13-12-2014:台北babymoon day 2(part 2).漫步陽明山之七星山、冷水坑、牛奶湖、涓絲瀑布

我哋食飽飽就出發去陽明山行下啦~雖然我哋兩個都算食得好快(其實已經慢慢歎,但比起周圍啲枱我哋甚至追上進度~),都食咗兩個鐘﹗食完時都兩點半了~因為松園禪林離一般遊客去嘅陽明山出名景點花鐘甚麼嗰啲有啲遠,我哋如果要過番去都要搭番巴士,反正嚟到呢邊,不如睇下有咩睇啦~冬天唔係花季,所以冇咩必去景點,隨意逛就好了﹗SONY DSC

我哋坐嗰架巴士小15呢,松園禪林好似唔知尾四定尾五個站,我哋記得後面有冷水坑同埋擎天崗,兩個都係景點,不如沿住車路行上去啦~行咗一個站左右就發覺呢條行山徑--環七星山人車分道,0.8km可以去冷水坑喎~gogogo~SONY DSC

路都係緩緩上落嘅坡,而且修葺得好好,加上上次同三姨媽去過行大潭水塘,對於身懷六甲嘅我嘅體能有幾多斤兩自己心裡有數,唔怕唔怕,反正只有我哋兩個,慢慢行、隨意休息~開頭呢段路冇乜景色,兩旁都有啲草叢同埋樹木,隱約見到遠處嘅車路,反正比起行車路旁安全得多吧﹗SONY DSC

上到高處可以遠眺山景~SONY DSC

仲有冬天獨有,植物唔同顏色嘅層次~

原來去到0.8km嘅冷水坑有個遊客中心,我哋除咗借用一下洗手間之外,亦了解下形勢,哦,有山徑可以去擎天崗or涓絲瀑布,我哋記得涓絲瀑布呀﹗松園早一兩個巴士站就係了~聽落涓絲瀑布個名好似靚啲,而且day話洗手間入面有瀑布嘅照片,睇落都幾靚咁,加上去瀑布應該係向下嘅地勢,行起上嚟輕鬆啲吧?好的,我哋就揀涓絲瀑布啦~途中仲有其他景點添~

冷水坑原來仲有個溫泉浴室㗎,不過我哋都冇進一步了解,一來我大緊肚根本唔可以浸溫泉,二來我哋都冇帶東西做準備,day都冇得浸~SONY DSC

上去觀景平台影下相,跟住我哋就出發啦﹗SONY DSC

冷水坑附近有個小小景點,叫做牛奶湖,其實就只係一個小池,因為地上礦物嘅緣故,池水變得奶白色的,不過大家只可以遠觀,冇得行近過去嘅~

SONY DSC

光禿禿嘅樹木都有另一種美嘅~

話說我哋而家行呢條路叫做「冷擎步道」,取其「冷」水坑同埋「擎」天崗嘅第一個字,我哋就話意思係「冷到眼擎擎」了﹗好在行起暖少少,如果唔係冷水坑遊客中心啲冷帽咁肉酸,恐怕我今個trip又買一頂帽了﹗

SONY DSC

走上吊橋~SONY DSC

好在都好穩陣~

一直輕微上上落落嘅山路行得都舒服嘅,不過而家帶住BB呱唔可以跌,平時最鍾意行路kick到嘢嘅我要格外小心,所以望地下多過望風景咯~SONY DSC

慢慢聽到流水聲音,越來越強,知道就快到了﹗呢個?唔係唔係~咁嘅水量點可以叫做瀑布呀~

SONY DSC

呢個至係涓絲瀑布~以見過嘅瀑布嚟講唔算特別勁,不過都算優美嘅~而且水非常清澈+清涼(我冇掂過啲水,係day走埋去小溪掂過﹗﹗真勇敢~)講起旅行睇過嘅瀑布都有唔少呢,有啲宏偉、有啲優美,好多都印象深刻~(請參閱:15-9-2010:台北宜蘭trip day 4(part 1).五峰旗瀑布、聖母朝聖地11-11-2011:斐濟蜜月day 5.Upper Navua River之激流12-12-2012:斯里蘭卡day 5(part 2).Horton Plains、The World’s End、)

SONY DSC

離開咗涓絲瀑布都仲有佢嘅小分支呢,唔知會唔會有台灣人專登上山裝啲水返屋企用?

我哋慢慢出番去巴士站,好好彩好快就有回程嘅小15了,不過逼爆巴士丫,可能人人都係呢個時間返屋企吧~我哋準備去今日嘅另一亮點啦,請繼續留意下一篇blog啊~

陽明山國家公園網頁:

http://www.ymsnp.gov.tw/index.php?option=com_content&view=featured&gp=1&Itemid=304

前往其他台灣旅遊blog

前往其他懷孕扎記blog

Comments

comments

4 關於 “13-12-2014:台北babymoon day 2(part 2).漫步陽明山之七星山、冷水坑、牛奶湖、涓絲瀑布” 的評論

  1. 我沒有來過這一邊,最近兩次去陽明山都是賞花,今年2月那一次就是在花鐘附近賞櫻,3年前4月就去竹子湖看海芋,都是乘車到花鐘那邊再轉108遊園公車,那公車也途經你吃午餐的松園禪林。
    去旅行睇過既瀑布,暫時最勁都應該係Niagara Falls喇~

    • 下次去開台北都可以走一走我呢條路線,研究下可以去浸埋冷水坑溫泉添~
      尼亞加拉大瀑布當然最勁啦,不過啲相唔知放咗係邊呢?

    • 미쉘 씨~
      好開心你嚟我個blog+留言丫﹗
      哈,我只覺得自己係係山中散步咋喎,冇行山咁勁~:p

發表迴響

你的電子郵件位址並不會被公開。 必要欄位標記為 *