自從返咗小學之後，曉嘅生理時鐘非常強勁亦非常穩定，返學放假都唔賴床之餘，仲早到離晒譜，去旅行呢九個早上，我哋未試過遲過八點起身，多數係六點幾，亦試過五點幾(大家要記得，台灣同香港係冇時差嘅)，完全唔駛擔心趕唔切食酒店早餐，仲可以早一早去食添~
翰品酒店嘅早餐果然冇令我失望，睇番2017年篇blog，當時陀住b嘅我好大食，一嚟就食白飯+小菜(請參閱：26-8-2017：開學前3+1高雄假期day 2(part 1)．親子開心高雄兒童美術館)…
2023減緊肥嘅我當然唔可以食得咁heavy啦，沙律菜、蛋、粥、水果係我主要嘅配搭，呢個自助早餐食咗三日，種類大同小異，但菜式就每日都有變化，味道有驚喜~
食完早餐我哋就出發去今日嘅目的地—-鈴鹿賽道樂園，行過去捷運站時，我哋見到6年前嗰隻招財貓呀，一定要同佢再合照，打blog時就可以整before and after啦﹗
2017﹗
2023﹗
我哋四個之中，最大變化係詩，由肚入面嘅一團肉，變成今日可愛活潑嘅小女孩了~影呢隻招財貓時有段小插曲，望住隻招財貓覺得有啲怪怪地，我專登睇番2017年張相去對照下，係喇，對眼唔同咗﹗﹗係咪耐得滯壞咗？隻貓老咗有白內障呀﹗﹗傍晚返酒店時再經過先知道，原來貓貓朝早係未瞓醒，佢當時係合上眼，晏啲先會張開眼，仲會眨眼添，人哋不知幾精靈~
落到捷運站去買飛，原來台灣係小學生開始搭車先至要俾錢，今次去旅行去好多地方都只係買三張入場券~話說今次執行李時，我係屋企點都只係搵得一張悠遊卡，好唔憤氣，嗰日為咗搵悠遊卡同之前用剩嘅台幣，仲徹底地執咗幾個櫃桶添，點知都係搵得一張，同埋搵唔到台幣，今日睇番2017嘅blog，原來當年都係得一張悠遊卡咋，可能由始至終都係得一張﹗今次我哋買多兩張，下次再去台灣，應該要幫詩買多一張添lu~
搭捷運到草衙站就可以去到鈴鹿賽道樂園，不過時間太早，樂園未開門，連旁邊嘅outlet都未入得去，但早起嘅小朋友已經有啲攰~
難得搵到個樹蔭位可以坐低，更難得大大粒嘅8歲曉都肯俾我攬住瞓一陣，啱喇，休息一陣先有精神玩嘛~
夠鐘開門啦﹗樂園開門由一段歌舞揭開序幕~
今日好多人去鈴鹿賽道樂園旁邊嘅SKM Park Oulet，原來有function，聽day講係好出名嘅youtuber叫做蔡阿嘎，所以一早就好多人排隊有簽名會，之後仲有舞台活動同埋紀念品店，所以outlet嗰邊特別熱鬧~
不過鈴鹿賽道樂園人就唔多，朝早基本上唔駛排隊，下晝開始要排都係排得一陣~鈴鹿賽道樂園係駕駛主題嘅樂園，有各種車可以俾大人小朋友駕駛，亦有一啲其他機動遊戲~我哋買嘅係任玩套票，除咗少部份遊樂設施要額外付費之外，大多數都可以玩無限次~因為鈴鹿賽道樂園冇入場費，而遊樂設施可以按次收費或者用任玩套票，所以行outlet嘅人可以過嚟玩一陣，又或者玩到熱可以去商場涼下冷氣食下嘢咁~
我哋用Klook買飛有優惠，去售票處兌換好手帶就衝去玩lu~首先最吸引小朋友嘅係夢幻嘅旋轉木馬~
開心~
呢個「越野大冒險」係俾大人玩架，超過130cm高嘅曉都未可以自己駕駛，呢架越野車要上山下水，經過凹凸不平嘅路段，扭軚盤原來都要幾用力，職業司機都唔易做，我同day一人駕一架車，兩個小朋友暫時做小乘客~
呢個迷你跳樓機我全日玩咗三次(任玩套票先會做啲咁嘅事)，其實第一次我自己玩係想吸引佢哋試下多過我自己想玩，玩機動遊戲自己一個真係冇咁好玩架~
下一個遊戲到小朋友做司機啦~呢個ride叫做「滴答電車」~
今次做電車車長，雖然有路軌，但可以自己調較速道同埋按鈴架~
曉車長
呢個叫做「甩尾小車手」嘅係小朋友嘅迷你賽車，兜住圈咁行，詩太細要大人一齊坐一架車，曉可以自己一架，發現速度除咗關踩唔踩油事之外，最重要就係體重﹗﹗我哋一坐大人上去，即使踩盡油都係蟻咁嘅速度囉~
跟住玩埋旁邊嘅「酷奇拉駕駛學校」，呢間駕駛學校好認真架，見到紅燈/讓要停，見到小動物要響安，進入隧道要開大燈，車輛要維持係車道正中間，全部都有計分架﹗
曉自己一架車
我做詩詩嘅學車師傅~
第一次玩有啲難，加上有啲餓又有啲攰，曉第一次玩拎唔到駕駛執照，有少少唔開心，好多人考車牌都唔係一take pass啦，我哋去食個飯先，之後再返嚟玩啦~
鈴鹿賽道樂園網站：
http://www.suzukacircuitpark.com/
SKM Park Outlet網站：
https://www.skmpark.com/SkmPark/Index
待續
前往其他台灣旅遊blog