口味，後來食沙律我都索性唔夾沙律菜了~
自助餐桌上的「農場」
曉農夫收割中
先一晚check in時覺得個lobby昏昏暗暗同埋有少少簡陋，原來未見到靚嘅部份，自助餐廳對出嘅座位好明亮，咁先似樣嘛~
下左同下中…有塊小膏藥貼住我背脊呀﹗好啦好啦，一齊影啦~
聖誕裝飾與短袖衫，總係唔太搭調
食飽飽唔好即刻去游水住，我哋話睇下lobby有冇咩local tour嘅資訊，順便出去酒店附近隨便逛一圈，天色好好，前面就係海了，附近有啲比較local嘅街道同商場，售賣嘅貨品類型都係針對本地人，我哋睇起嚟反而更有趣味了~原來我哋好近有個叫做菲律賓夜市嘅景點，但睇啲網上資料，同埋後來聽啲本地人講都唔recommend遊客係嗰度食嘢，睇嚟條腸唔夠勁應該會頂唔順~
色彩繽紛嘅本地小商場
最近鍾意呢個pose
We love KK?
Kota Kinabalu﹗
後面就係我哋酒店了
返去泳池望望先，好多人游緊啦~
打算返房換泳衣時，啱啱房務員執緊房，話要半個鐘左右先搞掂，我哋決定上去13/F嘅Club Lounge坐坐，今次book房專登揀咗有club access，見價錢唔係差好多，但就有個額外嘅地方可以休息，又可以無限量供應飲品同snacks，上次去高雄時我哋勁鍾意嗰個免費嘅七樓lounge(22-7-2023：暑假高雄墾丁遊day 2(part 3)．最愛七樓青豆、鸚鵡螺餐酒館晚餐)，有club access應該都唔錯吧？我哋入去時職員啱啱收拾緊早餐啲嘢，仲未知其他時間有咩snacks供應~我同day順便研究一下呢幾日嘅安排，出發前其實冇話好實在咁plan好邊一日做邊樣嘢，可能因為有少少陰影吧，上次去墾丁因為個颱風，結果乜都做唔成~我只係揀咗幾樣我認為一定要做，幾樣我都有啲興趣想做嘅，之後再排~講到沙巴，一樣must係神山，另一樣must就係陽光與海灘，去墾丁時浮潛同直立板都玩唔到，我今次係好想玩番呢兩樣嘢~趁有時間，我哋book好埋啲local tour，有定案了，day 3去神山、day 4出海，我哋係度傾傾傾篤篤篤電話處理時，詩居然係張梳化度瞓著咗，仲扯埋鼻鼾添，真誇張~
唔好浪費時間，正﹗
好啦，換好衫，可以落下面游水啦~
泳池唔算非常大，但都夠開心了~
酒店提供咗啲水泡、沙灘波、浮床俾大家自助拎嚟玩，好正~今次曉對自己游水就更大信心，有時都肯唔拎住浮板嚟移動，詩就成個池由頭到尾都腳唔到地，好在醒目地幫佢帶定水袖嚟~我哋幾個算係玩得最耐了，玩到中午太陽最曬嗰陣，如果唔係催佢哋要上水準備食午餐都唔想走住呀~
中午時份，太陽再光啲，映出個海嘅顏色更靚了~
Hyatt Regency Kinabalu網站
https://www.hyatt.com/hyatt-regency/en-US/bkiki-hyatt-regency-kinabalu
前往其他馬來西亞旅遊blog