返去嘅路傾下計，睇下啲站名，聽下廣播，好快就返到我哋酒店位於嘅鹽埕埔站，就係呢個時候發現嗰隻招財貓原來識得張開眼嘅~
地鐵站見到呢個「海洋派對．高雄聯萌」嘅廣告，都唔知係乜，淨係覺得佢哋好可愛~
後來我哋係愛河兩邊見到佢哋嘅大型公仔，又係高雄流行音樂中心見到佢哋嘅pop up store~啱啱打blog先search下，原來幾個character係唔同插晝家筆下嘅主角，分別叫做鯊西米和好友哇鯊米、蜜柑站長同貓貓蟲咖波，仔細睇下難怪佢哋畫風唔同啦~
返去路過便利店，記得買樽大水，翰品酒店著力推動環保，房間唔提供樽裝水，但有俾個玻璃水壺你可以出去走廊斟水，唔同溫度嘅飲用水都有，但無奈太太太太太難飲~冇辦法，都係要買樽裝水，就因為樓下間便利店用國際信用卡太方便，令我哋誤會周圍都可以用到信用卡，結果換嘅台幣唔太夠，後來換多一次都仲係有啲緊張，影響少少行程，下次都係要預鬆啲先穩陣~
返到酒店，以食晚餐嚟講時間仲早早地，大家諗起酒店七樓有個lounge有免費飲品同零食，不如去坐下休息下啦~
勁﹗個lounge全日都開放，咖啡、茶、汽水、果汁無限量供應，餅乾、零食十幾款任食，夜晚happy hour時段連啤酒都係任飲(我哋見到有鬼佬用裝水嗰個玻璃水壺斟啤酒入房飲)﹗不過兩個小朋友最愛都係青豆零食，每日入去一次都一定要食青豆，後來我哋仲係超市買咗青豆返香港添(雖然唔同牌子)~
好啦，返房執一執個背囊輕便啲出去搵食啦~我哋研究地圖，睇下附近邊度多啲食肆，見到呢間靚靚地嘅鸚鵡螺，又係小朋友鍾意嘅西餐，就試下啦~入去係有位，侍應話食物最快都要30分鐘，urrr…都好啦，飲住嘢等應該ok啩~
哇，佢哋真係好攰，等嘢食幾乎瞓著咁滯﹗﹗出發前嗰排佢哋最鍾意聽農夫，仲要係好舊嘅大碟，2008年出嘅舉高隻手舊愛新歡全紀錄，唔單止有幾首識得rap晒全首歌詞，仲要自己配啲動作一邊做一邊唱，好在airpods可以一人一隻耳，坐得開少少都可以一齊聽，飲下紅莓汁，聽下歌，總算冇等到瞓著覺~
攰樣
我見係酒吧，睇下drink menu見有我最愛嘅sangria就點咗嚟飲，飲品嚟咗有少少後悔，一來個sangria麻麻地，太汽水、酒味太淡，二來我發現呢度原來係專門飲手工啤酒架，仲有好多款式添，早少少知道我就叫啤酒啦~
永完正確嘅carbonara同我杯sangria~食物味道算係中規中矩啦，比較重口味~
攰詩與pizza
烤雞沙律
比較中式口味嘅魷魚
加點嘅炸雞risotto
另一方面，我又係order咗一個二人餐+一個risotto，點解份量又係多得咁交關嘅？「台灣嘅二人餐好大份」已經變成根深柢固嘅觀念，點都改變唔到啦~
食飽飽，要返去休息了，因為已經好攰好攰啦~
高雄翰品酒店網站：
https://kaohsiung.chateaudechine.com/tw/index
待續
前往其他台灣旅遊blog