早於大肚時已經捧香港瑜伽舍場，十四、五週左右已經開始去做孕婦瑜伽(請參閱：3-12-2014：懷孕扎記19w4d．孕婦瑜伽@香港瑜伽舍)，而後來三十週左右有去坐波波(請參閱：17-2-2015：懷孕扎記30w3d．孕婦分娩球伸展班@香港瑜伽舍)，嗰陣已經知道miss會教BB按摩，都好奇嘅，後來曉出世之後miss亦有send BB按摩班嘅資料嚟，咁就去玩下啦～

之前有次聽免費嘅產前講座都有個topic係BB按摩，所以大致上做啲咩都有啲概念，講真我對嗰啲so called神奇功效其實我都半信半疑，但我肯定認同嘅係，可以增進親子關係，又可以安撫BB，BB relax啲，夜晚好瞓啲呢啲應該都係真嘅～

其實兩個月大就可以參加啦，之前其實都報咗名，不過上一次開班唔夠人數所以cancel咗，我又覺得塞翁失馬焉知非福，因為今次去到見到，年紀比較大嘅BB(包括曉在內，參加B之中只有一個六個幾月一個差唔多六個月大過佢)係比較定，其他細個少少嘅似乎喊喊多啲～另一方面佢兩個幾月時我哋帶佢出街都冇咁confi，最主要係佢嘅作息習慣仲未穩定，所以上次cancel都好，今日去參加更適合﹗

只需要帶曉同一條大毛巾就可以上去堂了﹗按摩油miss提供，佢話係專登搵搞美容嘅朋友調配，全天然，BB唔小心舔咗少少都唔怕～miss有個道具B，逐個部位咁dem俾我哋睇，我哋自己試時就會過嚟睇下我哋做得啱唔啱～依次序係手手、胸口、肚仔、腳腳、背脊，最後係面同埋頭，點解教學時放係最後？因為唔少B唔鍾意人掂塊面，費事一開始就整喊晒啦～最後再追加教一啲練習四肢協調嘅運動﹗一個半鐘嘅課程就係咁樣完成～

唔知係瞓飽食飽心情好定係點，似乎曉都真係幾enjoy按摩喎，似媽媽乎？由開始起，直至最尾按面佢先有喊，而且我哋邊按邊同佢玩同唱歌，佢好開心呢～雖然BB喊聲此起彼落，周圍嘅家庭都其樂融融，氣氛都好好～一個半鐘係幾長嘅，途中有三個B瞓著咗了，爸媽們冇得practise都可以學咗先嘅～

最尾miss主動幫大家影下一家大合照，yeah～我哋都買咗一支按摩油，返到嚟有時間都可以開心下relax下～一行出大廈曉就瞓著了，真係咁有效？﹗希望效果延續至今晚，今晚都sweet dream好瞓啦～

前往其他半熟手媽媽blog

Comments

comments