29-12-2018：台北+北投溫泉2+2之旅day 3(part 2)．貝兒絲樂園南港大和戀季主題館、韓式豆腐鍋

食飽飽之後我哋就出發去day 3既第一個真景點~台北真係好family friendly，唔單止適合親子既景點多，餐廳又度度都有bb櫈，換片、餵奶既地方又充足~計劃行程時打算點都要去下台灣既playhouse或者親子餐廳，地方大咁多，一定比香港既勁好多~search「台北親子景點」時就出到呢個貝兒絲樂園南港大和戀季主題館，睇網站介紹好似好吸引咁喎，就係正捷運站，就去下啦~

其實我都唔係好知南港即係邊度、同埋有啲咩其他嘢，不過搭捷運去都好多個站下，曉就知佢唔會瞓啦，詩就係車上瞓多一覺，都好~

捷運落車上去成層都係食嘢既地方，再上樓去商場發現好—-靜—-，原來呢個商場唔係好旺嗰種，全個商場最「人口密集」同最「熱鬧」既就係我哋將要去既貝兒絲樂園~

我哋買飛入場，原來外國人同本地人既入場費唔同，我都唔係好睇到個價目表點寫，不過一場嚟到，點都會入去玩架啦~

入到去時詩詩仲瞓緊，所以先由爸爸帶住曉去玩~佢哋玩成點我都唔係好知，睇相啦~

呢度既特色係和風主題，有好多俾小朋友玩家家酒既場景，開鋪頭整嘢食啦、做忍者啦、浸溫泉之類~仲有好多擺滿玩具既小房間同區域，當然唔少得較大小朋友最愛、可以爬上爬樂追追逐逐既設施啦~

兩個一齊扮忍者，忍者場景同溫泉場景都有波波池，但詩好驚波波池，都唔肯入去玩，得個望字~

比較特別既係有個cosplay area，提供公主裙、可愛裝扮look、按尺碼放好，大家可以自由拎嚟著同影相~曉從來冇話恨著公主裙，但係我慫恿之下試咗人生既第一次公主裙，詩就無力反抗之下俾我打扮成一粒士多啤梨，哈哈~

玩車車就大個細個都啱玩喇~

家姐去爬上爬落彈彈跳時…

詩就玩bb玩具~

我家姐後來問起佢值唔值得太逸逸去玩，佢哋嚟緊會去桃園3日，桃園都有貝兒絲樂園既分店，以我哋今次既經驗嚟講，兩歲半既逸可能唔太夠競爭力，今次比較大既小朋友都幾多，跑得又快玩得又癲叫得又大聲，玩到啲玩具亂晒，加上台灣既家長未必好似香港家長咁跟到啲細路實一實，所以都唔可以肯定兩歲半逸會否enjoy，呢度又冇特別分開一個0-3歲幼兒區嘛，可能大樹先生之類會玩得盡情啲吧？

當詩要換片、大家要去廁所，我哋出咗去商場搵育嬰室時，曉都表示唔需要再入番場繼續玩了，因為佢都冇晒力啦~

玩到筋疲力盡之後，我想搵個安靜既地方俾曉晚飯前小睡一陣，所以出咗去商場比較少人既角落企圖暗佢瞓，day就帶住詩去行街街，試咗好一陣曉都係瞓唔著，跟住就調轉，我同曉出去行下，day同詩休息下~

兩母女去咗邊？

其實我想試呢啲卡啦ok「電話亭」好耐架啦，入銀仔唱一首歌都得喎~又要曉識唱既歌…揀咩歌好？我老公真係最了解我，我叫佢估下我哋唱咗咩，佢估第一次就估中—-就係「We wish you a Merry Christmas」喇~

算數啦，唔瞓啦唔瞓啦~留係呢度食飯又太早，我哋決定返去近啲酒店既地方再搵食，冇乜idea，day叫曉沿線任揀一個捷運站，幸運女神曉揀咗台北車站，好啦，總有嘢食既(苦笑)~講開又講，其實今晚原先一早我係香港book定咗個火鍋，不過諗下諗下都係擔心帶詩去食火鍋會搞唔掂，唔知張枱大唔大，佢會唔會掃跌晒啲嘢/掂啲熱嘢，唔知我哋會唔會食好耐佢冇晒耐性，唔知有冇bb櫈等等，所以cancel咗booking，下次等佢哋大個啲先再去啦~

結果我哋去咗台北車站旁邊既三越百貨搵食，見邊層有多食肆就去碰碰運氣，睇下邊間有位可以坐得舒舒服服快啲有得食就算，搵到呢間韓式豆腐鍋既鋪頭~