8-5-2020:韓語應用實戰篇

2014年時我由全職工作轉咗做兼職,為咗減少工作壓力好好陀B(感恩曉2015年順利出世了),亦為咗增加生活趣味開始咗學韓文,我之前都打過好幾篇關於學韓文既blog(11-9-2014:韓文班開學咯~14-11-2014:學習真好.한국어之進度12-6-2015:한국어第二學期.趣味gogogo21-8-2017:我的韓語學習.邁向第七個學期),之後我就再冇打過關於學韓文既blog了,究竟係學有所成丫,定係半途而廢呢?

識我識得耐既人都知道我以前其實學過西班牙文,中學時搵咗個鬼妹姐姐好似私人補習咁一對一教我學過少少,到大學時係HKU既language centre好正式咁學咗兩年半(到讀到醫科year 3太忙放棄咗),當時會學西班牙文好主要係因為中三暑假時去多倫多讀summer school時識咗啲南美朋友,所以先提起呢個興趣。到大學year 1時language centre好多語言都有得學,我就繼續我既西班牙語學習,但當時我實在唔係好明點解啲人會學韓文,全球除咗中文、英文最多人用之外,西班牙文都好多人用,但韓文就只有小小既韓國會用…但當你迷K pop、迷韓劇、迷韓國綜藝既時候,韓語既世界就會變得非常之大,而且非常有用~

由韓語入門(1)、(2),基礎韓語(1)、(2),中級韓語(1)、(2),高級韓語(1)、(2),原來我係HKU SPACE學咗四個年頭,之前有同學問過我,你打算學到邊個level先停,我當時答:「學到冇得學上去囉﹗」其實一直以來既成績都好好,學得又開心,不過兩個小朋友實在太掛住媽媽,學到高級韓語(2)時,曉曉剛剛滿三歲,佢未到星期四就開始傷感,擔心夜晚見唔到媽媽,初生詩詩又要用婆婆多啲心機,為咗婆婆同兩個小朋友,我決定暫時唔學住啦~暫時?係呀,去韓國留學(短期啫,唔駛擔心或者太驚訝)都係我既夢想嚟架~等兩個女唔會太太太掛住我時我應該會學番~

冇去返學當然有好多嘢會唔記得,少用既文法同單詞都一直減少,但keep住有睇韓國電視節目,語感依然都keep得到~有韓國病人嚟到,就要頂硬上啦﹗

之前其實都有睇過其他韓國病人,我自己講係冇問題,但聽方面就唔係好ok,變得自信心唔太夠~但唔通之前既病人係有鄉音/帶啲方言tone,所以聽唔明?呢位病人講既嘢我真係聽到100% wor,可以好似平時咁take到history(大概英文take history程度啦,肯定冇廣東話咁如魚得水啦)﹗﹗實在太高興了,所以到解釋report時我亦特別用心預備啲詞匯~

我之後自信心增加,居然夠膽主動同佢提及預防疫苗既事添﹗

學習既過程係開心,但可以係生活中應用出嚟就更更更開心了~雖然而家話有機會我會重新pick up韓文,但可能將來抽到時間出嚟,我或者會去學日文或者其他語言都未定呢?

Comments

comments

發表迴響

你的電子郵件位址並不會被公開。 必要欄位標記為 *