7-2-2020:減少肌肉量流失之尋寶遊戲

因為武漢肺炎,小朋友最少停課一個月,個個盡力減少外出,一方面減低感染機會,二來都要節省口罩~大人都仲會每日出去返工(day公司其實都實施半home office)有得行多少少路,小朋友每日活動空間真係得屋企嗰幾百呎,我哋都盡量爭取俾佢哋落平台玩,但午睡醒來既時間好多其他小朋友,所以我哋都有好幾晚食完晚飯之後落去玩,冇乜其他人,可以口罩都唔駛戴~

妹妹詩詩性格比較活躍,真係會不停sir滑梯,跑跑跳跳,但家姐曉曉真係比較好靜,落街玩都寧願佔據滑梯下面既小空間開餐廳賣雪糕,要氹佢踩下滑板車都要用「送外賣」做題材先會積極少少去下~而家咁少出去,落得去嗰半個鐘梗係希望可以maximize到效果啦~

今日爸爸有好提議,我哋玩尋寶遊戲﹗﹗

帶咗一楝唔同顏色唔同大細既圈圈落去,輪住收埋,跟住輪住搵番出嚟~話說呢楝圈圈都有好耐歷史了,係穎彤表姐佢哋俾既二手玩具,究竟穎彤表姐佢哋之前有冇其他主人呢?

開頭時大家收埋嘢既技術冇咁高超,就咁放係花槽邊、滑梯攀爬架上面、涼亭下面等等地方,好容易就搵到出嚟~但玩多幾次之後,收埋圈圈既技巧越嚟越好,會根據個別圈圈既特性嚟收埋,好似深藍色圈圈放係暗既地方,黃色圈圈放係黃色燈既中間,越嚟越有挑戰性,我都玩到好有趣味~呢個遊戲最成功既地方係,除咗好玩之外,曉曉真係跑多咗好多﹗﹗詩詩未識得收埋,不過跟出跟入,佢既運動量好有進益~

我哋要發掘多啲新遊戲呀,暫時距離最早復課日仲有20日,家長們加油﹗

Comments

comments

在《7-2-2020:減少肌肉量流失之尋寶遊戲》中有 2 則留言

  1. 這是捉迷藏的變奏版,在樓下玩空間大,不自覺就運動起來,很好的活動呀!

    • 曉太細膽,唔敢玩捉迷藏架,即使係屋企入面玩都唔肯,除非同佢組隊,收埋物件嚟搵就ok~

發表迴響

你的電子郵件位址並不會被公開。 必要欄位標記為 *