Good morning江陵~

未知江陵實際交通情況時，美好地以為搭的士四處走動會好快捷，點知去到現場，呢個城市太寧靜，除咗喺火車站周邊嘅市區範圍會多啲車之外，其他地方人少車少自然的士少，加上旅館老闆神出鬼沒，如果寄低行李之後都唔知容唔容易拎得番~為咗確保我哋可以順利搭到下晝嘅KTX前往平昌，我哋決定一早將行李放定喺江陵站嘅locker，之後只有四個人需要移動，咁就安全得多~

果然要check out都唔容易，我哋住3樓，2樓有間辦公室，按門鈴冇人應門，商量咗一陣我哋決定放番張房卡喺原來嘅枱面位置，留張字條俾老闆我哋就直接走了~

就咁放低張房卡係原位~

寫韓文紙仔~

好好彩行到出大路總算有截到的士出江陵站~

嚟到時都覺得江陵站起得好靚，新丫嘛~

首爾站嘅經歷都令我哋有少少擔心啲locker會full，怕寄存唔到行李，好在江陵站冇咁繁忙，我哋咁早去到有好多空位~另一個擔心就係，我哋嗰隻爛咗嘅喼，楝出嚟嗰支把手，究竟塞唔塞得入locker呢？

又好好彩，即使咁長收唔埋，locker都容納得到佢~太好了~

我哋揀咗eggbox食早餐，又係即烘即煎嘅雞蛋三文治~

yummy~

話說喺度發生一段小插曲，天氣凍嘛，我哋梗係叫熱飲啦，點知曉俾杯熱朱古力熱親個嘴，跟住變咗驚弓之鳥，驚驚~佢話想飲凍水，偏偏我哋喺酒店帶出嚟嘅，係保暖功能非常好嘅熱水~為咗俾佢飲到啖凍水，爸爸用飲完嘅咖啡嘅紙杯，裝咗少少熱水，行出去戶外兜咗個圈，等杯水輕輕歎凍先俾曉飲~

所以出現咗張咁嘅相囉~

食飽飽我哋搭車去Arte Museum，原來呢條圍繞鏡浦湖嘅巴士路線係循環線，一邊順時針，一邊逆時針行，所以記得要上啱方向~韓文老師教我哋要用Kaokao Map，喺韓國，Google Map冇Kaokao map咁好用，用Kaokao map先顯示得到公共交通工具或步行路線，仲可以用篩選嚟揀自己prefer嘅路線添~不過我聽家姐講韓巢地圖都好勁，打中文韓文都一樣search到，我冇比較過呀，今次個trip基本上都用Kaokao map搵路~

搭巴士~

睇住地圖GPS，聽住到站廣播，順利地喺Arte Museum最近嘅巴士站落咗車~呢個地方好舒服喎，遠遠望過去，原來除咗Arte Museum之外仲有幾個展館，後來我哋知道其中一個館係水族館，其他仲有啲咩就唔太清楚了~

行入去Arte Museum條路都充滿驚喜呢~條小河結咗冰，爸爸掉小石頭落去，好似跌落硬地咁「噠」一聲，大家都好有興趣，「我又掉，我又掉」，大家係咁執石頭嚟試~

結冰嘅小河

唔太凍，好舒服~

散步好舒服~

河嘅另一邊有好多松樹，屋企樓下嘅沙灘都有啲迷你松果仔，每粒只有一條手指甲咁細，喺呢度見到啲好大粒嘅松果，好似雞蛋咁大，兩個小朋友都好興奮，曉係咁話佢哋係「松果先生」，大家仲執下啲松果添~

執松果~

松果先生

小小松樹林

去到Arte Museum啦，小朋友問睇乜，我自己改咗個中文名話係光影美術館囉~下一篇blog我哋就會入去參觀啦~

前往其他韓國旅遊blog

Comments

comments