plan行程時我問老師有冇韓國嘅滑雪場推介，另一方面我自己又上網search下，老師推介華人一般叫「洪川大明」嘅Vivaldi Park，當時仲係十一月上旬，但所有訂房網站都話full booking，而喺官網亦book唔到，奇怪嘛，滑雪旺季都未開始~多謝老師專登幫我打電話過去問，原來Vivaldi Park係暫時block晒公眾嘅booking，等佢哋嘅會員book晒，遲一步先開放俾街客book~我唔想個trip太多uncertainty，所以直接放棄咗Vivaldi Park，另一方面老師都有提過曾經舉行過冬季奧運會嘅平昌都有唔少滑雪場，我自己上網就搵咗呢間鳳凰滑雪度假村~睇落冇咁新，但勝在地方大、房間大、附屬設施多，我估計我哋唔係會滑到好多雪嘛，所以要有其他嘢玩都好重要﹗鳯凰度假村除咗有大型滑雪場之外，仲有個水上樂園，冬天會開放室內部份，另外仲有森林步道、夏天有zip line、兒童遊戲室、機鋪、保齡球、卡拉ok等等設施，即使唔滑雪都大把嘢玩~
亦上網見到啲人講，話地方太大，會搵唔到check in位置~之後嗰日家姐佢哋加入行程時，果然要搵check in lobby係有困難，原來shuttle bus停喺滑雪場入口附近instead of酒店/condo附近，如果唔熟悉環境，一下子真係搵唔到~我哋正正因為搭唔到shuttle，所以的士直達lobby前面，好容易就可以check in~
好大嘅鳳凰度假村，呢張地圖係check in時職員俾我嘅，之後嗰日家姐佢哋落咗車搵唔到路時我就影咗send咗俾佢~
我訂房時都知鳳凰度假村有好多房型，有hotel，又有villa，我哋訂咗嘅係condo(啱啱打blog先search下咩叫condo，原來condo全名係condominium，即是apartment咁解)，貪佢有大房大廳，即使冇酒店咁豪華，小朋友有多啲地方走動，一定更開心，而且有得揀韓式房間，即是瞓地下，咁就更開心﹗另一方面，未去到時，我都估唔到原來個廚房會發揮咁大效果~平時啲酒店即使有廚房都唔會用嘛，「傻嘅咩，喺屋企仲煮唔夠，去到旅行都仲想煮？﹗」原來，當休息同時間重要過煮嘅時候，就去旅行都會煮，亦因為condo嘅住客真係會煮，樓下嘅便利店真係包羅萬有(唔知家姐史官有冇影到相呢？我好似真係一張都冇影…)，遲啲再講﹗
condo仲要分藍楝、綠楝、橙楝，入住嘅客人非常多，check in要攞飛，趁呢個時候可以影下相~
聖誕節當然有聖誕裝飾啦~
我哋住橙楝2樓，哇，好遠噃~lobby係藍楝，要經過綠楝先到橙楝~喺呢幾日，呢條來往藍楝同橙楝嘅路行過非常多次，而第一次經過時就發現咗好嘢﹗
房都未上就發現咗洗衣房﹗﹗與其之後再拎落嚟洗，不如開咗機洗咗先啦~不過認真唔好彩，居然個入錢機食咗我幾張1000 won紙幣後完全冇反應，我又出番去lobby搵職員幫手~
洗衣房同時係一個休息空間，有按摩椅、遊戲機、枱枱櫈櫈、微波爐，day話見過唔少人喺便利店買咗嘢食過嚟呢度叮嚟食~三父女等緊我去求救時就喺度休息一陣~最老土嘅係，職員同我一齊返嚟之後，個入錢機又work了~好難證明我哋入咗extra嘅錢入去，冇辦法啦，好難叫佢退嘅，洗到就算數啦~
上到房好開心，因為地熱暖爐非常舒服，喺地面活動時特別正~
休息一下我哋再出動啦，了解一下度假村環境啦，同埋要睇下晚餐食咩~
藍楝除咗有lobby之外，地庫仲有住客每日都會去幫襯嘅大型CU便利店，而藍楝對面係Center Plaza，玩嘅、食嘅都有~
呢間韓式餐廳我哋之後嗰日有同家姐佢哋去食~
出到戶外，就可以真正踩下雪啦~
媽咪，我執到粒雪呀~
出到戶外，有個真嘅火爐，原來職員每晚都會起一個火喺度，真係可以係度坐坐取暖，好有氣氛，不過講到真正嘅暖，比起火，都係入返室內比較實際~:P
周圍一間間嘅小屋係烤肉包廂，曉非常想食烤肉，但我同佢講話等埋姨媽佢哋先啦，姨媽實想食，我哋冇理由連續兩晚都食嘛，雖然有啲失望，但都只能乖乖接受~
食唔成烤肉，不如買炸雞返房食啦，lobby旁邊有間咖啡店，有得賣麵包蛋糕嗰啲，而午餐以後嘅時間就有炸雞take away，我哋先去落order，之後拎番啲衫返房晾，之後應該差不多有得食啦~
Center Plaza – 有位職員友善地主動話幫我哋影~
我哋叫咗半半炸雞，一半原味、一半醬油味，另外一份nachos，我覺得醬油味好食啲，原味有少少dry~爸爸落去拎雞時，叫佢去埋便利店買飲品，韓式炸雞當然要配啤酒啦，但唔飲酒+唔識韓文嘅爸爸買咗提子味啤酒俾我囉，好甜好似飲汽水咁…umum…
喺房慢慢食更舒服~
yummy~
仲有飯後甜品呀~係雪米糍同雪糕鯛魚燒，正﹗
佢叫花花，係詩詩上晝喺Arte Museum揀嘅禮物，大家記得嗰隻好靚嘅小鹿嘛？
食完晚餐，當然係沖個靚涼同埋鋪床瞓覺啦~訂房時我以為冇浴缸，我一早俾定心理準備兩個小朋友，點知原來有兩個浴室﹗﹗一間有浴缸，一間就只有淋浴，真係驚喜﹗不過曉話今晚唔浸了，得我同詩詩兩個浸~
佢哋都好期待下一個環節，就係瞓地下﹗
我哋係兩房condo，度假村提供總共五張床墊，我哋決定全部人瞓晒同一間房，因為靠窗嗰間房有啲寒氣沁入嚟，如果暖氣要開到嗰間房都夠暖的話，內側嗰間房就會熱得滯了，所以一齊瞓內側房就算啦，其實一間房鋪滿床墊都夠晒我哋瞓~舒唔舒服？地硬少少都還可接受，最大問題同上次去露營一樣，都係個枕頭﹗呢個韓式房間連枕頭都非常傳統，好似古裝片嗰啲草枕頭，又硬又細個，轉嚟轉去唔方便，亦唔可以攝隻手喺枕頭底瞓，唔枕可能仲好~anyway，我哋結果都瞓咗係呢個地鋪三晚+一次午睡嘅~
平昌鳯凰度假村網站：
https://phoenixhnr.co.kr/page/main
前往其他韓國旅遊blog