決定咗要去平昌滑雪度假村之後，我就考慮，如果去多一個城市的話要去邊度，首爾往東海岸嘅KTX，係為咗2018平昌冬季奧運會而開通，記得好多年前睇咗套韓劇(係咪請回答吧系列？)，講去正東津睇日出，好熱血好青春，所以以前去韓國時都有諗過要去正東津，但以前要搭六個鐘夜車先睇到個日出，實在唔太啱我嘅個性，而家有咗KTX，去東海岸一帶容易多咗了，於是就決定去KTX嘅尾站，海邊嘅江陵~韓文老師聽到我哋要去江陵，佢即刻好興奮，介紹我哋一定要食蟹，仲有介紹我哋要去之後嗰日去嘅Arte Museum(要繼續留意blog啊)~

既然唔係睇日出，唔一要咁青春地跟人哋劇情去正東津啦，江陵對出，我哋酒店步行距離有鏡浦海邊~開頭我諗，冬天先去海邊係咪好傻，老師話江陵嘅冬季海景好出名，咁一定要去睇下啦~

即使係冬天嘅傍晚，都有好多遊人，當然都係韓國人為主啦~

以前睇過好多唔同嘅海，屋企樓下行5分鐘都有個海，但鏡浦海邊俾我嘅感覺都好震憾，因為好闊好大，浪好高好壯觀﹗﹗﹗同以前睇過嘅海都唔一樣﹗

睇下啲浪幾高幾澎湃﹗

呼吸自由嘅空氣(一陣)~

而且呢度好遊客friendly，夜晚嘅海邊居然打晒大光燈，方便大家觀海、影相，不過呢，燈打得太好，搞到有少少似個人貼上去風景度咁，哈~

睇嚟呢度夏天都未必太適合水上活動，因為水入面嘅大石頭好多，即使夏天啲浪一樣咁高，滑浪可能都唔安全~

仲有好多「影相位」~

天黑囉~

欣賞完大海，我哋去搵食喇﹗之前上堂時同老師一齊search過江陵嘅蟹店，搵到一啲「直販場」，啲蟹按重量計錢，然後配搭用餐嘅其他餸菜、白飯等就按枱收費，應該會平啲，不過位置比較遠離遊客區海邊，結果決定唔專登過去了~我哋就咁係海邊沿路行過去，第一間店好熱情咁介紹，最重要係明碼實價有套餐叫，即使貴少少，可以安心咁食就最好~

我哋揀咗個雪蟹生魚片套餐，我同老闆娘講我老公對蟹敏感，主要得我同兩個小朋友食蟹，原來幾多人份主要係同蟹嘅大小有關，佢話我哋一大兩小食蟹的話，二人份就ok，最後可止ok呀，簡直份量非常足夠呀﹗除咗雪蟹生魚片之外，仲有啲配搭係貝類鍋，其實我都好有興趣試，不過應該食唔到咁多啦，就揀咗一定要試嘅雪蟹，同埋大家都好有興趣嘅生魚片啦﹗

因為係套餐，主菜雪蟹同生魚片未到，其他餸菜就呯呯啪啪咁到，哇，冇兩樣主菜都夠晒食飽﹗﹗生蠔、醃生魚片、熟蝦、炸蝦、天婦羅、泡菜煎餅、烤魚、沙律、烤五花肉、豆腐、泡菜、海帶湯，非常澎湃﹗樣樣都好味~

開心~

第一樣主角出場啦﹗﹗生魚片到~應該有唔同嘅部位，我哋唔係咩食家，唔係好識分，有啲就爽口啲，有啲就甜啲，有啲就軟啲，各有各嘅口味~

蟹到﹗﹗好開心呀~

出發前去三姨媽屋企家族聚會時有食過蟹，曉曉有啲食蟹經驗，今次稍稍指點，佢就識得自己剝自己食，正~唔駛靠人係最好﹗

yum yum yum~

以前小朋友再細啲時，食蟹係好奢侈嘅一件事(請參閱：28-12-2019：熱鬧非凡福建探親觀光團day 2(part 4)．食得盡興、玩得盡興的生日宴會)，因為食蟹好花時間，佢哋又冇乜耐性，而家佢哋大個，可以一齊分享美食了~

食到咁上下，侍應姐姐問可以上辣魚湯未，其實我哋已經非常飽，我同佢講，俾個最細最細嘅我哋就ok~umum…都好大喎~講起辣魚湯，韓文叫매운탕，直譯應該係「辣的湯」，一般食生魚片都會附上，韓國人食飯鍾意飲湯嘛，用切完生魚片出嚟嘅頭頭尾尾骨頭嚟煲個湯就啱啱好~話說我同day當年去釜山時食過生魚片，當年未學韓文，又唔太知韓國人嘅飲食習慣，店家話送「海鮮湯」，我哋見個海鮮湯得啲魚骨仲有啲不滿(請參閱：27-5-2013：釜山麗水day 3(part 3)．韓式刺身套餐、世外桃源般的美味刨冰)，硬係覺得俾人呃，事隔咁多年，心入面要同當年嘅店家講句抱歉，係我哋唔知啫，你冇呃我哋丫~

可能冇得再細，結果都係好大鍋~

話說呢碗豆腐送嚟時，day有啲納悶，啲豆腐要點食？咁淡~我同佢講，江陵有條豆腐村，老師都話佢哋嚟江陵玩時都會專登去食豆腐湯，豆腐好出名架喎~正好個豆腐有啲淡，個辣魚湯有啲鹹，我哋自行將兩樣食物配搭，啱啱好﹗

頭先食咗咁耐，一直都未見飯麵類，係呀，我知啦﹗食到99%飽時，侍廳姐姐走嚟問我哋，要唔要用蟹膏幫我哋整拌飯，哎吔，點解我咁飽架？﹗呢個係必食項目喎~day又唔食得蟹膏，我又超飽，我話：「一個啦唔該~」咁飽先出現實在太可惜了…

因為蟹膏，加上紫菜同芝麻去拌飯，真係超—-好—-味—-﹗難怪會成為呢度嘅名物~我已經食到好飽都盡力食多幾啖，曉超飽都食到一兩匙羮~詩詩呢幾日都有啲唔舒服，胃口麻麻地，慘慘~

食飽飽我哋慢慢散步返酒店，仲有重要項目呀~我哋嗰度係spa pension嘛，梗係要浸個靚浴啦~

影番個招牌﹗入夜有啲凍，要戴番頂帽~

當地警察局門口嘅警察superman，我覺得好正所以叫day幫我影，凍又想快啲走，個眼鏡又唔爭氣好矇，有少少狼狽添~

返到溫暖嘅Dabiang Spa~

帶咗Donki買嘅浴鹽嚟，個浴缸仲有水力按摩同埋燈光，爸爸話唔一齊浸喎，我哋三母女一齊浸都好鬆動，可以好好relax~(唔好咁香艷，又想好好記錄，大家唔好想像得太仔細就得啦~)

浸完浴要好好休息啦，因為第二日仲有好精彩嘅行程呀~

前往其他韓國旅遊blog

Comments

comments