去完韓國返嚟，打完晒啲blog，又係時候開始plan下一個trip，嗰頭講話三年唔去旅行都冇乜咩啫，嗰頭去完一轉旅行魂就返咗嚟，成日都心思思篤下機票酒店app~原本三月時曾經見過暑假去福岡有2000尾嘅機票，但嗰排成日聽到日本班機取消，仲有咁多個月先暑假都唔敢落實住，後來隔幾日隔幾日再入去價錢就越嚟越貴~問下老公去邊好，佢要求好簡單—-「唔好去咁遠啦~」既然要近，又咁耐冇去，就去一轉長嘅台灣啦~之前去親台灣都係用long weekend，多數都係勉勉強強嘅四日三夜，都未試過去個長嘅，今次豪氣地去台灣十日，咁咪可以玩耐啲，慢慢歎囉~
飛高雄平啲又近啲，同埋講到暑假梗係要玩水啦，我對上一次去墾丁，恐怕唔係小學都係初中嘅事，除咗墾丁夜市嗰條烤魷魚之外，我乜都唔記得晒了(講起嗰次trip，當時已經係成年人嘅我爸居然唔記得自己同過我哋去墾丁，而媽咪就記得唔夠cash要去換錢嘅一幕，大家都冇乜details仲記得~)，咁就去高雄+墾丁十日啦﹗
略略睇下墾丁有咩玩，唔想太匆忙，決定住五晚，最後瞓一晚高雄先返香港，咁自然安排就變成—-
高雄3晚 -> 墾丁5晚 -> 高雄1晚
原定計劃墾丁五晚之中兩晚住靚少少嘅resort，三晚住經濟少少嘅近海民宿，諗住一方面有得歎下resort，另一方面早出晚歸跑景點時就住平少少慳番少少，但計劃嘅嘢都要按情況調整，大家睇落去就知道後來發生咩事了~
幾個月之間，訂好機票、酒店，臨出發嗰個月上網辦好入台證，訂好長途包車，只要等放假就出發啦﹗
待續
前往其他台灣旅遊blog