為咗想返多一日工，只請五日假，我決定星期五下晝出發，飛機16:50起飛，13:00放工絕對鬆動﹗爸爸請full day，我哋仲可以同我哋最愛嘅美景茶餐廳作最後道別，食埋佢哋結業前嘅最後一次早餐，又帶埋兩隻上午去上暑期班，大家午餐時間屋企集合先再出發~本來住屯門去機場已經好近，起好屯赤隧道之後更近，搭的士更平，我哋順利抵達機場啦~
亂糟糟嘅出發照
對上一次搭飛機係韓國返香港嗰一程，嗰次等過關等到心急如焚，今次香港過關非常順利快捷，入到禁區仲好多時間剩，影完「指定動作」之後，仲可以逛下鋪頭，不過今次帶備嘅娛樂非常充足，機程又短，唔駛買嘢上去食/玩啦~
放假嘅爸爸經常都要眠一眠~
搞笑曉
今次係少女pose
機程只有一個半鐘，短到一齣電影都睇唔晒嘅時間，大家搭得好輕鬆，曉部電視起飛時發現失靈，有畫面冇聲，本來好期待上飛機電視放題嘛，雖然佢好失望，但都冇扭計或者喊，果然大個女了，飛到上去爸爸同佢換位就有得睇電視了~
上次去韓國幫佢哋order兒童餐，點知兒童餐食炒飯已經唔太鍾意，普通餐仲要有哈密瓜而兒童餐冇，所以今次問兩個要唔要特別餐時，佢哋都話普通餐就ok~
我後來先發現，原來以飛高雄嚟講，兒童餐嘅意義並唔係食物內容，而係所有特別餐都係派咗先，派完晒特別餐先按座位前後派普通餐，兩個食得咁慢，雖然個叉燒飯只有一個筆盒咁細，which is我可以5至10分鐘食完，但佢哋絕對需要額外時間，早知order特別餐啦，咩都好~亦因為個飛機餐size太迷你，落機後已經有少少hungry，再唔盡快食嘢就會變hangry~
抵達高雄了﹗
雖然地鐵都可以到我哋位於鹽埕區嘅翰品酒店，為免變成hangry而令太家遭殃，我哋都係搭的士去酒店啦，本來以為兩個奔波咗成日會喺車上瞓一陣，結果又唔瞓喎~我一邊睇住地圖睇下周圍係啲咩，咦，原來我哋day 2會去嘅「車車樂園」就係機場好近嘅地方喎，到咗酒店附近，就金睛火眼睇下附近有咩食肆仲營業~
上次詩詩係肚入面我哋嚟高雄嗰次我哋都係住翰品酒店，今次第二次入住了，印象中床好大，好近地鐵站，早餐好好味，所以唔諗其他了~
果然房間真係好舒服，可惜浴缸細咗少少，唔夠我哋三母女一齊浸~
幾舒服都好，我哋盡快出去買嘢食﹗最近又最快嘅首選，登登登登登，就係酒店轉角嘅麥當勞﹗﹗
order咗食物之後，爸爸同攰到傻咗嘅曉返酒店先，非常期待食物嘅我同詩詩就等嘢食~
同韓文老師講起去到台灣第一餐食麥當勞，佢一臉惋惜，覺得應該食餐好嘅至係~不過嘛，我其實都幾鍾意去下世界各地嘅麥當勞，每個地方嘅麥當勞都有當地特色~我每次都要舉印度做例子，印度人唔食牛唔食豬，所以香港人熟悉嘅巨無霸、豬柳蛋、足三兩當然全部都唔存在啦，除咗有雞、魚之外，嗰度有幾款素菜包，我好記得食過炸薯餅包同埋沙律菜包(請參閱：12-4-2008：初來孟買報到，睇番15年前寫嘅blog，果然係我自己寫嘅，描述啲包時嘅句式都同15年後嘅今日一模一樣，同埋原來當年都係第一日去到時就麥當勞﹗)~
韓文老師問我咁台灣有咩特色包，umum…我唔係好講得出，總之香港冇嘅款式啦，我同day都係牛肉嘅burger，入面加咗啲唔同餡料，我啱啱睇咗台灣麥當勞嘅官網，記憶返嚟啦，day食嘅係蕈菇安格斯牛肉堡，我食嘅係BLT安格斯牛肉堡，曉話要食沙律所以叫咗個義式烤雞沙拉，睇嚟韓國麥當勞冇湯飲吧，曾經係台灣生活一段長時間嘅韓文老師提醒我，台灣麥當勞有粟米湯，係呀係呀，我有飲呀，其實香港麥當勞都間中有唔同款嘅湯供應嘅~
食飽飽，舒服晒，可以去沖涼瞓覺啦，小朋友堅持要進行佢哋嘅重要項目，好啦好啦，浸啦浸啦，浸完要瞓覺啦~
高雄翰品酒店網站：
https://kaohsiung.chateaudechine.com/tw/index
台灣麥當奴網站：
https://www.mcdonalds.com/tw/zh-tw.html
待續
前往其他台灣旅遊blog