22-7-2023：暑假高雄墾丁遊day 2(part 2)．大大南洋午餐、鈴鹿賽道樂園(下)之考到車牌啦、SKM Park Outlet

努力減肥有一年了，又好有成果，知道每去旅行都係好大機會會失守，所以頭幾日都食得比較節制，即使早餐係自助式都唔食咁多唔食咁heavy，加上行路行得多，每日都好早就肚餓了~大家都玩到有啲攰，好在鈴鹿賽道樂園旁邊嘅SKM Park Outlets有好多食肆，想食咩？盡快有位坐低嘅餐廳囉~嚟到台灣第一餐食咗麥當勞，第二餐係酒店早餐…

估唔到下一餐都未輪到台灣地道食物，而係一間叫做「山水婆」嘅新加坡菜館，原來得番高櫈位，難怪即刻可以入座啦~

平時喺香港我哋出街食飯多數叫三個大人份量左右，我哋四個人share應該差不多，印象中台灣嘅食物冇香港嗰啲咁大份，我哋都叫住三人份先，唔夠再加啦~於是我叫咗一個二人餐，另外加多一碟炒粉同埋一杯飲品~

食物開始到就覺得有啲唔對路，點解二人餐啲食物嘅portion咁大嘅呢？﹗上咗三碟左右我哋就話，喺香港，二人餐咁樣份量就差不多了，點知陸續有來，而後加嗰碟炒粉一直都未到，我哋四個人食完個二人餐都飽飽地，真係大份得好誇張，一來飽，二來炒粉都辣，結果都食唔晒~

左上嘅雞我哋有懷疑上錯菜，明明話海南雞，點解同我哋印象中嘅咁大差異嘅？人哋隔離枱都有我哋熟悉嘅海南雞食架，睇番二人餐，先見到係特色海南雞，同我哋一樣坐高枱嘅另一家人又係叫二人餐，都有呢碟雞~左二係最好味+最送飯嘅泰式炒肉碎，有咗呢一碟，其他全部唔嗌都ok了~左下個春卷第一味上菜，因為太肚餓，係唔太知道味道情況之下就食晒了~右上係正常嘅肉骨茶，但份量完全係四人餐嘅份量囉~右下嘅炒粉就係我哋對佢唔住、食唔晒嗰碟了~

今次去台灣，食飯要影嘢食嘅相時成日都提起我家姐，因為家姐係「史官」，所有嘢都record得好完整好細緻，我明明都要材料嚟打blog，但硬係食咗兩啖先記起要影相，結果就出現影少一碟，或者碟餸缺咗一忽嘅相囉~

今次好在有影張單﹗唔小心食咗先影嘅甜品同埋忘記咗影嘅菜都仲有文字記錄~甜品係班蘭千層同埋椰糖千層，好明顯太好味所以一食就停唔到~冇影到嘅飲品有跟餐嘅檸檬茶同埋嗌俾佢哋嘅荔枝蘆薈，仲有蝦醬高麗菜都冇份影相~

下晝我哋先去玩摩天輪，食飽飽唔好玩啲咁激動嘅嘢住~

打blog嘅呢一刻唔係好記得喺摩天輪上面睇咗啲乜，同day傾番，係呀，因為個摩天輪好矮，其實冇乜咩特別風景睇，同埋全程我都不停回答兩個嘅提問，「上去幾多個圈架？」「係咪落番嚟就完啦？」「係咪一直都咁慢架？」仲有一大堆唔記得咗嘅問題…

再encore「滴答電車」，唔駛排太耐得嚟小朋友又鐘意~

我強烈鼓勵曉再挑戰「酷拉奇駕駛學校」，上次唔成功，今次有經驗應該好好多啦，唔好有遺憾嘛~今次佢憑自己力量成功「考到車牌」，佢特別自豪，因為詩詩有爸爸幫手，而佢就真係只靠自己努力﹗30分以上有普通駕照，我得到80分以上有黃金駕照，我估真係要啲成日嚟嘅人先可以得到滿分100分嘅白金駕照吧？呢張駕照係真有用架，考到資格，俾少少錢去辦證，成年之前入嚟樂園再玩同一個設施有折扣架~家姐笑我張證一辦好就冇效，因為我本來已經成年~

詩詩有爸爸師傅坐旁邊

我哋得咗啦~

下午又encore咗旋轉木馬，點解影到張咁嘅相？因為爸爸玩第二次去咗坐個歎位囉~

之前曉玩咗「甩尾小車手」，另外有個大人版嘅「飄移高手」，都係兜個細圈嘅迷你賽車，爸爸知我爛玩，經過時叫我快啲去玩，小朋友未夠高，又唔肯放爸爸陪我玩，我唯有自己一個去玩啦，不過因為自己一個人，排隊特別快排得到，玩起嚟又特別寂寞，駕咗幾個圈之後開始想快啲完~我去玩「飄移高手」時，爸爸帶兩隻去玩多次一開波時玩嗰個「越野大冒險」，我玩完時正好見到佢哋駕到路線嘅尾段，可以接番佢哋~

詩詩幾次經過「自由落體」時，一直心思思想試下玩，佢終於邀請我同佢一齊玩了﹗

佢真係大膽+爛玩詩，驚10%、興奮30%、歡樂60%，我哋兩個一齊大叫一齊舉高手，真係比第一次自己玩時開心好多~多謝你呀詩~

我同詩詩出嚟，曉見到我哋玩得咁過癮，曾經因為俾我呃咗去玩迪士尼Space Mountain有陰影嘅曉都想挑戰一下呢個跳樓機，基本上只係等人哋玩多一轉又到番我哋，本來想俾詩坐係曉隔離壯下膽，點知職員話詩太細個，一定要同大人坐，咁唯有我同曉坐，詩同爸坐，唔知係咪呢個組合太錯呢，定曉根本唔適合玩刺激嘅機動遊戲呢？跳樓機升上去，落嚟嘅第一下曉就開始驚到喊，喊足全程，喊到我心都痛埋，點解玩極都未完，好想即刻結束落番地面呵下佢~好不容易「捱」完一趟嘅「遊戲」，我哋返回地面，曉仲係好激動，好啦好啦，我以後唔會邀請你或者鼓勵你玩啦，你想嘗試時先主動提出啦，玩唔到刺激機動遊戲又唔影響啲乜嘅~

我哋去食雪糕平伏一下情緒，叫個家庭裝揀三款味吧﹗