1-2-2020:燕瘦環肥100%自家餃子

小朋友停課最起碼到三月頭(我估應該唔止停咁短),日日窩係屋企又悶又冇得放電,家長最頭痛,買咗activity book又教佢寫多啲字都消磨唔到幾多時間~我知道,又kill time又開心又實用既,一定係同小朋友一齊煮嘢食,所以到咗星期六放假,可以試下啦~

平時兩隻都鍾意食屋企自己包既餃子,平時我多數係街市買餃子皮,自己整內餡嚟包,星期五嗰日去街市,年初七未有得賣餃子皮,星期六早上去超級市場都搵唔到~把心一橫,即管試下自己搓皮啦,又唔係未試過,20+年前讀中學時家政堂都試過自己搓皮整鍋貼啦,而家又有網絡可以睇食譜,屋企又有廚師機可以幫我出力,應該ok啩?所以買唔到餃子皮,買咗包麵粉嚟代替~

小朋友午睡醒咗就可以開工了﹗用廚師機絞碎急凍梅肉豬扒(今時今日既新鮮豬肉太貴,又儲存得耐),打碎咗紅蘿蔔同雲耳,解凍咗粟米,跟住就預備今次既重頭戲—-餃子皮了~

曉曉幫手絞肉~

製作餡料中

老二個性,詩永遠唔會執輸~

參考咗網上既食譜,用250g中筋麵粉、140-150ml水、2小匙油、1小匙鹽,放入廚師機度打成麵糰,再拎出嚟搓,我都感覺一份既份量唔夠我哋四個人食,所以repeat多一次,總共用咗500g麵粉嚟整個皮~

由廚師機拎出嚟之後輕輕搓走粉粒~

預備擀餃子皮

麵糰變薄中

麵糰好順利地完成,但將佢變成餃子皮先係問題,因為嗰支擀麵糰既木棒唔知去咗邊﹗就地取材,用個窄身量杯嚟桿薄麵糰,再用膠杯嚟蓋一張張圓形既餃子皮出嚟,開頭day負責擀麵糰整餃子皮,曉負責包餃子,我負責QC、整形、煮熟餃子,但day呢兩日條腰麻麻地,於是我哋交換位置~好明顯我唔夠力,用我啲皮包出嚟既餃子大隻好多,皮厚好多,用day嗰啲皮就細隻啲(因為薄,所以拉唔得大、亦放唔得多餡),皮薄餡靚得多~

我哋整咗一段時間,詩詩開始唔耐煩,所以就索性俾佢食先,煮好一隻佢就食一隻,平時唔覺得佢食嘢食得咁快同咁多,隔冇耐佢就叫「冇晒啦」,似乎佢覺得真係幾好味(或者佢幾肚餓)~中途為咗加速詩詩可以有嘢食,day用啲麵嚟搓咗啲麵條,直接煮俾詩詩食,笑死我~

坐享其成既妹妹~因為大家太忙,根本冇時間好好咁影到啲成品,只得詩詩食餃子video既screen cap~

我覺得啲餃子整體都叫ok既,皮夠嚼勁,但我嗰啲皮因為太厚,所以顯得個餡唔夠strong,皮厚的話,調味要濃啲,入面餡料口感要清脆啲先得,例如蘿蔔、雲耳應該要切絲instead of打碎,day嗰啲皮夠薄,個平衡就好好多~

最後500g麵粉整既麵糰用晒,但當初預備既餡料就有剩,我哋四個都叫食飽咗~可能因為食物比較清淡,我同day半夜都覺得肚餓~

今次經驗係,整嘢食真係好kill time + kill (家長既)能量~自己搓皮好有挑戰性,味道都唔錯,但短時間之內唔想再try,因為太攰,如果想包餃子都係買住外面啲皮先,哈哈~剩低嗰半包麵粉?下次煎pancake啦,應該輕鬆好多~

Comments

comments

發表迴響

你的電子郵件位址並不會被公開。 必要欄位標記為 *