23-7-2023：暑假高雄墾丁遊day 3(part 1)．玫瑰聖母聖殿主教座堂主日彌撒、高雄流行音樂中心

早睡早起身體好，成個台灣trip，基本上日日都超早起身，只期望曉唔好五字頭起就好，佢而家大個，識得娛樂自己，唔會嘈住我哋瞓，但咁早起真係會好快冇晒電嘛~翰品酒店早餐冇分時段，幾時去到都有得食，我哋住咗三晚，三個早上嘅早餐時段都唔駛排隊，可以即刻入座~

曉早咗起身無聊時隨便抄隨便畫

曉真係大個女了，今次去旅行，食自助餐佢可以完全自己出去攞嘢食，夠高睇到食物夾到食物，夠大力可以捧得穩隻碟，識字可以知道內容係乜，夠大膽可以唔需要爸媽係視線範圍內自己單獨行動，不過仲差一點，有即煮食物station時怕醜未夠膽同廚師講普通話order食物囉~

day 3係星期日，時間安排得到我哋去外地旅行都會嘗試參加下當地嘅主日彌撒，今次高雄嘅玫瑰聖母聖殿主教座堂就係我哋酒店嘅步行距離，當然要去啦~出發前search咗，彌撒時間係早上7點、9點、11點、下午4點，本身都冇target一定要參與邊一台彌撒，估計都係11點機會居多，但食完早餐發覺居然趕得切9點鐘彌撒，當然要試下衝過去啦~

等爸爸去一去廁所時我哋周圍影下相，我記得上次嚟高雄時都有影過酒店正門架~

又有before and after﹗

步行去聖堂要過愛河對岸

去到聖堂彌撒都係啱啱開始冇耐，我哋望下邊度有座位夠坐我哋四個人，有禮儀服務員嚟問我哋「邊一區」，咩嚟嘅？我哋唯有回答「我們是遊客」，佢就帶我哋坐低咗了~後來知道嗰日啱啱係教友大會，「區」可能係要投票時點票用嘅之類？咁就唔知道了~

天主教彌撒嘅流程，去到全世界都一樣，當年去瑞士時嘅拉丁文彌撒(時間久遠，未開始打blog啦~)，即使嘰哩咕嚕唔知神父講乜都好，睇住幾時對答，幾時企，幾時坐，幾時跪，都知道去到邊個位，今次普通話彌撒，當然冇問題啦~

佢哋冇彌撒經書同歌書，可以睇mon，每隔幾排座位就有一個mon，字體夠大隻，可以睇得好清楚~如果要照住讀嘅部份，我同day都好努力盡量一齊用普通話讀，如果係好熟可以背嘅經文，就唔理了照背平時背開嘅廣東話，字數相同嘛，可以一齊開始一齊完~唱歌？居然遇到有同曲唔同詞嘅聖詩，高興地各有各唱，yeah~彌撒結束，坐後面嗰排個婆婆拍拍我膊頭，讚完我唱歌好聽，就問我哋係咪香港人，因為佢聽到我哋講「天主」而唔係「tian zhu」~後來佢哋堂區直落有教友大會，我哋外地人就走先啦~

聖堂外觀

本來諗住返酒店稍稍休息就去下一個景點，點知詩行出去幾步就話要去廁所，驟眼見唔到聖堂個廁所係邊，就游說佢返酒店先去啦，行返去都好近之嘛~行返去途中又見到先一日見到嘅「海洋派對．高雄聯萌」充氣公仔係愛河兩旁嘅大樓上面，好可愛，不如都影下相先啦~咦，嗰度有幾楝好有氣派嘅建築物，開地圖睇睇，咦，咪上次公公婆婆去完，仲大大推薦一定要參觀高雄流行音樂中心？一定有得借廁所，或者可以順道參觀埋~

發現蜜柑站長，而家search番資料，原來呢幾個巨型公仔夜晚會亮燈呢~

後面好有型嘅建築物就係高雄流行音樂中心了~

你哋三個都好可愛呀~

經過一個叫做「海音館」嘅音樂廳之類嘅建築物之後，就係「流行音樂互動展」所在嗰楝「音浪塔」了~快手快腳搵咗個廁所解決咗，我哋睇睇點樣買飛參觀先~

原來展覽係4-6樓，除咗地下嗰層有「海洋派對．高雄聯萌」精品嘅pop-up store之外，其他樓層似乎都係唔同音樂團體嘅工作室、live house之類嘅嘢，不過好多都未開門呢~

好多扶手電梯縱橫交錯，上去四樓點行呢？

雖然入面counter有人類職員，但買飛係用機器買嘅，入去俾職員check飛之後，就蓋個印仔係手上面，後來去其他地方都有入場蓋印，小朋友就好好奇，咁咪成手都係印？﹗其實都好快洗得甩嘅，下一個問題可以預測到，「咁洗甩咗以為你冇買飛點算？」，咁又冇咁快~之後又好大機會會問「咁唔小心洗甩咗呢？」-> 沒完沒了mode…^^”