出發前編行程嗰陣，曾經好樂觀咁樣安排咗好多江陵嘅行程，例如早餐要食韓文老師話好出名嘅豆腐湯，去完美術館之後，中午再去中央市場食街邊嘢～後來當然知道冇可能啦，所以我哋都決定，行完美術館，就喺附近搵地方食嘢，之後返車站搭KTX去平昌就差不多啦～
由美術館行出嚟，遠遠見到隔離棟building外牆寫住「어린이 카페」，真係要識韓文，先至可以嚟到下一個地方，如果唔係，可能隨便喺美術館間cafe解決咗就算～「어린이 카페」即係兒童咖啡廳咁解，唔知點樣兒童法呢？行過去先知道原來隔離棟building係水族館，我哋入去嗰個門口係紀念品店嘅出口，但係又搵唔到點樣入去間cafe，去返正門，又只有得買飛入場參觀水族館，問返職員，原來紀念品店後面有條樓梯可以上到去～
呢兩隻水獺似乎就係水族館嘅吉祥物了﹗記得好耐以前去美國時，有個水族館嘅明星都係水獺~(請參閱：28-6-2006：我愛水族館)
哇，正啊！真係有得食有得玩嗰啲親子cafe嚟㗎！小朋友當然好興奮啦～我哋就先settle down，慢慢睇下叫咩嘢食，小朋友就一枝箭咁衝左上去玩lu～
久違了的波波池
長長滑梯，正~
詩詩，你係咪bb呀？不過呢兩隻搖搖海獅真係幾可愛~
扮靚~
中間有條透明通道
媽媽~
真係有得倒啲茄汁出嚟架~
曉曉喺度做乜？
原來釣魚~
小朋友可以喺個安全嘅環境四處走動，爸爸媽媽就可以稍稍休息一陣~
食物選擇其實唔算多，正式飯餐就只有불고기（韓式烤肉）pasta同埋risotto，基本上兩款係一樣味嘅，另外就有啲小食好似muffin之類啦～
我哋叫咗兩麵一飯，咖啡俾爸爸，我自己就飲皇室奶茶，小朋友就叫咗杯士多啤梨smoothie比佢哋～食物味道就一般啦，對於飲品嘅印象係非常甜！！！要加水先飲到！
食物飲品雖然唔算突出，但個遊戲室係唔錯嘅，小朋友最開心係好耐冇玩過波波池，我就覺得嗰個斜路彈床應該幾好玩～當然仲有小朋友最愛嘅煮嘢食部份！
仲有可以自己斟水都好開心~
我哋去嘅時候，客人唔多，除咗我哋一家，就只有另外一家韓國人，個家姐仔仲細過詩詩，細佬仲係BB添～因為詩詩有啲咳，我叫佢哋盡量遠離嗰兩個韓國小朋友玩，點知後來我都聽到嗰家人嘅小朋友有咳⋯果然小朋友係容易啲病～^^”
差不多時間，我哋要離開江陵，出發去下一站啦~我哋搭車出番去江陵車站，搭KTX去平昌嘅滑雪場度假村~
Byebye江陵~
由江陵搭KTX去平昌只係十幾二十分鐘，唔駛預備啲咩嘢玩或者瞓覺，好快就到~
見番呢啲雪景，就知道去到平昌附近了﹗
我哋會入住平昌嘅鳳凰滑雪度假村，度假村本身一日有好幾班免費shuttle來往平昌站同埋度假村，當初覺得自己好聰明，一場去到江原道就順便去埋其他地方，但棋差一著嘅係，shuttle嘅時間表，其實係緊貼住首爾開出至平昌火車班車嘅時間，所以我哋由江陵過嚟係相反方向，火車到站時嘅幾分鐘後shuttle就開出，我哋拖男帶女又有行李，係肯定趕唔切上車﹗果然，我哋落到去，車已經走咗，上番去車站求救~
有個服務遊客嘅櫃枱，個服務人員似乎就係便利店嘅店員(雙重身份？)，佢好友善咁幫我哋call的士~神奇嘅係，由火車站二樓嘅玻璃幕牆望出去街道，遠遠見到有的士駛埋嚟時，嗰位女士就用佢嘅千里眼望落去，佢竟然咁遠嘅距離都可以分到嚟緊嘅的士係屬於邊一個客人，再請嗰位客人落去搭車﹗
的士車程大約只係二十分鐘左右，好快就去到度假村lu~
江陵鏡浦水族館網站：
前往其他韓國旅遊blog