30-12-2018:台北+北投溫泉2+2之旅day 4(part 1).病病豬曉、覺旅咖啡DIY

可能day 3真係瞓得太少晏覺,曉到day 4早上就唔掂檔了,一早出門就唔肯行路,食完早餐摸到佢熱熱地,雖然冇帶體溫計嚟旅行,但都肯定佢發燒了~曉已經連續3次海外旅行期間發燒,計埋去住香港迪士尼酒店嗰次就4次添~上次2017年8月陀住詩去高雄時曉又發燒,2018年7月一家九口去韓國曉又發燒,今2018年12月去台北又發燒,我都怕咗佢,盡量安排午睡時間同埋行程唔好咁緊湊,但都逃唔過一劫~好在今次得我哋一家四口,行程好彈性既,唔舒服?瞓啦瞓啦~

我哋出去附近食早餐,酒店附近就有間人氣店永和豆漿,每次經過都大排長龍,我哋帶住兩個細既實在冇能耐企係街邊等咁耐,仲要坐啲類似大排檔格局既座位,所以我哋去咗隔離冇乜人嗰間度食,都係食豆漿油條嗰啲~

我哋叫咗燒餅油條、兩份煎蛋餅、蘿蔔糕、叫咗杯咖啡俾day、兩杯豆漿就我哋三母女分,2大2小嚟講…會唔會真係太多呢?呵呵~結果係…食晒﹗小朋友就最鍾意脆卜卜,我就全部都咁鍾意~食得比較辛苦係冇bb櫈,詩又郁來郁去囉~

食完早餐我哋隨便睇一兩間附近既鋪頭就返酒店了,因為曉要休息啦~

我攬住曉瞓…

day就同詩出去行街~

應該都有瞓咗兩個鐘左右,瞓醒覺好好多bor~曉對今日既行程好有興趣,所以起身之後都好積極話要出發~今日去邊?我哋去DIY pizza呀~

有得DIY pizza既覺旅咖啡唔算近,落咗捷運都要步行15分鐘,平時梗係冇問題啦,但病病曉一定行唔到,加上落雨濕濕,我哋決定索性搭的士去咯~跟住地址,司機車我哋去到嗰條巷,睇落唔似既?好寧靜,星期日商業大廈附近人影都冇個,原來條路都幾長,都行好一段路先去到~一去到,哇,間cafe好大好熱鬧呀,同出面完全係兩個世界,而且好多帶住小朋友既家庭,又有當cafe係自修室既學生,仲有好多嚟sweet sweet DIY既年輕情侶~

除咗DIY食物之外,都有得好似一般cafe咁order,因為詩應該等唔到我哋由搓麵糰開始,所以我哋先order一份pasta同一杯果汁,等day同佢食住先,我就同曉去DIY~

兩父女等食開心自拍~

有得食lu~

我哋決定DIY兩個pizza一杯果汁,原來DIY嗰邊係自己俾錢,用部tablet輸入想整既食物,自己俾錢找贖,自己蓋個印仔係身上作實,跟住就可以開始整嘢食啦~

洗洗手就可以開始整pizza﹗

預備挑戰﹗

雪櫃入面有一個個麵糰,自己拎出嚟搓扁佢,佢有指示教你要搓成點樣會有點既口感,你鍾意厚批定薄批?跟住就可以加醬同餡料,各種素食材料同芝士可以任落,如果想加啲肉類就要額外收費了,曉曉最鍾意就係芝士之嘛,所以我哋都冇額外買肉~

整理好材料就可以放入焗爐度焗lu~

不過個焗爐係長開既,你要自己睇住時間,等pizza焗緊既時候可以休息一下,又可以去整果汁都得~

pizza未得,詩詩同爸爸食住粉粉先~

我哋跟住整果汁,冇譜架,想落啲咩就求其落啲落去,mix埋又幾好飲喎~

我哋個pizza出爐lu~

可能因為新鮮焗好,好味道~果汁都好味道~食完之後…仲有第二個pizza要整﹗﹗

今次就由爸爸陪曉去整啦~

詩食飽咗又要落地,看住佢都要花好力氣丫~

所以爸爸諗到好方法~當時11m都仲得,打blog呢一刻詩已經16m,困佢唔住啦,應該可以自己爬出嚟~

曉,乜你又想俾人困住咩?

周圍搞搞震~

食埋第二個pizza我哋就出發去下站了﹗我哋去既就係呢間覺旅咖啡啦~

覺旅咖啡網站:

https://www.journeykaffe.org/

前往其他台灣旅遊blog

Comments

comments

在《30-12-2018:台北+北投溫泉2+2之旅day 4(part 1).病病豬曉、覺旅咖啡DIY》中有 2 則留言

  1. 覺旅咖啡幾好玩喎,好在多元化,可適應不同顧客,不致於熱潮過後冇乜人幫襯!

發表迴響

你的電子郵件位址並不會被公開。 必要欄位標記為 *