點解今個trip要去沙巴？放完暑假開學，出咗校曆表，又係時候要諗幾時再去玩~始終大家疫情後依然瘋狂地去最想去嘅旅行，日本嘅機票依然貴到令我停一停、諗一諗﹗落實買機票嗰排我哋三母女好迷阿盆姐，佢一位雲南姑娘youtuber，用好多在地食材嚟煮好多美味大餐，加上風景勁靚，我曾經認真地plan過去雲南，不過day覺得小朋友們會覺得悶，而且疫情後嘅旅行資訊唔算多，我都放棄咗~我有search過飛去韓國轉機去日本，價錢ok喎，但平時對行程少有反對嘅老公覺得太頻撲，我都認嘅，係辛苦咗少少~^^”下次再去日本啦~我後來反覆search下亞洲地區嘅機票，相對低價機票嘅幾個目的地之中，老公好快揀咗沙巴，好啦，就去啦~
馬來西亞去過好多次，我連東馬嘅古晉都去過，但熱門啲嘅沙巴反而未去過，Air Asia有直航機，除咗時間唔靚之外，其實都幾方便，三個鐘左右就去到啦~正正因為時間唔靚，我哋兩個當天仲可以返工添(其實詩本來都要返學，不過佢病病地請咗假~)~我睇完症，去埋診所Christmas Party，因為冬至早放，爸爸已經返到屋企，三父女已經開始執住行李先~之前連續好多日都超勁忙，我只可以係個腦海度演習執行李，全靠詩詩事先幫手做咗個圖畫check list(有時要靠畫家本人協助先知道嗰樣係咩)，感覺踏實啲~
話說出發呢日係香港少有嘅寒冷天氣，連我返工都著埋之前著去韓國嗰啲加絨厚褲，我哋去到沙巴變成夏天，究竟值唔值得著得咁多去機場呢？反正都係搭的士點到點~因為都擔心機場登機有啲戶外嘅接駁，都係唔敢搏，Heattech厚衛衣羽絨照著，最多唔著長嗰件羽絨啫，最多帶多個手提旅行袋裝冬衣嘅啫~
去到機場已經可以除咁一兩件~
我哋都預得比較多時間提早出門口，因為廉航冇飛機餐，反正起飛都8:40pm，我哋索性食飽飽晚餐先上機咯~過security、香港離境，我哋去禁區food court搵嘢食~
去東南亞旅行前係咪唔應該食東南亞菜式？anyway，揀咗泰國菜，估唔到，我哋去到沙巴之後，自己搵食嘅第一餐居然都係泰國菜~
家姐一家同一日，應該話同一晚都出發去澳洲旅行，佢哋send咗逸逸玩候機室遊樂場嘅相出嚟群組，我哋稍遲一步都去咗嗰個遊樂場啦，yeah~
呢張影得我哋三個都好cute~
指定動作﹗我係今次旅行，先知道原來去沙巴要飛嘅城市係亞庇，即Kota Kinabalu(英文名反而聽過呢)~
check in時地勤小姐話我哋要抵埗前填好網上嘅入境form，唯有默默低頭努力啦~
細飛機座位係三、三編排，唯有我同兩隻坐一邊，爸坐走廊嘅另一邊了~
一坐低，小朋友就好有興趣咁睇飛機座位嗰本雜誌，同平時嗰啲唔同，除咗有航機上售賣嘅duty free化妝品之外，仲有介紹收費嘅飛機餐、小食套餐、航空公司紀念品之類，價錢又唔貴，一個飯盒都係MYR18(而家兌換率乘1.6)，回程可以考慮訂餐，係飛機上食下嘢，有啲嘢做，時間快啲過嘛~之前睇完韓劇<<歡迎來到王之國>>，女主角其中一個best friend係做空中小姐，故事入面講佢哋係機上銷售嘅duty free貨品營業額好緊要，今次再搭飛機，我又特別留意下空姐們點樣推銷，Air Asia好搞笑喎，原來serve完飛機餐之後，佢哋會開咪介紹貨品，不過我哋冇幫襯~一早預咗冇機上娛樂，所以小朋友們事先係ipad download定啲卡通片係Netflix同Disney+，我唔駛咁複雜，因為追緊<<恢復單身的人們4>>，我download定多幾集係手機就ok了~小朋友們用緊我對air pods睇卡通片，我就閉目養一養神，到佢哋瞓覺時，就輪到我追片集啦~
好在瞓到睡眼惺忪都可以自己行落飛機，我哋攞番行李之後塞晒啲羽絨入喼，著係身上嗰啲忍得到就算數了，反正返酒店應該都好快啫~不過離開機場之前都想睇下唱唔唱到少少錢，話說馬來西亞管制貨幣兌換，所以係香港唔可以換定錢，原來上次旅行用剩唔夠200馬幣返香港，感覺唔太踏實，好在爹媽屋企有啲馬幣可以借住俾我哋先~機場找換店個rate好差，不過試咗ATM唔知點解提取外幣都係唔成功，算啦，夜喇，都係聽日至算啦~
原來機場搭的士係有counter按距離俾定錢，然後拎張飛仔去搭車，感覺唔會俾人呃，安心啲~不過我哋今個trip搭「的士」都係僅此一次，之後都係搭馬來西亞version嘅Uber—-Grab周圍去，Grab app算好遊客friendly，唔需要本地電話號碼/本地銀行卡或戶口就可以用到，即download即用都得，我哋day 2就試咗call啦~
7日旅程嘅6晚酒店之中，頭4晚我哋住市中心嘅Hyatt Regency Kinabalu，參加local tour pick up都方便啲，check in時都有其他香港人入住~
排隊check in
小朋友好在可以砌住積木等~
夜晚抵埗時嘅印象覺得酒店lobby殘殘地有少少失望，估唔到第二朝好明亮時感覺完全唔一樣呢~我哋房間嘅相都冇影，總之快快脆脆沖涼瞓覺啦，太夜了~
前往其他馬來西亞旅遊blog